تحليلات الالاتى ـ أبو حسام

**الألآتى** · #1 23/07/2007, 16h05

اللهم صلى على كامل النور ..

إيه الجمهور ده كله .. الواحد حاسس إنه عبد الحليم حافظ .. والناس دى كلها واقفة تهلل له ..

المهم .. نبدأ فى الرد عليكم ..

الأستاذ : هاينز ..

أشكرك حبيبى على كلماتك الرقيقة .. وعلى إدمانك لشخصى المتواضع .. بس إوعى تدمن حاجة تانية .. أحسن كلنا ندخل العمبوكة جماعة ..

**الألآتى** · #2 23/07/2007, 16h25

أما عم غازى .. وكلامه عن التكرار غير الممل فى الأغانى ..

فى الحقيقة لقد كنت أتحدث عن عبد الوهاب المطرب وليس الملحن حين تحدثت عن الإعادات .. فعبد الوهاب بصفته مطرب مخضرم .. إستطاع أن يعيد كل هذه الإعادات دون أن يشعرنا بأى ملل ..

وأنظر لأم كلثوم مثلاً .. حين تعيد بعض الجمل بأى عدد من الإعادات .. لا نشعر بأى ملل .. بل نستزيدها أكثر وأكثر .. بغض النظر هنا عن الملحن .. فأم كلثوم أعادت شطرة ( الموجة تجرى ورا الموجة ) فى أغنية ( فاكر لما كنت جنبى ) إحدى عشرة مرة .. وكل مرة بشكل مختلف .. هل الملحن هو الذى أوحى لها بهذه الإعادات ؟ بالطبع لا .. ولكن لأنها أم كلثوم ..

وهناك فرق بين الإعادات التى يبدعها المطرب على المسرح .. وبين الإعادات المقصودة من الملحن .. ففى أغنية ( فاتت جنبنا ) .. تعمد عبد الوهاب أن يلحن ( حبتها أيوه أنا حبتها ) بأكثر من لحن .. أى ليس لعبد الحليم يد فى هذه الإعادات لأنها ملحنة وليست مرتجلة .. صحيح أن عبد الحليم أبدع فى الأغنية .. ولكنى فقط أحببت أن أبين الفرق بين الجملة الملحنة أكثر من لحن .. أو الجملة المرتجلة ..

وهناك أيضاً مثال واضح لتعمد الملحن أن يقوم بتلحين الجملة بأكثر من لحن ..

إسمعوا أغنية ( مداح القمر ) وبالتحديد الشطرة التى تقول ( قدك المياس ياعمرى .. أيقظ الإحساس فى صدرى ) .. إسمعوها من الكورس .. ستجدونه يؤديها بأكثر من لحن وأكثر من مقام .. الجملة الكلامية واحدة .. ولكن تم تلحينها بأكثر من شكل ..

أما الإرتجال الفورى .. فهذا شئ أخر يعتمد على المطرب فى المقام الأول .

ولمن يريد أن يعرف معنى الإرتجال .. هو الإبداع وليد اللحظة .. هو التأليف الفورى أثناء الغناء .. وقد أبدع فى هذا اللون .. المطرب الشعبى ( محمد طه ) وكذلك ( أبو دراع ) ومطربين الموالد عموماً .. هؤلاء هم ملوك الإرتجال ..

**الألآتى** · #3 23/07/2007, 16h39

أما مدام سامية .. منورة القعدة ..

ياستى إسألى زى مانتى عايزة .. أنا مش تعبان .. لأن القعدة عاجبانى .. جايه على هوايا ..

نتكلم بقى فى سؤالك الظريف بخصوص أسوأ ألحان عبد الوهاب ..

فى الحقيقة .. أننا لو أجرينا إحصاء لكل ملحن .. لوجدنا عدد من ألحانه سيئة .. وهو شخصياً لم يرضى عنها .. والأسباب مختلفة .. حتى عبد الوهاب .. برغم عبقريته .. ولكننا لسنا هنا فى مجال إحصاء .. لأن الأمر يحتاج للعودة للمراجع والإحصاءات ..

ولكن بوجه عام .. يمكننا القول بأن الأعمال السيئة فى أعمال عبد الوهاب تتركز فى المقطوعات الموسيقية وخاصة الراقصة منها .. لأن معظم هذه المقطوعات ألفها عبد الوهاب لزوم أكل العيش .. وإحتياجات السوق .. وأبرز مثال لدينا هى مقطوعة ( قمر 14 ) وهى أخر مقطوعاته الراقصة .. فلقد ألفها خصيصاً للراقصة ( نجوى فؤاد ) ولم تكن على المستوى اللائق بعبد الوهاب .. مثل خطوة حبيبى وعزيزة وحبيبى الأسمر .. وغيرهم من مؤلفاته الراقصة ..

ولكن إذا كنتى مصممة على البحث فى أغوار عبد الوهاب لإصطياد لحن سئ ..

فيمكن القول بأن لحن قصيدة ( هذه ليلتى ) نال من النقد والهجوم مالم تناله أغنية أخرى لعبد الوهاب .. بدعوى أن اللحن راقص .. صحيح أن عبد الوهاب دافع عن لحنه .. بحجة أن كلمات وموضوع القصيدة أوحى له بهذه النغمات الراقصة .. لكنه صالح جمهوره والنقاد .. عندما لحن ( أغداً ألقاك ) فجاء اللحن متوازناً مع الكلمات وحرص عبد الوهاب أن يضفى على القصيدة شئ من الوقار ..

**unicorn** · #4 26/07/2007, 05h36

انا معك فى رأيك استاذ محمد فى انتقاد قصيدة هذه ليلتى
فعلا اللحن برغم روعته إلا انه غير ملائم للقصيدة و ايضا السولوهات الراقصة التى أعطاها للجيتار فى الغنوة أخذ المستمع الى جو غير جو الكلمات.
انا نفسى اسمع كلام سيادتك على غنوة باموت فيها لليمامة ليلى مراد و هى غنوة جواب حبيبى
و المشكلة أنى مش عارف أين أضع طلبى هذا
أفتح بيه موضوع منفرد بعد هذا النظام الجديد ,ولأّ أعمل إيه؟؟؟ و لو فيه دور لاختيار الأغنيات اكتب الطلب ده فين؟؟؟؟

**غازي الضبع** · #5 26/07/2007, 06h00

اقتباس:

المشاركة الأصلية كتبت بواسطة unicorn

انا معك فى رأيك استاذ محمد فى انتقاد قصيدة هذه ليلتى

فعلا اللحن برغم روعته إلا انه غير ملائم للقصيدة و ايضا السولوهات الراقصة التى أعطاها للجيتار فى الغنوة أخذ المستمع الى جو غير جو الكلمات.
انا نفسى اسمع كلام سيادتك على غنوة باموت فيها لليمامة ليلى مراد و هى غنوة جواب حبيبى
و المشكلة أنى مش عارف أين أضع طلبى هذا

أفتح بيه موضوع منفرد بعد هذا النظام الجديد ,ولأّ أعمل إيه؟؟؟ و لو فيه دور لاختيار الأغنيات اكتب الطلب ده فين؟؟؟؟

إزيك يا ابو مندور .. وحشتني يا راجل
يا سيدي .. ضع طلبك عن طريق فتح موضوع جديد باسم الأغنية اللي انت عايزها .. وعليها ورقة دمغة
ولما ييجي عليها الدور هاتلاقيها متنورة بكلام عمنا أبو حسام
لو معاك كارت من عضو مجلس الشعب .. إبقى دبسه في الطلب بتاع الأغنية عشان الدور ييجي عليها بسرعة ..
يا إما إغمس الساعي بورقة بخمسين ..
هاتلاقيها أول أغنية في الطابور ..
ولو إنت واصل قوي وتعرف حد في أمن الدولة .. إرفق الكارت بتاعه .. هاتلاقي أغنيتك لوحدها هنا في المنتدى ، ومافيش حاجة تانية معاها ، وليلى مراد الله يرحمها هي اللي كاتبه التحليل :thumbsdown:

**unicorn** · #6 26/07/2007, 06h25

اقتباس:

المشاركة الأصلية كتبت بواسطة ghazyeldaba

إزيك يا ابو مندور .. وحشتني يا راجل
يا سيدي .. ضع طلبك عن طريق فتح موضوع جديد باسم الأغنية اللي انت عايزها .. وعليها ورقة دمغة
ولما ييجي عليها الدور هاتلاقيها متنورة بكلام عمنا أبو حسام
لو معاك كارت من عضو مجلس الشعب .. إبقى دبسه في الطلب بتاع الأغنية عشان الدور ييجي عليها بسرعة ..
يا إما إغمس الساعي بورقة بخمسين ..
هاتلاقيها أول أغنية في الطابور ..
ولو إنت واصل قوي وتعرف حد في أمن الدولة .. إرفق الكارت بتاعه .. هاتلاقي أغنيتك لوحدها هنا في المنتدى ، ومافيش حاجة تانية معاها ، وليلى مراد الله يرحمها هي اللي كاتبه التحليل :thumbsdown:

أنا عملت زى ماقلتلى يا غازى و مانسيتش طابع الشرطة و غمزت حضرة الصول اللى واقف بحتة بخمسة و برضه قاللى سيب الطلب فى موضوع لوحده و تعالى كمان يومين لغاية البيه المأمور محمد الالاتى ما يرجع من المصيف و يمشيهولك.
يعنى دفعت رشوة و برضة حاستنى زى كل الناس منك لله يا غازى

**zineeddine** · #7 28/07/2007, 17h15

الى Unicorne
الكلمات : تموت الأسد في الغابات جوعا لأية قصيدة هي و من الشاعر و شكرا

**hainz** · #8 29/07/2007, 10h15

اقتباس:

المشاركة الأصلية كتبت بواسطة unicorn

أنا عملت زى ماقلتلى يا غازى و مانسيتش طابع الشرطة و غمزت حضرة الصول اللى واقف بحتة بخمسة و برضه قاللى سيب الطلب فى موضوع لوحده و تعالى كمان يومين لغاية البيه المأمور محمد الالاتى ما يرجع من المصيف و يمشيهولك.
يعنى دفعت رشوة و برضة حاستنى زى كل الناس منك لله يا غازى

خللي بالك يا ابو مندور
انا علشان محطتش طابع شرطة ودمغة
محسبوش ان انا اللي طالب اغنية كل ده كان ليه
متغلطش غلطتي يا ابو مندور

**هشام رضا** · #9 17/05/2009, 21h06

فين رابط الاغنيه اريد التحميل

**الألآتى** · #10 18/05/2009, 00h19

اقتباس:

المشاركة الأصلية كتبت بواسطة هشام رضا

فين رابط الاغنيه اريد التحميل

الأغنية موجودة فى المنتدى ياأخى

إذهب لقسم عبد الوهاب .. وستجدها هناك بإذن الله ..