يا ساعه بالوقت اجرى

[الألآتى]

إشتغل ياخويا إشتغل

إرغى ياعم الأمور

حد ماسك بقك

[mokhtar haider]

اختيار جميل استذ حسن..... انا لي عشرة صغيرة و جميلة مع هذه الأغنية... هي من فيلم ما تقولش لحد أو عايزة اتجوز عملتهما نور الهدى مع فريد الأطرش و الأغنية من ألحانه.... سمعت الأغنية مرة مرتين و انا لسه صغير... إنما كنت مقيم في بلجيكا سنتي 1990-1992 و ما حبيتش البلد دي بصراحة حاسس فيها بالغربة و العزلة... لكن ريحت نفسي لما رأيت محلات فيديو مالكينها إخوان عرب و أعدت منها اكتشافي لجميع الأفلام العربية اللي حبيتها و متذكر حتى عناونها.... و كان أول فيلم أجرت شريطه هو الفيلم اللي تغني فيه نور الهدى الأغنيى هذه... من يومها كنت أؤجر على الأقل 15 فيلم في الاسبوع كانت تخفف علي الاحساس بالغربة و تملي بيتي هناك في عاصمة غربية بأصوات عربية
أخي اللآلاتي.... انا عارفك فنان و قلبك طيب... و انك ما تنساش تعمل لنا كدا وقفة مع صوت نور الهدى و قماشه أو نسيجه إن صح التعبير.... رجاء

[الألآتى]

بمشيئة الله ياعم مختار .. سأعمل جهدى لتحليل الأغنية .. وكذا إلقاء بعض الضوء على صوت نور الهدى ..

بس الأستاذ حسن يقول لنا شوية ذكريات ومعلومات عن الأغنية ..

[حسن كشك]

اولا شكرا لك يا استاذ محمد لتحملنا
ثانيا : والله يا استاذ مختار كنت متأكد ان هذه الاغنية هتعحبك ليه مش عارف فانا لاحظت التألف الروح بينى وبينك فى اختيارات واحاسيس وربما ذكريات حول بعض مثيرات الشجنمن اغانى
اما بخصوص ذكرياتى مع هذه الاغنية يا عم محمد
خد عندك
اولا كلمات الاغنية
يا ساعه بالوقت اجرى
خلى الحبيب ييجى بدرى
ياساعه بالوقت اجرى

فضلت استنى قربه
واخلص اليه فى الغياب
ولما اشوف نفسى جنبه
انسى ليال العذاب
ياساعة

يا ساعه اطوى الزمان
خلينى ابلغ نصيبى
يا ساعه ان الاوان
ما تفرحينى بحبيى
ياساعه

جه بالسلامه ووافانى
والقلب فرحان ورايق
وتمر بيا الثوانى
اعمل حساب الدقايق
ياساعه

اولا انا ما اعرفش كلمات مين
لكن اعرف انها غناء نور الهدى والحان فريد الاطرش
بداية هذه الاغنية عندما اسمعها تذكرنى بمكان معين فى مدينتى
ولا ادرى اسباب هذا الربط بين الاغنية والمكان وهذا منذ زمن طويل ماض
فهناك مكان فى الاسماعيلية فى اخر ترعة الاسماعيلية عند مصبها فى بحيرة التمساح
بجوار كوبرى قديم من ايام الخديوى اسماعيل توجد هناك شجرة ( لبخ ) دقن الباشا كما يقولون
ولهذه الشجره زهور تزهر فى بداية فصل الشتاء تقريبا لها رائحة جميله وخفيفة وراقية وتجعل الجو حول الشجره تفوح منه هذه الرائحة الطيبة
كلما استمع الى هذه الاغنية اجد نفسى بكيانى فى ذلك المكان
والاغنية تحمل لى الامل والرجاء الصعب التحقيق
ولكنها كلها امل اسمعها فأتفائل خيرا من انه ستحدث لى حاجه كويسه اوى
كلمات الاغنية بسيطه وسهلة الفهم
ولكن المقطع الذى فيه الكلمات الاتيه
ياساعه اطوى الزمان
خلينى ابلغ نصيبى
يا ساعه ان الاوان
ما تفريحينى بحبيبى
ياسلام تحس ان صبرك نفد منك وكفايه بقى عاوز اللى اتمنيته يتحقق وهو ليس حبا او حبيبا فقط
ولكن كل الامانى التى طال الصبر فى انتظارها ولم تتحقق
الدور عليك ياعمنا محمد باشا

[حسن كشك]

ايه ياعمنا محمد يا ابوحسام
هى الكلمات المتقاطعه اخدتك مننا والا ايه
والا العزومات خلاص خلصت

[الألآتى]

المشاركة الأصلية كتبت بواسطة sinaiki

ايه ياعمنا محمد يا ابوحسام

هى الكلمات المتقاطعه اخدتك مننا والا ايه

والا العزومات خلاص خلصت

لا ياعم حسن .. لا الكلمات المتقاطعة خدتنى منكم .. ولا العزومات خلصت ..

لكن حكاية الهارد إللى إتمسح ده شاغلانى شوية .. فى البحث عن أصول مشروعاتى وشُغل الناس إللى راح .. وإنت عارف إن عملية التحليل عايزة مزاج رايق .. إن شاء الله أستأنف نشاطى قريباً جداً ..

[حسن كشك]

ربنا يروق بالك يا ابوحسام
اما بخصوص الهارد اللى اتمسح
فدى حاجه شربت انا منها المر مرات عديده
لكن لوكان الهارد سليم يعنى مش تالف يعنى بيشتغل والمعلومات والبيانات هى اللى اتمسحت
ففيه برنامج اسمه جوست او برنامج ريكفرى بيرجعوا البيانات التى حزفت من على الهارد
وفيه ايضا فى الويند برنامج اسمه ( ريستور بوينت ) بيرجع الملفات الممسوحه
ممكن اعطيك البرامج دى تجربها واشرحهالك
اما لوكان الهارد هو اللى باظ تمام ولم يعد يعمل
فا استعوض ربنا فى كل الملفات والبيانات
ولك عندى نصيحه لو كنت عارفها خير وبركه
لو ماكنتش عارفها اتفضل اهى
حدد ملفاتك المهمة وقم بحفظها على اسطوانات ( DVD ) فهى ذات مساحات كبيره حوالى 4.7 جيجا بايت دا اذا كان عندك ( DVD WRITER ) اما لو مكانش عندك فاستخدم ال ( FLASH MEMORE ) ودى لو ما كونتش تعرفها عباره عن حاجه كده شبه ولاعة السجاير وبتشتغل على ( USB ) وبتشيل حوالى 2 جيجا بايت ممكن تحفظ عليها ملفاتك المهمه
ارجو انى اكون ساعدتك وتحت امرك فى اى استفسار