الأستاذ / أمين الفل
أولاً: أحييك على موضوعك وعلى اسلوبك الراقى ،،،
ثانيا : شوف بقى يا سيدى انا حكايتى مع الطرب الاصيل جت إزاى ،،،
تقريبا كدة من حوالى 16 سنة ، وكنت لسة فى الصف الثانى الثانوى ، ورغم إن الوالد - ربنا يديله الصحة - سماعى اصيل ولا يطربه إلا التقايل والجامدين قوى ،، أنا كنت غير كدة خالص ،،، لسة شباب بقى وفرفور وفرحان بنفسى وبلبسى وبقصة شعرى اللى كانت بتتغير كل ما الأستاذ الكبير - ده كان من وجهة نظرى أيامها - ( أيام ما كانشى عندى نظر ) - الاستاذ فرو كلاب يغير تسريحة شعره مع كل كلب ( اقصد كليب ) كنت أنا وراه علطول ،،، زى ما يقص اقص ،، يطول اطول ، ع الزيرو يبقى انا under zero علطول ،،، يلبس اللى يلبسه وأخوك وراه ،، يضيق رجل البنطلون ، أضيق ،،، يوسع ،، أوسع ،، يفتح القميص أو يقفل القميص ،،، يشمر كم البدله ويطلع القميص منها ،،، وهكذا ،،،،
وكانت غرفتى - على رأى الوالد الفنان محمد الشوبكى - تشبه أوضة الحلاقين اللى فى بلدنا ،، يعنى إيه ؟ يعنى جدران الغرفة والباب والشبابيك غرقانة صور لمطربين ومطربات الفيديو كلاب ،،،
المهم انا كان اخويا بتعلم العزف على العود وكنت أقعد أحضر معاه الدرس - واللى كان بيعلمه راجل موسيقى جامد قوى من اعضاء فرقة الفنان محمد الشوبكى - وفجأة يا امين يا اخويا لقيتنى انا اللى باستنى ميعاد الدرس عشان اقعد أسمع ،، وشوية بدأت اطلب من الأستاذ بعد الدرس كدة يسمعنا حاجة مثلا أو يقول تقسيمة ،،، وبدأت أتشد للموضوع ،،، قولتله اسمع يا أستاذ/ صلاح ( وده اسمه ) أنا عايز اتعلم عود أنا كمان ،،، قالى بدام محمود ( وده اسم أخويا ) بيتعلم عود ،، يبقى إنت تعزف كمنجة ( كمان يعنى ) ،،، قولتله ماشى ،،،
سألنى سؤال لسه فاكره لغاية دلوقتى : قالى إنت بتسمع مين من الفنانين ؟
قلت بأسمع الاستاذ عمرو دياب ، الأستاذ إيهاب توفيق ، الاستاذة حنان ، الأستاذة سنية شخلع لا مؤاخذة ،،،
قالى مين الناس دى؟ قولتله ناس بتغنى ،،،، قالى بدام بتسمع الناس دى وفاكرهم كدة بيغنوا يبقى عمرك ما هتتعلم ،،،،،
قلتله ليه بس ؟ قالى لازم تنضف ودانك الأول وبعدين تبدا تتعلم إزاى تعزف على الكمان ؟
قلتله ننضفها ،،، أروح للدكتور من بكرة ،،، قالى إنت دكتورك موجود عندى ومعاه الدوا كمان ،،،
قلتله الحقنى بيه ربنا يخليك ،،، قالى علاجك عند الدكتور الكبيرة ام كلثوم وهآديك شريطين تاخدهم ( قصدى تسمعهم ) قبل النوم ،،، يعنى تدخل غرفتك لوحدك وتطفى النور وتشغل الكاسيت وتعيش ،،، وكمان قالى ما لكشى دعوة بالكلمات ،، ممكن متفهمهاش ،،، ركز مع الموسيقى وعيش معاها ومع أداء أم كلثوم ( والشريطين كانوا مضاد حيوى قاتل لكل أنواع الفيروسات اللى كانت فى ودانى ،،، شريطين من صيدلية أم كلثوم : الأطلال ،،،، ورباعيات الخيام ،،، وسمعتهم يا امين يا أخويا مرة واتنين وتلاتة وأربعة وخمسة ،،، وهوب مرة واحد عينيك ما تشوف إلا النور جيت قايم من على السرير ومنور النور ونازل تقطيع فى الصور اللى على الحوائط وأنا بأزعق باعلى صوت : اطلعوا برة ،، سيبونى ،، اله يخرب بيتكم على بيت اللى بيسمعكم ،، بوظتوا ودانى يا أولاد ال.....
ومن يومها يا عم أمين وانا من السماعيين ،،،،
يا رب ما تكونشى زهقت من حكايتى ،،، أصلى بعيد عنك ممل ولما بأفتح بافتح على الرابع
__________________
** هنا فى سماعى وجدت من أحب و ما أحب و ما سأحب **
((( ولكم منى كل الحب )))
*/*/* أحمـــد الشـــوبكـى */*/*
رد: في بيتنـــــــا سماعيون....ما أحلى الذكريات!
العرض الشجري