محمود بيرم التونسي

[Ossama Elkaffash]

الله يكرمك يا عم احمد من اجمل ما كتب بيرم رحمة الله عليه

في بورسعيد السفينة رسيت تفرغ وتملا
والبياعين حوطونا بكارت بوستال وعملة
لكن بوليس المدينة متفوتش من جنبه نملة
يابورسعيد والله حسرة ولسة يا اسكندرية
......
هتف بي هاتف وقال لي انزل ومن غير عزومة
انزل دي ساعة تجلي فيها الشياطين في نومة
انزل ده ربك تملي فوقك وفوق الحكومة
خطيت في ستر المهيمن للبر يا حكمدارية
......
واقول لكم بالصراحة اللي في زماننا قليلة
عشرين سنة في السياحة واشوف مناظر جميلة
ما شفت يا قلبي راحة في دي السنين الطويلة
الا اما شفت العباية واللبدة والجلابية

هذه المقاطع لحنها من سنين طويلة الصديق الفنان الملحن اشرف السركي و سمعتها
منه عام 1976 في الاسكندرية
هل يا ترى سمعها اي صديق
والاهم هل يوجد هذا اللحن الذي كان جميلا فعلا عند اي صديق في سماعي؟؟؟

[احمد الديب]

الشكر ليك يا دكتور اسامة
انت الخير والبركة
الحقيقة
انا كما كنت باعرف أشرف في الثمانينات
أيام ما كان ساكن في أرض اللواء
بس للأسف علاقتي اتقطعت بمصر
من 93 وأنا هنا في الكويت
وكما قال
الشاعر نادي حافظ
في احدى روائعه التي لحنتها له
-*-
سبحان الذي أسرى بروحي
من قرنفلة إلى الصحراء
حيث الظل مضطهد
ونعناع الأحبة
رملة الفقراء
***
ودي من عم بيرم
للشيخ سيد درويش

سيد درويش

من بعد موته بعام طلعت لنا أقوام

حطّوا عليه مَكَدام و قالوا فنُّه قديم
* * *
قديم و سوقه بار و شغل طبله و طار
و شبعانين أدوار و شبعانين تقسيم
* * *
هُوَّ القديم يا قوم يقدم في ليلة و يوم
هو بصل أم توم و لاَّ بلح إبريم
* * *
ده فنه لو ينزاع و ف تسجيلات يتباع
لتصبحوا صياع ما تكسبوش مليم
* * *
أنا عشقت بكام ؟ و نا هويت يا سلام
و منيتي دي غرام أروح معاها غريم
* * *
هو العظيم يا ناس في أرضكم ينداس
و التافه الهلاَّس نشبعه تكريم ؟
* * *
قولوا تخمنا السوق حتى صبح مخنوق
بفننا المسروق من إرث كل يتيم

[unicorn]

من أوائل قصائد بيرم التونسى
قصيدة المجلس البلدى
و يروى أنه كتبها تهكما و سخرية من كثرة الضرائب التى فرضها المجلس البلدى (الذى كان تحت حكم الانجليز) على المواطنين,
و الطريف أن القصيدة انتشرت كالنار فى الهشيم لدرجة أن الانجليز دونوها و بروزوها فى اطار فى مبنى المجلس البلدى نفسه.

المجلس البلدى

قد أوقعَ القلبَ في الأشجانِ والكَمَدِ

هوى حبيبٍ يُدعى المجلس البلدي

أمشي وأكتمُ أنفاسي مخافة َ أنْ

يعدّهـا عاملٌ للمجلسِ البلـدي

ما شَرَّدَ النومَ عن جفني القريحِ سوى

طيف الخيالِ خيال المجلسِ البلدي

إذا الرغيفُ أتى ، فالنصف ُ آكُلُهُ

والنصفُ أتركُه للمجلس البلدي

وإنْ جلستُ فجَيْبِـي لستُ أتركُهُ

خوفَ اللصوصِ وخوفَ المجلسِ البلدي

وما كسوتُ عيالي في الشتاءِ ولا

في الصيفِ إلاَّ كسوتُ المجلسَ البلدي

كَــأنَّ أٌمّي بَلَّ اللهُ تُربتها

أوصَتْ فقالت : أخوك المجلس البلدي

أخشى الزواجَ إذا يوم الزفافِ أتى

أن يَنْبَرِي لعروسي المجلسُ البلدي

ورُبَّمَا وَهَبَ الرحمنُ لي ولداً

في بَطْنِهـا يَدَّعيه المجلس البلدي

وإنْ أقمتُ صلاتي قلتُ مُفتتحاً

اللهُ أكبرُ باسم المجلـس البلــدي

أستغفرُ الله حتى في الصلاةِ غَدَتْ

عِبادتي نصفُها للمجلـس البلـدي؟

يا بائعَ الفجلِ بالمِلِّيـمِ واحدةً

كم للعيالِ وكم للمجلسِ البلدي

[unicorn]

العامل المصرى

ليه امشى حافى ، وانا منبت مراكيبكم
ليه فرشى عريان، وانا منجّد مراتبكم
ليه بيتى خربان ، وانا نجّار دواليبكم
هى كده قسمتى؟ الله يحاسبكم!

ساكنين علالى العتب، وانا اللى بانيها
فارشين مفارش قصب ناسج حواشيها
قانيين سواقى دهب، ونا اللى ادور فيها
يارب ماهوش حسد لكن بعاتبكم

من الصباح للمسا، والمطرقه فيدى(فى ايدى)
صابر على دى الاسا ! حتى نهار عيدى
ابن السبيل انكسى ، واسحب هرابيدى
تتعروا من مشيتى واخجل اخاطبكم

ليه تهدمونى وانا لعزكم بانى
انا اللى فوق جسمكم قطنى وكتانى
عيلتى فى يوم دفنتى مالقيتش اكفانى
حتى الاسيّه وانا راحل وسايبكم؟

[unicorn]

أم هلال

جدع معلم قال
لخالتك ام هلال
شوفي لنا بنت حلال
تكون لطيفة و عال

بنات كتير حلوين
عند اهلهم قاعدين
ما بين طبيخ و عجين
و بختهم بطَّال

عايزها لحم فصوص
مش عود قصب مَمْصوص
و معَرْقبة بعَصْعُوص
و عامله روحها غزال

عايز قوام يتهَز
إن دَزْيتيه ينْدَز
و ف كل مفصل حَز
يفكَّرِك بهلال

عايز نِتايه صحيح
من رُبع شمع تسيح
مهوش بشكل قبيح
لكن بذوق و دلال

عندك بنات جمالات
مقلوظين نِتايات
و دمهم شربات
يِسْكِر نِسا و رجال

اتحققي في الزين
البنت تِرخي العين
دي مهرها ألفين
أحطهم في الحال

أما اللي عاملة سبور
و جدها بِلْفور
و عايزه واد دكتور
خسارة فيها ريال

و لا اللي عاملة إله
و شعرها قصاه
و بأُكسجين صابغاه
دي تِجْلِب الإسهال

و ان جبتي واحده بكِرش
من الحمير ما تغيرش
مانيش واخدها بقرش
و احط فوقها شوال

[علي سيف]

بنت ابراهيم فتح الله راحت المدرسة
يا رب جير العلم من جنس النسا
هي اللي من دون الكل جات متفلسفة
في وسط عيلتها الغبية والغبي
كانت خالتها أخت أمها تاجرة طرح
تخرج تبيعهم في العزا بعد الفرح
ما تخش بيت وصدر أهله ينشرح
من شكلها اللي في شكل سحار مغربي
قالت لست الكل والقول بالعشم
يا بت يا سكينة احسبي لي بالقلم
اللا ما بحسب بدماغي بتلخم
الراجل الأرملي خد مني الشهر ده
أربع طرح في أربع طرح يا مرشدة
بسعر ريال ونص وخمسة صاغ يا للا احسبي
البت من يومها الحساب لم تحسبه
وتحط القلم على لسانها تستكتبه
وترجع الدفتر وترجع تاني تقلبه
قالت خالتها اسخمي لي والنبي
رحتوا المدارس لا أجل قال تتعلمـوا
سيبوا المدارس لللي فيها اتمدنوا
الحسبة دي أحسبها أنا روحي إلعبي
الأم وقتها كانت بتغسل طبـق
وعا لوابــور قدامهـا فرخة بتتسلق
قالتلها البت دي محلوف عليها يمين لأجلكوا لا تقرا ولا تكتبلكوا
وإما تييجي هنا إبقي إتأدبي

[بشير عياد]

الأخ dartanian
تحيّاتنا
في اعتقادي أن هذا الزجل به أخطاء كثيرة ، أي أنك كتبته من ذاكرتك وليس من دواوين الشاعر
فنرجو التأكّد وإعادة الكتابة ، وسنضعها في مكانها الصحيح
مع تحيّاتنا

[علي سيف]

المشاركة الأصلية كتبت بواسطة بشير عياد

الأخ dartanian
تحيّاتنا
في اعتقادي أن هذا الزجل به أخطاء كثيرة ، أي أنك كتبته من ذاكرتك وليس من دواوين الشاعر
فنرجو التأكّد وإعادة الكتابة ، وسنضعها في مكانها الصحيح
مع تحيّاتنا

مشكور على التوضيح وان شاء الله سأبحث عنها كاملة وأقوم برفعها وهذه مقطوعة هاتجن
حاتجن ...!



حاتجن يا ريت ياخوانا مارحتش لندن و لا باريز

دي بلاد تمدين و نضافه و ذوق و لطافه و حاجه تغيظ



مالقيتش جدع متعافي ، و حافي ، و ماشي يقشر خص

و لا شحط مشمرخ افندي معاه عود خلفه و نازل مص

و لا لب اسمر و سوداني و حمص و انزل ياتقزقيز

حاتجن ياريت ياخوانا مارحتش لندن و لا باريز



و لا عركه ف نص الليل دايره بالحيل و ساحبها بوليس

قدامها جدع متجرجر وشه معور قال ده عريس

الخلق ما هي بتتجوز و اشمعنى احنا ما فيش تمييز

حاتجن ياريت ياخوانا مارحتش لندن و لا باريز



و لا واحده ف وش الفجر تبرطع ماليه الدنيا صوات

قال إيه جوز خالتي ام احمد سلفة اخوها السيد مات

سبحانك ما اعظم شأنك و الله الموت دا مفيد و لذيذ

حاتجن ياريت ياخوانا مارحتش لندن و لا باريز



و لا واحد طالع يجري و واحد تاني بيجري وراه

و يقول ها هع حصلتك يابن اللي ابصر إيه عاملاه

لا الشارع غيط ياخوانا و لا احنا بداره و لا احنا معيز

حاتجن ياريت ياخوانا مارحتش لندن و لا باريز



و لا واحد بيبيع حاجه يقول بريال و تاخدها بصاغ

ياخوانا دي حتى الإبره تاخدها بدوشة و قلب دماغ

حلفان و عراك و مناهدة و يمكن ضرب كفوف يا حفيظ

حاتجن ياريت ياخوانا مارحتش لندن و لا باريز



و لا فيش ميت ألف صعيدي بتوع يانصيب هاجمين و لا فيش

ميت ألف معوض داعس جاي معاه صندوق ورنيش

و الله كرهت القهوه و حرمت أقعد ع الأفاريز

حاتجن ياريت ياخوانا مارحتش لندن و لا باريز