معزوفات على الكمان للأستاذ عادل صموئيل

[عادل صموئيل]

احبائى
اقدم لكم مشاركتى الثانية فى هذا هذا المنتدى الجميل الذى اشتركت فيه امس فقط واندم على كل يوم لم اشترك فيه قبلا
من عزفى المتواضع على الكمان همسة حائرة من اجمل الحان محمد عبد الوهاب اتمنى ان تحوز اعجابكم لأقدم لكم اكثر واكثر

[amsel]

استازنا العملاق عادل صموئيل هزا العزف لاأغنية همسة حائرة انا بعتبرة من التحف الثمينة لان هزا العزف يغزى النفس بأعلى من مشاعر وبترجع سنوات للوراء والزمن الزهبى الجميل لان دقة الزف مش موجودة عند اى شخص فى الوت الحالى كا العملة الصعبة نشكر حضرتك على العزف العلى الاحساس المرهف وربنا يعطيك الصحة وتمتعنا كمان اكثر من هزة التحف الثمينة معى ارق تحياتى لشخصك المحبوب

[عادل صموئيل]

احبائى
اقدم لكم من روائع عبد الحليم حافظ احبك
من عزفى على الكمان
اتمنى ان تسعدوا بها

[محمودسعد]

اخي الحبيب وزميلي العزيز وهذا لانك قلت كلام يدل علي الحرمان فعلا في هذا الزمن المحروم
لقد ذكرتني بنفسي مع الاحتفاظ بالفارق فانت استاذ كبير وعملت مع امهر وارقي واشطرالعازفين وانا كنت من المستمعين لهذا الفن الجميل في زمنه الجميل
ارجوا منك انك تشاور نفسك في مساله الايقاعات هذه وتحلها بطريقه الاستاذ الالاتي فهو محروم من زمااااااااااااااااااااااان وماصدق لقي ملاذ للمحرومين من الفن الاصيل المحترم
وهو يكيف اموره واحنا كمان كمطربين محرومين ولقينا اللي يعوضنا في سماعي واي مزيكه بتترفع كل مطرب فينا بيحب يغني عالمزيكه او يركب صوته من خلال برنامج او برامج كما قال استاذي الالاتي
ومع ان الميزان ماشي ايه مليون الميه بالبلدي ومع ذلك نحن نطلب منك ان تستعين بما هو متاح من الايقاع حتي تمتع نفسك وتمتعنا وتخلينا نغني اللي مانحلمش نغنيه فانت استاذ وفنان محترم
وانا اسف للاطاله وعارف انك معذور في حكايه الايقاع دي فتسعين في المائه من الايقاعيين الحاليين بتوع راقصات وبتوع تك تك تك وبس ومفيش دوم واللي مالوش دوم حالته تغم
يااستاذ
انا احييك كثيرا كثيرا كثيرا

[عادل صموئيل]

الزميل العزيز الاستاذ محمود سعد
اشكرك من كل قلبى على ردك المشجع الجميل
انا عايز اقول لك انى خلال اكتر من عشرين سنة عزفت فى الفرقة الماسية من سنة 70 يعنى عشت مع عبد الحليم مثلا 7 سنين
ومع كل نجوم الصف الاول وحتى العرب مش المصريين بس وخلال تلك الفترة تعايشت مع كل الملحنين عن اقرب اقتراب ممكن لفترات طويلة وكنت صغير وغاوى موسيقى مش باشتغل عشان الفلوس المهم انى حاولت انى اشرب كل الاساليب
يعنى بالحتكاك مع عبد الوهاب لما تسمعنى اعزف اغنية لعبد الوهاب بتخبل انه موجود معايا انت عارف لو سمع حرف هو مش عامله ممكن يضربنى بحاجة وكذلك السنباطى وبليغ والموجى وكمال الطويل وكلهم وكمان انا بكتب نوتة يعنى كنت اكتب لهم الالحان يعنى اتولد على ايدى الحان كتير شربت ادائهم
والناء ايمها كان لايف يعنى المطرب مه الفرقة تخيل حضرتك ام كلثوم اللى انا حافظ كل كلمة قالتها وشاربها هل كان من الممكن تغنى على شريط وتلبس الهيدفون ؟ اقول لك استحالة ولا عبد الحليم ولا فايزة ولا نجاة ولا ولا ..
ليه ؟ لأن اليقاع السابق تجهيزه بيبقى زى القطار بيحكم المؤدى سواء كان المطرب او انا بالكمان وتعالى ركز تركيز شديد فى اى اغنية ايامنا او قبلنا بشوية تلاقى الايقاع ممكن فى اماكن يبطىء او يسرع او يقعد شوية
اقل لك اكتر لو سمعت اى لازمة اغنية بتكون سريعة وبعدين تلاقى لازمة الانتظار كنا بنكررها ساعات 20 مرة وبالذات مع فريد الاطرش وتلاحظ انه هو بيبطأ بأيده ويخلينا نعيد لحد ما يحس بالسرعة اللى هو عايزها دلوقتى والمذهل ان السرعة اللى هو عايزها دلوقتى ممكن بكره نفس اللحن فى حفلة تانية هو عايزها اسع سنة صغيرة او ابطأ بأختصار كل مبدع من دول لو اديته رتم ثابت حايضبعه يخليه بيجرى يلحق الدوم ممكن مايعرفش يغنى واللحن نفسه برضه سرعته مش على مترونوم ولكن السرعات بتتفاوت
انا كنت اعزف مع عمالقة الايقاع حسن انور وحسين معوض ومحمد العربى ولو تلاحظ انهم بيمشوا مع المؤدى مش بيسحبوه على سرعتهم هم يعنى ممكن جملة عايز ابطأ ساعتها ذوقى كده تلاقيه معايا لكن لو هو ماحسش بيا ممكن اقع
فيه جملة شهيرة قالتها ام كلثوم عن ابراهيم عفيفى عازف الايقاع القديم معاها ( وطبعا للأسف انا كنت صغير جدا ايامه ماشفتهوش شخصيا ) لكن زملائى اللى اشتغلوا جنبه حكوا لى عنه كتير قالت ام كلثوم ابراهيم عفيفى بيسترنى والكلمة دى كبيرة جدا
ام كلثوم ايقاعها مضبوط مش حا تقع لكن لما مزاجها تبطأ فى حتة او تسرح فى حتة او تصدر اى تصديرة من اى نوع يعنى طويلة او قصيرة على طول كان يلحقها وكل حركة ليها عنده علاج مش ممكن تحس ان فيه شىء يعنى افرض انسجمت وسخنت وبعدت عن الوحدة كان يديها دمين ورابعض يعدلوا اى شىء
والاخوة الاعزاء لاحظوا ان الوحدة بتاعتى مضبوطة وناس قالوا على الشعرة طبعا من الشغل مع العظام جدا اكيد انا اتعديت منه
بس فيه سر خطير لو دققت فى عزفى حاتحس انى بعزف زى المطرب الاصلى ( لأنى بحس انه شايفنى وبخاف منه واعمل حسابه زى زمان لأنى عمرى ماحسيت انهم ماتوا لأنهم عايشين معانا طول النهار يعنى كل دقيقة الراديو بيقول لى احن حنا اوعى تغير وتفسد اللى علمناه لك ) لو ركبت ايقاع على معزوفاتى ممكن يفرق فى اماكن كتير
ونفس المشكلة هات نفس الاغنية لأم كلثوم بتاعتها ومعزوفتى وركبت عليهم ايقاع كمبيوتر حتلاقى حايفرق معانا انا وام كلثوم فى نفس المكان لأن انا بعزف بأحساسها هى عشان كده تحس ان عزفى حلو لأنى صادق زيها بالظبط
آسف للإطالة ولكن انت فتحت موضوع يحتاج كلام اكتر من كده كتير وانا تحت امرك فى اى مناقشة والف شكر تانى

[صلاح السويفي]

المايسترو ..مايسترو

مايفوتناش نشكر حضرتك ياأستاذ محمد أبو المحروس حسام

أن أفردت موضوعا مستقلا للأستاذ عادل ..

فهو بكنوزه يستحق ..ولك عميق احترامي أستاذ محمد

[الألآتى]

أشكرك ياعم صلاح .. يامتابع ..

أما بالنسبة للأستاذ عادل .. فهو يستحق بالتأكيد أن تكون مشاركاته فى موضوع واحد لسهولة البحث والإستماع والإستمتاع .. بدلاً من تناثرها فى أنحاء القسم ..

شكراً مرة أخرى ..

[mohamedafify]

استاذى العظيم الاستاذ عادل انت تمتعنى بهذا العزف الجميل والاحساس الرائع وكما لو ان اوركستر كامل يعزف الاغانى التى تقوم بتسجيلها اللة ينور عليك مع تحياتى محمد عفيفى الذى يتمنى اللقاء بيك

[عادل صموئيل]

احبائى
قبل ان ابدأ كلامى اتوجه بمزيد الشكر للأساتذه غواص النغم الذى تمنيت ان التقى به والاستاذ محمد السلامونى والاستاذ محمد عفيفى والاستاذ محمد الآلاتى وبقول له ادعيلى يا ابو حسام ربنا يرزقنى بعازف رق يكون من يتوع زمان ويكون هاوى ( مش محترف ) ويكون من اعضاء المنتدى ويكون ساكن قريب من عين شمس
وتشجيعك لى اليوم هو الذى جعلنى احتار لكم هذه الاغنية الجميلة من بين 50 معزوفة جاهزين للتنزيل سأنزلهم تباعاً
ومطرب اليوم من اندر الاصوات فى تاريخ الاغنية العربية ومن اجملها ولو اخترنا 4 اصوات على مر التاريخ لكان احدهم وانا اتكلم من منطلق الاستماع الشخصى له وليس فى الاذاعة ولكن مع الاسف هذا الفنان الكبير إتظلم , إتظلم ولم يأخذ حقة فى الجزء الذى يستحقه على صفحات التاريخ طبعا هذا المطرب هو
عادل مأمون
والاغنية الرائعة
ياللى سامعنى قول يانور عينى
واقدمها لكم فى وصلة غنائية اتمنى تحوز رضاكم
واسمحوا لى ان اقول قصتى
انا اول مرة تعرفت على هذه الاغنية زمان جدا لما كان الفيلم نازل جديد ساعتها كنت صغير جدا اعزف لكن فى بيتنا واحلم الاحلام الوردية بالفن استلفتت نظرى فكرة لماذا لحن كمال الطويل الاغنية مع ان كان من المفروض ان تكون دور من ادوار عبده الحامولى
وبعد سنوات احسست بإجابة السؤال كان الدور بشكله القديم لن يصل الى قلوب عامة الشعب التى يخاطبها الفيلم والدور اصلا طويل لن يحتمله فيلم عادى فألادوار كانت يتذوقها الخاصة مثل جمهور الاوبرا اليوم ولكن اعجبتنى الفكرة فقد ادى كملا الطويل اللحن بحذق ومهارة وذكاء عمل شكل يشبه الدور القديم ولكن عصرى وجميل وجذاب وفيه كل مقومات الاغنية الناجحة لجمهور الستينات ونجح اللحن حتى ان عادل مأمون لم يستطع ان يأتى بلحن فى مستواه بعد ذلك مع انه كان يتعامل مع جميع الملحنين
ومشكلة عادل مأمون عندما بدأ لم يتقبله الجمهور كما ينبغى مع انه كان فلتة كما قلت لسبب بسيط ان صونه كان يشبه صوت عبد الوهاب تخيلوا قمة التذوق عند الجمهور واليوم كل اللى بيغنوا صوتهم شبه بعض وماحدش واخد باله
وبعد سنوات فى عملى بالفن وبدأت مداركى تتفتح على اسرار الفن فى سنة 1975 ذهبت مع الفرقة الماسية بصحبة الفنانة وردة لإحياء حفلات فى البحرين الشقيقة نزلنا فى اوتيل يسمى دولمون انا كنت نازل فى الدور الثالث ومرة اثناء خروجى من غرفتى بالنهار خرج من الغرفة المجاورة شخص يحمل عود وانا عارف اننا ما معاناش عازف عود دفعنى حب الاستطلاع للإسراع حتى ارى وجهه وكان الفنان عادل مأمون رحمه الله اهلا يا استاذ واحضان وقبلات ( وانا كنت عزفت مع عدة مرات قبلها بثلاث سنوات ) بتعمل ايه هنا ؟ قال انا هنا من سنتين هو احتار ان يعيش فى الدول العربية لإحياء حفلات خاصة للأمراء
بعدها انا تفكرت فى الامر هذا الفنان الكبير بعد وفاة عبد الحليم وفاجعة عبدالوهاب فيه لأن عبد الحليم كان يمثل بالنسبة لعبد الوهاب الاستمرار بالذات بعد ان تفرغ عبد الوهاب للتلحين كان ساعتها ممكن عادل مأمون يعمل شىء جبار ولكنه اختفى عن الانظار فى وقت كان مازال قادراً على العطاء ولكن تشاء الاقدار آسف للإطالة واترككم مع هذا اللحن الجميل

[الألآتى]

أتفق معك بالتأكيد ياأستاذ عادل .. فى كون عادل مأمون فلتة طربية .. ومن القلائل ذوى الإحساس المرهف والصوت المتميز .. وبالفعل كان صوته القريب من عبد الوهاب سبباً مباشراً فى إبتعاده ..

المشاركة الأصلية كتبت بواسطة adel2000masr

ادعيلى يا ابو حسام ربنا يرزقنى بعازف رق يكون من يتوع زمان ويكون هاوى ( مش محترف ) ويكون من اعضاء المنتدى ويكون ساكن قريب من عين شمس

مش شايف إن الشروط دى مجتمعة .. صعبة شوية .. إنت بتصعبها على نفسك ليه ..

ولو فرضنا أنك وجدت هذا العازف الهاوى .. ومن أعضاء المنتدى .. ويسكن أيضاً فى أو قريب من عين شمس ..

أه نسيت شرط مهم .. لازم يكون صايع ومافيش وراه حاجه .. علشان يكون تحت أمرك فى أى وقت تحب تعزف أو تسجل فيه ..

إفرض إن الهفة جت لك .. وحبيت تعزف بالليل أو الصبح بدرى .. حاتجيبه منين العازف ده ..

الحل فى الكمبيوتر ياحبيب قلبى .. بس مشكلتك إنك ماجربتش .. علشان كده .. المسألة صعبة على نفسك .. صدقنى .. أعمالك حاتنتشر أكتر .. لو يصاحبها إيقاع .. مش مهم يكون إيقاع لايف .. إيقاع وخلاص ..

وأنا مستعد أبسط ليك المسألة .. وأساعدك فى الإيقاع بالكمبيوتر .. إتشجع بس .. وخليها على الله وعليا ..