أخطاء نادرة في النص الغنائي

**د.حسن** · #1 28/04/2008, 08h49

اقتباس:

المشاركة الأصلية كتبت بواسطة رضا رشيد

أخى الكريم وبلدياتى .. حسن بك كشك ( الدراويشى )

والأخوة الأفاضل الأعضاء ..

معلش أسمعوا هذاا الملف حتى أخره .. وبعدين أحذفوه ( مافيش مشكلة )

أنا سميته ( أحترت أصدق مين .. وأحترت أكدب مين ) مع الأعتذار للراحلين .. حسين السيد .. ومحمد عبد الوهاب

تحياتى ...

ملف جميل ياأستاذ رضا تسلم إيديك وأذنيك
وينم عن ذكاء وفطنة وإدراك عالى فألف شكر
وبالمناسبة هناك ملفان فى موضوع " كنز إسمه الشرق الأوسط " بهما أخطاء .. وتعليقات رائعة من أ. كمال عبدالرحمن ود. محمود رزق
وهذا هو الرابط
http://www.sama3y.net/forum/showthread.php?t=20256
واليوم أرفع ملفان آخران فى نفس الموضوع
مع تحياتى
ياريت السادة المشرفين ينقلوا الملفين المذكورين إلى هذا الموضوع

**رضا رشيد** · #2 28/04/2008, 20h35

الأخ الفاضل .. دكتور حسن

ألف شكر .. على كلماتك الجميلة .. وأنا أستمعت كذلك للملفات التى رفعتها سيادتك ..

وقرأت التعليقات الرائعة عليها ...

ولى تعليق بسيط على مذيعة ( مولود ) قصدى ( موعود ) ... على ما أعتقد أنها كانت تنتظر حادث سعيد ومن فرحتها بشرت

نفسها بالمولود ..

ومذيع ( قلبى سألته عليك ) وبتسأل ليه علىّ ... كلها أسئلة ... الراجل أحتار يعمل أيه ...

الله يرحم .. الرعيل الأول ... جلال معوض .. حسنى الحديدى .. أحمد فراج ... فهمى عمر ... وغيرهم كتير ..

كانوا عمالقة فعلا ...

تحياتى ...

**د.حسن** · #3 28/04/2008, 23h06

أخى الفاضل أ. رضا رشيد
... تعليق سيادتك على أغنية ( مولود ) فى منتهى الإتقان والظـُرف وعجبنى فعلاً
طب رأى حضرتك إيه فى اللى موش عارف إن أغنية " خليك مع الله واعمل الطيب " هى للفنان محمد الكحلاوى فيقول أنها لأحمد الكحلاوى
والمذيعة التى لا تحفظ كلمات مطلع أغنية " ياما قلبى قال لى لأ " فتقول ( قلت أطاوعه ) بدلاً من ( وانا الاوعه )
للأسف الأخطاء أصبحت متعدده وكما ذكرت سيادتك
رحم الله مذيعونا القدامى الكبار ... وربنا يرحمنا برحمته
مع تحياتى

**رضا رشيد** · #4 29/04/2008, 22h11

الأخ الكريم .. دكتور حسن

سيادتك عندك حق .. ربنا يرحمنا جميعا .. وبمناسبة ( أحمد الكحلاوى ) أنا خايف بكرة تيجى مذيعة ظريفة من أياهم وتقول :

كنتم ثيداتى أنثاتى ثادتى .. مع كصيدة ( الكندول ) ألحان وغناء .. أحمد عبد الوهاب ...

أما مذيعة .. قلت أطاوعه .. الست مش عايزة تزعل قلبها .. ومش عايزة تلاوعه ...

فى المرتين ( طاوعته وأرتاحت .. وريحت قلبها ) وتعبت قلوبنا أحنا ...

معلش يادكتور : حسن ... هانعمل أيه ؟؟؟ .. مافيش قدامنا غير أننا نقول مع المرحوم ( عبد المنعم مدبولى )

يرحم زمان وليالى زمان
تحياتى ....

**رضا رشيد** · #5 29/04/2008, 22h16

أخى وبلدياتى .. أبو على ( الدراويشى )

صدقنى أنا دلوقت ريحت نفسى ... لابقيت أصدق حد .. ولا أكدب حد ..

ومن ساعتها وأنا مرتاح ...

على فكرة يا أبو على .. الأذاعة ملعلعة هنا فى النمسا .. والأسماعيلاوية بيشكروك خاصة .. والمصريين عامة ...

تحياتى ...

**رضا رشيد** · #6 09/05/2008, 21h17

كوكب الشرق ... أم كلثوم

فى أغنية .. أمل حياتى .. الكوبليه الأول فى المقطع الذى تقول فيه :

وقابلت أمانى .. وقابلت الدنيا .. وقابلت الحب

ولكنها قالت : وقابلت أأأأأ .. وسكتت .. وقابلت الحب .. مرتين .. وفى الثالثة صححت .. بعد أن ذكرها أحد أفراد الفرقة

تحياتى ...

**رضا رشيد** · #7 09/05/2008, 21h30

للفنان : فريد الأطرش أغنيك جميلة تقول :

ما أنحرمش العمر منك ياحبيبى ...

قالت المذيعة : أنه غناها فى حفل أقيم يوم 23 أغسطس عام 1978

وقالت المذيعة الثانية : أنه غناها فى حفل عام 1965

حتى الأن مافيش مشكلة .. المشكلة أنى بعد تحميل الملفين على الجهاز .. أتضح أنها نفس الحفلة ..

والدليل الكلمة التى ألقاها الموسيقار الراحل .. قبل أن يبدأ بالغناء .. وقال أنها أغنية جديدة ( أول مرة ) تغنى على المسرح ..

الفرق فى الملفان أن حفلة ( عام 1978 ) مدتها 16 دقيقة والثانية ( 1965 ) مدتها 21 دقيقة ...

المصيبة .. أن الموسيقار الراحل توفى عام 1974 .. فكيف غناها عام 1978 ؟؟؟؟؟؟

صحيح ... أحترت أصدق مين .. وأحترت أكدب مين ..

تحياتى ....

**د.حسن** · #8 10/05/2008, 00h33

اقتباس:

المشاركة الأصلية كتبت بواسطة رضا رشيد

الأخ الكريم .. دكتور حسن

سيادتك عندك حق .. ربنا يرحمنا جميعا .. وبمناسبة ( أحمد الكحلاوى ) أنا خايف بكرة تيجى مذيعة ظريفة من أياهم وتقول :

كنتم ثيداتى أنثاتى ثادتى .. مع كصيدة ( الكندول ) ألحان وغناء .. أحمد عبد الوهاب ...

أخى الغالى أ. رضا رشيد
سيادتك خايف بكرة تيجى مذيعة وتقول ( الكندول )
طب إيه رأى سيادتك أسمعك النهارده ( الكلاميت )
موش ح نستنى بكرة !!

**د.حسن** · #9 10/05/2008, 00h47

... ومذيع داخلى لحفل يقدم هانى شاكر مع الفرقة الماسية بقيادة
الأستاذ الكبير محمد فؤاد حسن
وينقذه مذيع داخلى آخر لتصحيح الإسم بعد أن ضحك الجمهور !!

**د.حسن** · #10 12/05/2008, 01h27

... ومذيع آخر يقول أن حافظ عبدالوهاب شجع عبدالحليم بعد إعتماد الإذاعة له عام 1951 وكان حافظ عبدالوهاب مدير إذاعة الأسكندرية فى ذلك الوقت
علماً بأن إرسال إذاعة الأسكندرية بدأ فى الساعة الثانية يوم الإثنين 26 يوليو1954

كفاية كده مذيعين واللا نكمل !!