إبداعات الشاعر رائد عبد السلام

[رائد عبد السلام]

كان فيه زمان... مع إنه مش ماضي بعيد
صفصافة مايلة تطول فروعها أي إيد
عيال ما كانوا أو كبار
أو أي ناس ........
أسياد ما كانوا أو عبيد
بيشدوا دايما شعرها
تضحك لهم
وكان اليوم ده ليها ألف عيد
أوراقها كانت تتقطف
و روحها كانت تتخطف
لكنها مستحملة ..
مش مشكلة ، ينقص من التاج الكبير .....حبّة ورق
وفجأة في راس الشيطان خاطر برق ...
و قال دي عايشة من زمان
لو نقطع الفرع الكبير
إيه اللي ح يضرّ الجذور...؟
- طيّب نشور .......
وجابوا شلة نجارين
واتداولوا فيما بَيْنََهم
الشجرة واقفة ملقّحة
والكل صاحب مصلحة
مافاتش يوم علي الكلام
إلا ولقينا في الزحام
نجّار هُمام
حز الجذور
وفجأة نزلت م السما تِهوِي
علي تراب الجسور
--------------
وبعد ماكان شَعرها
بيغسله ريق السحاب
اتنططت علي جسمها كل الكلاب
واتقطّعت واتفرّقت قبل المغارب .....
واللي كان في الملحمة تايه وغايب
كان برضه له – بالعدل - من ضفايرها نايب
--------------
بغداد..... أيا جرح الكرامة والضمير

- قد علمونا من قدم ..بعضَ الحكمْ
والأمرُ جدُّ أو خطيرْ
إن كان ذبحُ الشاةِ مَنْويّا .... وتم ْ
فالسلخُ دوماً لا يُضيرْ..
فهل يضرُ علي رفات الراحلين الرقصُ
أو بعضُ الطربْ ؟ّّ!!
- مَرْحي وأكرِم بالعربْ .