Re: قضية إقتباسات عبدالوهاب من الموسيقى الغربيه * للنقاش
كلام جميل يا باشمهندس محمد يعني ببساطة عبد الوهاب يعترف بانه يأخذ من الحان الآخرين
لكن اريد فقط ان اعيد لفت النظر انه كل الناس بتعمل كده في المزيكا (على فكرة كمثال الرحبانية اكبر ناس عملوا كده مش عبد الوهاب)وبتعيد انتاج بعض .وبتحويرات كثيرة احيانا وبتحويرات قليلة احيانا اخرى
واكبردليل على ذلك شغل عمر خيرت دلوقت
لكن خلونا نروح بعيد في عام 2000 نشرت في صفحة تيارات عالمية في جريدة القاهرة وكنت وقتها مشرفا عليها خبرا عن مغني رابر اصبح الآن من اهم المغنين في امريكا اسمه جاي زد وان لحن احدي اغنيات البومه الاخير وقتها كان بالضبط لحن صافيني مرة.
يعني مرة اخرى الموضوع مش مشكلة قوي
الاهم من جاي زد صديقنا عازف القانون المصري الكبير الاستاذ عبد العزيز السنفاوي عمل مع الملحن العالمي الكبير بيتر جابرييل واخبرني ان جابرييل قد اعجب بلحن لعبد الوهاب و آخرللسنباطي واخذهما وضفرهما في شغل الموسيقى التصويرية لفيلم
The last temptation of the christ
والامثلة كثيرة ولن تنتهي
السؤال ليه عبد الوهاب؟
ايضا مسألة ان عبد الوهاب كان مغني السلطة في كل العصور هو ده ياناس عيب؟؟؟
هل المطلوب انه يكون رائد الثورة؟
الموسيقي الفنان ممكن يكون ده او ده ولينا كجمهور متذوق انتاجه الفني
يعني هو راجل موسيقي مش سياسي ولا ثوري
الخلط عندنا احنا وبيضر ونتيجة الخلط المضر ده ضياع عمر واحد من اهم الموسيقيين المعاصرين وهو المرحوم الفنان الشيخ امام عيسى حيث تم تكريسه كمغني ثوري سياسي بينما هو ملحن وموسيقي كبير جدا جدا
يعني في اي حتة الفنان فنه هو الكارت فيزيت بتاعه مش قرابته من علان ولا فلان ولا رأيه السياسي
وكمثال الكاتب الايطالي العظيم جابرائيل دانونزيو كان فاشي و الفيلسوف الالماني الكبير مارتن هيدجر كان نازي
والرسام الاسباني الكبير جدا سلفادور دالي من الكتائب ورجعي ومحافظ وكان فيردي كده وغيرهم وبالطبع معظم الفنانين يميلون وخاصة الموسيقيين منهم الى الوقوف مع السلطة بالرغم من الحانهم واعمالهم قد تكون ثورية جدا ومتجاوزة بزمان عصرها وخاصة لو نظرنا لتعريف الثورية بمنظور مختلف عن المنظور السياسي الضيق
ارجو مكونش ضايقتكم يا اساتذة بالكلام الكتير اللي شكله كبير ده
ومحبتي للجميع
|
العرض الشجري