أعمال من تنفيذ الفنان محمد الآلاتي

**سمعجى** · #1 20/10/2007, 13h18

الله عليك يا عم محمد يا ابو الفن و الجمال
من عزيزة و قمر 14 و الحلو فى الفراندة .. و حتى أسمر ياسمرانى و أنساك و انت عمرى ، إستمتعت بأدائك الحساس
الواعى .. و بالذات ( ولدى ) و ( التليفزيون )
و أرجو أن تأخذ مشروع ( عادل / غازى ) بجدية
و كل سنة و انت طيب

**الألآتى** · #2 21/10/2007, 03h19

حمدلله على السلامة ياأستاذ كمال ..

فينك ياعم من زمان وفين حاجاتك الحلوة ..

أشكرك أخى العزيز على ذوقك وأسلوبك الجميل وكلماتك الرقيقة ..

أما بالنسبة لمشروع الأستاذين عادل وغازى .. الذى أشكرهم على طرحه وأشكر ثقتهم فى شخصى الضعيف .

بصراحة .. الموضوع يحتاج تفكير متعمق .. لأنى لم أفكر يوماً أن أصدر ألبوم لأعمالى المتواضعة .. برغم بعض العروض السابقة ..

لأنى لن أرضى أن يخسر أحدهم أمواله بسببى وخاصة لو كان حبيب مثل الأستاذ عادل ..

كما وأن المسألة تحتاج لحسابات أخرى غير الفن .. فالزمن غير الزمن .. وأذواق المستمعين تغيرت بفعل فاعل ..

عموماً : لكل مقام مقال .. ودع الأمر لوقته ..أشكرك مرة أخرى ..

**غازي الضبع** · #3 21/10/2007, 07h36

أولا .. الموضوع نور بعودة الأديب الكبير الأستاذ كمال عبد الرحمن
ثانيا .. بالنسبة لمشروع توزيعات كبير الآلاتية
إن شاء الله ربنا يسهل وندرس الموضوع كويس
أنا هاكلم أ.عادل وشكلنا كده هانروح نطب على عم محمد ونعمل عليه كابسة
وربنا يقدم ما فيه الخير

**Adel** · #4 21/10/2007, 10h28

عمي محمد حبيب قلبي
انت فين يامعلمي
ان شاء الله نعمل عليك كبسة انا و غازي
ولايهمك موضوع المكسب و الخسارة احنا هنعمل حاجة لمزاجنا
و بعدين احنا ممكن نخلي شرط العضوية بالمنتدي
ان العضو الجديد يشتري مننا شريط

علي فكرة انا واخد الموصوع بجد و معايا تليفون غازي و هكلمه دلوقت ان شاء الله
اخوك عادل

**سمعجى** · #5 21/10/2007, 12h20

و الله واحشنى يا بو حسام

و كلماتك ( كما وأن المسألة تحتاج حسابات أخرى غير الفن )
إستوقفتنى ، فالموضوع إذن يلزمه سلسلة ذهب ( جنزير ) و أنسيال
و بدلة إيطالى حرير ، و قميص فوسكوز واسع ، مع رشة برفان
غرور ، و كام سهرة من بتوع المزاج العالى مع منتجى فن اليومين دول ، و ماتنساش تعمل واجب مع بتوع النقابة علشان التصريح ..
و عليك ( بصك ) وسام سماعى فى خان الخليلى و تعليقه على
الجاكيت ( الموضوع دا حايعمل شغل جامد ) ، و لازم تسمع العيال اللى بيغنوا اليومين دول .. سوسو بؤة و هيثم و تامر و النونو ( من باب العلم بالشىء ) .. و ساعتها يا عم مش حاتلاحق
ع السبُّوبة ..
و لأنك أصيل ، فسوف تخصص جزءا من السبُّوبة لدعم مؤتمر سماعى الأول للأصالة و المعاصرة

منك لله يا بو حسام ..إنت اللى قلت ( حسابات أخرى غير الفن )
و القافية تحكم يا أستاذنا

**سمعجى** · #6 21/10/2007, 12h28

النور نورك ياأستاذ غازى
و على رأيك ( والله زمان )
و أنا عارف إنك ( أدَّها و أدوووود ) و أنك أستاذ فى الأعمال
التنفيذية ، ربنا يخليك لنا و لسماعى بأفكارك المستنيرة و نشاطك
المتألق و وجودك الذى يملأ قلوبنا بمعانى الحب و الأخوَّة

**سمعجى** · #7 21/10/2007, 12h34

الأستاذ عادل
بَدَل ما تعمل عليه كبسة ، إعمل له كبسة ، و ابقى اعزمنى

**هشام سليمان** · #8 01/10/2008, 18h28

استاذنا الفاضل محمدالألاتى يا ريت بفنك وكرمك العالى الكوبليه الثالث من اغنيه اروح لمين اعتقد هو حجاز كار على حد علمى

الضعيف جدا ويا ريت لا اكون ضيف ثقيل عليك

**hanyelwed** · #9 02/10/2008, 21h02

طعامه وتمكن بصراحه خايف عليك من الحسد انا ضيف عليكم جديد بس بحسد نفسى عليكم فى المنتدى دا ربنا يستر عليكم بقى الاستاذ محمد الالاتى كل شغلك هايل

**الألآتى** · #10 03/10/2008, 06h15

اقتباس:

المشاركة الأصلية كتبت بواسطة هشام سليمان

استاذنا الفاضل محمدالألاتى يا ريت بفنك وكرمك العالى الكوبليه الثالث من اغنيه اروح لمين اعتقد هو حجاز كار على حد علمى

الضعيف جدا ويا ريت لا اكون ضيف ثقيل عليك

حاضر ياأستاذ هشام .. من عنيا .. سأعمل بإذن الله على تحضير ماطلبت ..