موسيقى الشعر - دروس في علم العَروض

[رائد عبد السلام]

الأستاذ الشاعر الكبير : كمال عبد الرحمن
أتمني وأدعو الله أن تكون بخير ...لم أعرف أن وجودك كان نعمة ومنحة وعطاء جميل من رب المنن إلا بعد أن طال انتظار قدومك...والذي أرجو أن يكون سريعا ...تحياتي يا أستاذنا الجليل

[محمود]

أول كلامي سلام ..

يا أستاذ رائد ،

كمال كان قد ذكر أنه يأمل ألا يطول غيابه عن شهر .. لاحظ يأمل تلك لأن عليها مناط التخريج والاستنباط هنا. وهو الأن متغيب منذ شهر وعشرة أو احداشر يوم، يعني ما زال داخل نطاق ما تسمح به "يأمل" تلك فمن الممكن مثلا أن يعود في اليوم الاتناشر أو التلتاشر أو الاربعتاشر بعد الشهر .. لكن غير معقول أن تطول الغيبة لليوم العشرتاشر، وإن حدث فلن يكون سوى أن نغزو بيته في دمنهور بجيش جرار لاقــِبــَل له به ونأتي به مكبلا بالأصفاد لنجلسه قسرا على الدكة.. المشكلة الوحيدة في هذه الخطة المحكمة هي ..
عاوزين عنوانه ..

تحياتي

محمود

[رغـد اليمينى]

السلام عليكم ورحمة الله وبركاته

..::+:. أُستاذنا الكبير سمعجى .:+::..

طَال غِيابكَ سيدى عسى المانع خير

اللهم اني أسئَلُكَ بكل إسم هو لكَ سميت به نَفسكَ أو أنزلته في كِتابكَ أو علمته أحد من خَلقِك أن تُطمئِن قلوبنا على
أستاذنا كمال
آمين يا رب العالمين

.
.

[محمود]

أول كلامي سلام ..

سَيِّدنا راجع بإذن الله .. حد يا جماعة يوصل لحد بيت ام خَـلـَف ينده للواد خلف العريف علشان يلـِم الفراخ والوز اللي الست والدته استولت على الكتاب وبتربيهم فيه وينضف المطرح ويرش شوية مَـيـَّة.

تحياتي

محمود

[unicorn]

يادى النهار النادى
و النبى ما حد هاينضف الكتَّاب من فراخ أم خلف الا آنى,
هو انا فديك الساعة
طب دة أبويا زيدان ربنا يطول عمره , نادر فى دخلة سيّدنا الكتَّاب لا يدبح المعزة اللى حيلته تحت رجلين سيّدنا
و يوكَّل الناس.......
ببركة قدوم سيّدنا
و النبى انت تستاهل كل خير يا عم محمود يا وش السعد , على أخبارك اللى تشرح القلب

[محمود]

المشاركة الأصلية كتبت بواسطة محمود

أول كلامي سلام ..

سَيِّدنا راجع بإذن الله .. حد يا جماعة يوصل لحد بيت ام خَـلـَف ينده للواد خلف العريف علشان يلـِم الفراخ والوز اللي الست والدته استولت على الكتاب وبتربيهم فيه وينضف المطرح ويرش شوية مَـيـَّة.

تحياتي

محمود

أول كلامي سلام ..

يا سيدنا غيابك طال وأهل البلد حالفين ولادهم ما يحفضوا الألفية إلا على إيد فضيلتك. ثم إن ام خلف دبحت الفراخ والأنارب والبط اللي كانت مربياهم في الآعَة والواد خلف كنس المطرح وهوَّاه وخلاه يشر ِح القلب العليل ، ومعادش فاضل غير ان فضيلتك تنور الدكة من تاني وصوتك يجلجل. يعني يرضيك بعد ما لفيت على البيوت ونبهت على ولاد البلد وكلهم جهزوا الزُواده تقوم فضيلتك تخلا بيهم كداهُه؟!

تحياتي

محمود

[unicorn]

سيدنا قدامه يومين او تلاتة بالكتير , و نازل الكتَّاب يا دكتور محمود
انا قلت اسجِّل وعده دة هنا , عشان ما يقدرش يُمْلص منه.
بس المشكلة ان الراجل دخل بيوت ناس أكابر , و داق البيتزا و السومون فيوميه
يعنى المِش اللى باجيبه معايا من البيت ما بقاش ينفع ,
حتى الفرخة العتقية بتاعت اول كل شهر اللى بتجيبهاله مش هاتدخل مزاجه ,
يعنى المعلوم لازم نضاعفهوله عشان يقنع و يرضى و يحفضنا بما يرضى الله .
ربنا يكفيك شر السومون فيوميه و اللى بيعمله فى نفوس الناس يا اخويا ,
دة ياما خرب بيوت و ياما دخّل ناس اللومان .

[محمود]

المشاركة الأصلية كتبت بواسطة unicorn

سيدنا قدامه يومين او تلاتة بالكتير , و نازل الكتَّاب يا دكتور محمود
انا قلت اسجِّل وعده دة هنا , عشان ما يقدرش يُمْلص منه.
بس المشكلة ان الراجل دخل بيوت ناس أكابر , و داق البيتزا و السومون فيوميه
يعنى المِش اللى باجيبه معايا من البيت ما بقاش ينفع ,
حتى الفرخة العتقية بتاعت اول كل شهر اللى بتجيبهاله مش هاتدخل مزاجه ,
يعنى المعلوم لازم نضاعفهوله عشان يقنع و يرضى و يحفضنا بما يرضى الله .
ربنا يكفيك شر السومون فيوميه و اللى بيعمله فى نفوس الناس يا اخويا ,
دة ياما خرب بيوت و ياما دخّل ناس اللومان .

أول كلامي سلام ..

إيوة ايوة قولتلي .. أنا عارفه الفوميه ده. عمدة بلدنا كان مركب لوحين منه في المندرة البحرية. إنما هو سيدنا من إمتى بقى من دول ، وبياكل جزاز؟؟!! وتجوللي كـُتّاب وعريف ومش بدوده. ده كدا حياكل زلابيا كل يوم ومحدش حيعرف يكلمه. وعليه العوض ومنه العوض في العلام واللي بيتعلموه بجه.

تحياتي

محمود

[سمعجى]

المشاركة الأصلية كتبت بواسطة unicorn

سيدنا قدامه يومين او تلاتة بالكتير , و نازل الكتَّاب يا دكتور محمود

انا قلت اسجِّل وعده دة هنا , عشان ما يقدرش يُمْلص منه.
بس المشكلة ان الراجل دخل بيوت ناس أكابر , و داق البيتزا و السومون فيوميه
يعنى المِش اللى باجيبه معايا من البيت ما بقاش ينفع ,
حتى الفرخة العتقية بتاعت اول كل شهر اللى بتجيبهاله مش هاتدخل مزاجه ,
يعنى المعلوم لازم نضاعفهوله عشان يقنع و يرضى و يحفضنا بما يرضى الله .
ربنا يكفيك شر السومون فيوميه و اللى بيعمله فى نفوس الناس يا اخويا ,
دة ياما خرب بيوت و ياما دخّل ناس اللومان .

يا دي النور يا دي النور ،،
و الله و شرَّفت يا بو مندور ،،
بيتك و مطرحَك ،،
و اقعُد في الحِتـّة اللي تريَّحَك ،،
وَ نِعم الشباب ،،
و زينة الأحباب
ثورَجي مِن يومَك ،،
و محبِّتـَك سابقة لومَك

شوف بقى يا سِيد الكـُلّ ،،
إحنا عاملين تنظيم صُغيّر على قـَد الحال ،،
إسمه تنظيم القراميط الأحرار ،،
و القائد بتاعنا حضرة جناب الدَّكتور محمود ،،

و هدفنا المنشود هو القيام بثورة سَمكية ،،
و باعتبارك من إسكندرية عروس البحر الأبيض ،،

فالمطلوب من جنابك ،، تجنيد كافة أنواع السمك اللي بيلـَعبَط
في بحركم أبو موجة ساتان ،،


و انا متشكر قوي قوي عَ التليفون اللي شدتهولي مِ البندر ،،
و عشان خاطِر وِشك السِّمِح دِه ،،
آني حارجع أقعد في الكفر وِسط أهلي و ناسي ،،
و ربنا يقدرني على نسيان السيمون فيميه

و بالمناسبة السعيدة دي ،،
خـُد شوية الجناس التام دُول :

لو عايز تعرف أبو مَن ؟! دُور
و امشي ف سِكة مالهاش سور
و امـَّا تلاقي ف وِشك نــــــور
تعرف إنه ،، أبو منـــــــــدور
و تبلـَّغنا عشان مَـــن ،،، دُور

[سمعجى]

المشاركة الأصلية كتبت بواسطة محمود

أول كلامي سلام ..

يا سيدنا غيابك طال وأهل البلد حالفين ولادهم ما يحفضوا الألفية إلا على إيد فضيلتك. ثم إن ام خلف دبحت الفراخ والأنارب والبط اللي كانت مربياهم في الآعَة والواد خلف كنس المطرح وهوَّاه وخلاه يشر ِح القلب العليل ، ومعادش فاضل غير ان فضيلتك تنور الدكة من تاني وصوتك يجلجل. يعني يرضيك بعد ما لفيت على البيوت ونبهت على ولاد البلد وكلهم جهزوا الزُواده تقوم فضيلتك تخلا بيهم كداهُه؟!

تحياتي

محمود

نـوَّرت الآعة يا دَكتورنا الغالي ،،

و راس سيدي المَخنجي ،، أنا كل ما ارُوح حَلـَقة السَمَك ، أستـَقضَى شوية قِشر بياض
و لاّ طريحة بوري من ابو وِدن صَفرا ،،
يقوم طيف معاليك ناطط على بالي كِدا من غير استئذان ،،

و اقول في عقل بالي ،،
هوَّ مش برضو يا واد يا سمعجي ( دَكتووور ) في الثروة السَمَكية !
اللي عُمرُه ما افتكرك بجوز حِنشان و لا كيلو بطارخ و لا حتى بكابورياية دَكر ،،

يكونشي دَكتووور في ( الثورة السمكية ) !

ماهو أصل الثروة و الثورة على نفس الحروف و الوزن ،،
أكيد و حتمَن لـَزمَن ،، يكون دكتور في الثورة ،،
آل ثروة آل !
و هو لو فيه ثروة ،، كان كيلو البربوني وَصَل 45 لحلوح !

طاب و رحمة شرَف سيدي المَكـْفي ،، ما تخبَّي عليـّا حاجة

إذا كان كارَك في الثورة السمكية ،،
ضمني للقراميط الأحرار ،،

و محسوبك مستعد لكافة أنواع الإنقلابات الثورية القادمة
( من تحت الماء )

ما هو لا مؤاخذة مخلوقات ( اليابسة ) لا عارفة تغيّر و لا تصَيّر ،،
فالحِين في ( السِّياح ) و الجعجعة في المظاهرات ،
لغاية أول خرزانة ف إيد عسكري أمن مركزي ،،
و تلاقي المُولِد انفـَض ، و كل حَى خَد ديله في سنانه و فلسَع ،،

ما فيش غيرها الثورة السمكية اللي هاتقلب نظام الحكم ،،
و تِقلِب ريحته كمان ،،
و يبقى شِعار المرحلة :

إقلِبها ظفارة ،، دي العيشة مرارة

عموماً يا سيدنا الدَكتور ،،
أنا حابعَت الواد خلف العريف ، يلِف ع البَلد دار دار ،،
و يبلغهم يبعتوا العيال بكرة من صباحية ربنا ،،

أما السِت ام خلف اللي استولت على الثروة الطيورية أثناء غيابي في البندر ،،
فانا حاقرا عليها عِدّية ياسين ،، يـِمكن تنسَخَط ( بطة ) ،،
و آهو الواحِد يـِرُم عَضمُه بيها ،،



واد يا خلـَف ،،، قوم قامِت قيامتك ،،
إبعَت امك تيجي تاخد ( الآعة ) وِش نضافة ،،
و رُوح انتَ لِف ع الكَفر و بلغهُم بيت بيت ،، إن عمك الشيخ سَمَعجي فتـَح الكُتـَّـاب ،،
و جاهز لكافِة شييء ،،

أحجبة لمنع الحسد ،، تطليع العفاريت من جتِة الملبوسين ،،
رقية شرعية ،، فك السِحر ،، إزالة المَس الشيطاني ،،
تفسير الأحلام ،، العلاج بالأعشاب ،،

و آخر حاجة تقولها يا خلـَف : دروس عِلم العَروض

خـُد راحتك يا وَله في اللف ،،
بس ابعت امك الأول تيجي تنضف المكان ،،
عاجبَك الكمكمة اللي احنا فيها دي ؟!

مَالـَك بتزغـُـر في خِلقتي كِدا يا بن الفرطوس ؟!