قصيدة "الحراز" دراسات وتحاليل

[بريكسي فريد]

السلام على الجميع
القسم الاخير من قصيدة حراز با حنيني

القسم الخامس

سرت عند الماسخ الكهيب سرت له غادي مثل طبيب * سرت عنده لبلاده يا عقيل * منين قريت علوم سليس باهية * و نفيس من دون ميم دخلت للمدرسة الاولى * و لقاني مديرها مفقه فاللغا و الحروف * قراني ربع سنين حزت سرتفيكة بالحق * و دخلت الكوليج الحفيل قريت فرنسية الباهية * و اللاتينية الراقية و خذيت السوكندير * زدت عليها سنين حزت بالباكالوريا العليا * و الله الفتاح اللي يريد لعبده بالخير * قل من ساعة يفتح له بواب من بعد بقيت كذاك ما حصل لي ملال و لا تعاب * لله الحمد بلا عداد * اللي تعب في صغره يستراح في كبره * قول نجاب * و قريت في علم الطب شي ايام كثير * حتى الدكتورة عندي * و مشيت يا الفاهم لمرصمه تنجول * دقيت عليه خرجت خادم قالت لي سيدي مريض * قلت لها سير قل له هذا طبيب اللي بغاه * خرجت لي فرحانة تقول لي فيك بليزير * قال لك انطري سيلفوبلي * زدت زدت لعنده لمرصمه و نصيبه مشبوح * في بساط يتقطع بالحريق * في الحين نظر فيا و قال يا مسيو بونصوار * قلت له بونصوار في حين قلت له ما لك تويي ملاد * قال وي يا مسيو ميرسي * قلبته من صدره درت صناتة عن ظهره * قال لي قلبني فالراديو * قلبته فيه و قلت له هذي مصرانة فيك زايدة * خصك لوبيراصيون * في الحين نطق هو و قال لي كيسكو تي فو * قلت له صا فا * بنجت في الحين سكرته و تركته في بيت طايح وحده * و دخلت للقصر نصيب غزالي الباهية ترعاني * في الحين قلت لها قومي * رفدت ما يعز عليها و ركبت لا غنا في الطوموبيل * رفيع شكل ميريكاني نبيل * موتور صايل فيه جهد ألف دا الخيل * من العتاق شكل واضح مفهوم * شيفرولي عند اصحاب العقول و حمات الله فجات غمتي * و استغفر الله ما مشيت في صفات * و لا نظرت حراز الا عقلي نخدمه بشطارة * و ننبه العقول اللي هما غافلين * نطلب ملا يسهى و لا ينام * الواحد نعم القديم نعم المنان * دا الجلال و الاحسان ما يواخدني بالنقصان يلطف بيا * خوذ حرازي يا راوي و صول به * في الاوطان من خديم السلطان ما خفى عبد الهادي دا الجليل يغفر لي * و سلام نهيبه للقاريين لامة الاعيان ما نهلت الامزان * على الطلبة و الشرفا اهل الجود و المزية.
مال حراز غزالي ما بغاش عمره يليان * بقلب قاصح صفوان * على غزالي عساس اللي سباتني ثورية


سرتفيكة Certificat
الكوليج Collège
السوكندير Secondaire
بالباكالوريا Baccalauréat
الدكتورة Doctorat
بليزير Plaisir
انطري سيلفوبلي Entrez s’il vous plait
مسيو بونصوار Monsieur bonsoir
وي يا مسيو ميرسي Oui ... Monsieur merci
راديو Radio
كيسكو تي فو Qu’est ce que tu veux
لوبيراصيون Opération
صا فا ça va
الطوموبيل l’automobile
موتور Moteur
شيفرولي Chevrolet