في قلبي غرام محمد عبد المطلب

[الألآتى]

بسم الله نبدأ تحليل أغنية ( فى قلبى غرام ) ..

حرام عليك ياعم غازى .. إخترت أغنية رهيبة .. فظيعة .. شنيعة .. مريعة .. إيه الجمال ده ..

ياأخى .. أنا سمعت الأغنية دى عشرات المرات .. ولكنى لم أستمتع بها إلا بعد أن تمعنت فيها بغرض تحليلها .. ماهذا اللحن .. عبد العظيم محمد ده ملحن جامد ..

سأحاول تقمص دور أستاذنا عمار الشريعى أثناء تحليل الأغنية .. لأنى من عشاق تحليلاته .. مع الفارق الشديد طبعاً .

نبدأ بالكلمات التى أبدعها الشاعر ( إبراهيم البهلوان ) ..

واضح من الكلمات .. أن العاشق يعيش على ذكرى مضت .. يعيش على أيام المحبوب الجميلة والتى يفتقدها بعد الهجران ..

تقول الكلمات .. فى قلبى غرام مصبرنى على خصامك وطول بعدك .. وأقول أنساك .. يحايلنى ويغلبى كمان ودك ..

هذا هو المذهب .. واضح طبعاً أن العاشق لم يستطع نسيان حبه القديم .. وإن كان يحاول أن يقنعنا بأنه حاول النسيان ( بيتمحك يعنى ) ولكن الحب غلبه ولم يستطع النسيان ..

يقول فى الكوبليه الأول .. فى قلبى غرام يفكرنى بأيام الهوى الحلوة .. وذكرى هواك تسهرنى ويسمعها الفؤاد غنوة ..

مازال العاشق يعيش أيام حبه ولا يستطيع النوم بسبب التفكير فى المحبوب ..

وفى الكوبليه الأخير .. يعاتب المحبوب قائلاً له .. فى قلبى وروحى جاوبتك وهنيتنى وأنا جنبك .. وليه تخدعنى فى حبك وتحرمنى حنان قلبك ..

وعلى هذا المنوال لأخر الأغنية ..

نأتى للحن .. وياله من لحن ..

بدأ الملحن بمقدمة موسيقية قصيرة .. على إيقاع الفوكس تروت .. وإختار مقام الحجاز ليبدأ به لحنه .. وبالتحديد حجاز الرى ( الدرجة الأصلية لمقام الحجاز ) .

ولكنه أنهى المقدمة الموسيقية بمقام نادر الإستعمال .. مقام ( الزنجران ) .. وهو مقام يجمع مابين الحجاز والعجم ..

إذن .. المقدمة الموسيقية تحتوى على مقامين ( الحجاز والزنجران ) ..

ويبدأ بعدها عمنا طلب فى الغناء ..

يبدأ بمقام الحجاز .. ولكنه ينتقل سريعاً لمقام الكرد .. وبالتحديد عند ( على خصامك وطول بعدك ) .. ويعود سريعاً أيضاً للحجاز مرة أخرى .. وينهى المذهب بمقام الزنجران .. ويتغير معنا الإيقاع بالطبع إلى إيقاع ( السنباطى ) وهو إيقاع رباعى الميزان .. ومن فصيلة إيقاع الواحدة أو المصمودى .

ونسمع نفس المقدمة الموسيقية بنفس مقاماتها .. يظهر أنها أعجبت الملحن فقرر أن يكررها مرة أخرى ..

ويغنى عبد المطلب الكوبليه الأول من نفس المقام ( الحجاز ) ولكنه لا يستقر عل الحجاز وإنما يعرج بنا على الزنجران .. ويعود للحجاز فى الشطرة الثانية من الكوبليه .. ويلمس الكرد أثناء عودته مجرد لمس .. ونسمى هذا نحن الموسيقيين ( عُربة )

وينهى الكوبليه بنفس الشكل فى المذهب وبالتحديد عند ( وأقول أنساك يحايلنى ويغلبنى كمان ودك ) ..

وهنا يظهر الكورال .. ليؤدى المذهب تمهيداً للكوبليه الثانى .. الذى ينتقل فيه الملحن لنفس مقام الحجاز ولكن من درجة جديدة .. هى درجة الصول .. ويعود بعدها للحجاز الأصلى بدأً من ( بلون الورد تفرحنى ) .. لينهى الأغنية بنفس المذهب ..

ومما سبق .. يتضح لنا أن جمال الأغنية يكمن فى التنقلات بين المقامات وخاصة أنها مقامات متجاورة .. حتى عندما قرر الملحن الإنتقال لدرجة أخرى فى السلم الموسيقى .. لم يترك مقام الحجاز .. وإنما إستعمله من الدرجة الجديدة ..

ولن أستطيع الكلام عن عبد المطلب .. فإنه عبد المطلب وكفى .. مطرب بجد .. مطرب حساس .. مطرب وخلاص .. ماأقدرش أقول أكتر من كده عنه ..

أتمنى أن يكون تحليلى على قدر من الوعى الموسيقى .. وألا أكون خرفت .. إلا إذا كانت أذنى خانتنى .. وأنا أثق بها على أى حال ..

[غازي الضبع]

المشاركة الأصلية كتبت بواسطة الألآتى

بسم الله نبدأ تحليل أغنية ( فى قلبى غرام ) ..

حرام عليك ياعم غازى .. إخترت أغنية رهيبة .. فظيعة .. شنيعة .. مريعة .. إيه الجمال ده ..

ياأخى .. أنا سمعت الأغنية دى عشرات المرات .. ولكنى لم أستمتع بها إلا بعد أن تمعنت فيها بغرض تحليلها .. ماهذا اللحن .. عبد العظيم محمد ده ملحن جامد ..

وينهى الكوبليه بنفس الشكل فى المذهب وبالتحديد عند ( وأقول أنساك يحايلنى ويغلبنى كمان ودك ) ..

أحسنت يا أستاذ محمد يا آلاتي
ومافيش بعد كده ..
أنا بس ليا تصحيح صغير قوي ..
الظاهر إن حضرتك بتسمع اللازمة على إنها ( وأقول أنساك يحايلنى ويغلبنى كمان ودك ) ..

بس هي في الحقيقة ..( وأقول أنسى .. يحايلني ويغلبني زمان ودك )
والكوبليه الجميل دا أعتقد إن كثير منا مر بمثل هذا الموقف
وهو إن بعد الخصام ما يطول والواحد يوصل لمرحلة متأخرة قوي ، وخلاص دخل في مرحلة اليأس
ويقول لنفسه الحل الوحيد إني أنسى
ييجي زمان الود والمحبة والمواقف الجميلة والأيام السعيدة تحايل فكر الإنسان ، وتغلبه .. فلا يستطيع النسيان .
ولإن الواحد في قلبه غرام عشان كده هو صابر على هذا الخصام ..
فيقول ..

في قلبي غرام .. مصبرني على خصامك وطول بعدك
وأقول أنسى .. يحايلني ويغلبني زمان ودك
في قلبي غرام .. مصبرني

بس تحليل هايل يا كبير الآلاتية :icon_roll

خالص تحياتي وامتناني
غازي

[الألآتى]

هاهاهاها ..

معلش ياعم غازى .. العتب على الودن البايظة .. يمكن علشان أنا مهتم بالموسيقى أكثر .. لم أنتبه لصحة الكلمات ..

شكراً للتصحيح ..

[غازي الضبع]

إيه يا عم محمد يا آلاتي
إيه البخل ده
طب رد العزومة طيب
ولا لسه ماهضمتش من عزومتي

أنا مستنيك ومستني الناس كلها :ras::fish:

تحياتي

[Heather Hamed]

السلام عليكم ورحمة الله وبركاته
استاذ غازي انا بشكر حضرتك كتيييييير جدا و بحييك على الموضوع الجميل ده بجد ما شاء الله عليك
و عايزه اقولك اني سمعت الاغنيه اللي حضرتك عزمتنا عليها و سمعت الكوبليه برضو غلط زي الاستاذ محمد و ده خلى المعنى المقصود مايوصلنيش بس بعد ما حضرتك مشكور صححت الغلط و وضحت معناه انا فعلا حبيت اني اسمع الاغنيه تاني لأن هي فعلا بتعبر عن احساس كل واحد مننا لما بيتبهدل و يحب و مهما أخد قرار بالبعد والنسيان يفتكر ولو كلمه واحده حلوه من الحبيب و يرجع يلاقي نفسه في نفس دائرة الحبيب
اهنيك على الموضوع و اهنيك اكتر على الاغنيه اللي توجع القلب دي :heartpump:heartpump

[غازي الضبع]

المشاركة الأصلية كتبت بواسطة pepo25

السلام عليكم ورحمة الله وبركاته

استاذ غازي انا بشكر حضرتك كتيييييير جدا و بحييك على الموضوع الجميل ده بجد ما شاء الله عليك
و عايزه اقولك اني سمعت الاغنيه اللي حضرتك عزمتنا عليها و سمعت الكوبليه برضو غلط زي الاستاذ محمد و ده خلى المعنى المقصود مايوصلنيش بس بعد ما حضرتك مشكور صححت الغلط و وضحت معناه انا فعلا حبيت اني اسمع الاغنيه تاني لأن هي فعلا بتعبر عن احساس كل واحد مننا لما بيتبهدل و يحب و مهما أخد قرار بالبعد والنسيان يفتكر ولو كلمه واحده حلوه من الحبيب و يرجع يلاقي نفسه في نفس دائرة الحبيب

اهنيك على الموضوع و اهنيك اكتر على الاغنيه اللي توجع القلب دي

أنا اللي باشكرك قوي يا آنسة / مدام Pepo 25
كلام حضرتك جميل قوي
وفعلا عندك حق الكلمات ممكن تكون مش واضحة لكن أول ماتوضح هاتلاقي الصورة والمعنى كله ظهر وظهر جماله ..
وعلى فكرة أحلى حاجة في الأغنية إن كل كلمة فيها معناها " في قلبي غرام "
اللازمة والكوبليهات
ويا سلام على آخر كوبليه فيها اللي بيقول :

بقلبي وروحي جاوبتك
و هنتني و انا جنبك
و ليه تخدعني فى حبك
و تحرمني حنان قلبك
بلون الورد تفرحني
و بعد الشوك ما يجرحني
تداري عينيــــــــــك
يا ريت قلبك ما هناني
ما كانش الهجر خلاني
افكر فيـــــــــــــــك
و اقول أنســــــــــى
يحايلنى و يغلبني
زمان ودك
فى قلبي غرام مصبرني

أقولكم على سر شخصي ..
أنا يا ما بكيت على هذه الأغنية :sad: لإني كنت عايش كل كلمة فيها

تحياتي

يالها من أغنية جميلة ومؤثرة
فعلا تأثرت منها كثيرا
وتحليل الأستاذ الآلاتي جميل جدا

[ايهاب عامر]

السلام عليكم ورحمة اللة وبركاتة

اخى العزيز الاستاذ غازى اسمح لي أن اشاركم فى هذا النقاش الثرى (العزومة الدسمة)دى
وقبل ان اشارك اسمح لى ان ابدى اعجابى الشديد بموضوعاتك بصفة عامة وهذا الموضوع بصفة خاصة فأنا ولحسن حظى طالعت لك اكثر من موضوع فى المنتدى وكلهم ينمو على حس فنى عالى الموضوع جميل بجد والفكرة كمان
الأغنية بالنسبة للمستمع وجبة فنية كاملة ففيها الكلمة واللحن والأداء والتوزيع وفى بعض الأحيان عزف فردى لآلة موسيقية او اكثر
اما عن اغنية طلب فهى جميلة فعلا انا غير متخصص لأحلل ولكنى مستمع احاول ان اعى ما اسمع
اولا الكلمات انا لم اكن اعرف اسم الكاتب لكن ربنا يخلية عمنا
محمد اعطانى المعلومة عارف كفاية بس الكوبلية دة
فى قلبى غرام مصبرنى على خصامك
واقول انسى يحايلنى ويغلبنى زمان ودك
الجماعة دول ياعم غازى كانو بيكتبوا اللى بيحسوا بية يعنى الشاعر من دول يقع فى تجربة شعورية جامدة اوى يقوم مطلع لنا حاجة كبيرة اوى
يعنى مثلا فى قلبى غرام لما تفكر فيها حرف ال فى يدل على التغلل
داخل الشى وكلمة غرام اى انة مغرم لدرجة العشق
شوف بقة كلمةمصبرنى تدل على وقوعة فى مصيبة وهى هذا الخصام يعنى مقطع واحد ممكن يوصلك معانى كثيرة جدا
و تعطى احساس العطف على اشياء قبلها قد تفهم منها مدى النقاش الداخلى بينة وبين نفسة
يحايلنى تدل على اشياء كتير منها التدليل على مدى حزنة لدرجة المحايلة
وايضا تدلعلى مدى اعتزازة بزمان الو د
ويغلبنى مين اللى يقدر يغلب انسان فى هذة الشدة غير حاجة عزيزة علية اوى وهى زمان الود بينة وبين حبيبة
كفاية كدة فى الكلام
اما اللحن بحكم عدم تخصصى كل اللى اقدر اقولة انة عبقرى
وكفاية كلام عمنا محمد الكبير جدا
اما عن طلب انا هقول كلمة واحدة (طلب مطرب ) ودى تشمل كل اللى ممكن اقولة
اخيرا اهنيك على الموضوع ويا ريت على الاقل كل الاسبوع اغنية من الاغانى الجميلة دى
فانا ارى ان فهم اغنية وفهم تحليلها فى االأسبوع افضل من سماع
عشرات الاغانى بدون فهم
وربنا يخللى عمنا محمد الألاتى علشان يفهمنا اللى مش ممكن نفهمة غير لو حد شرحة
انا طولت بس الموضوع جميل جدا

[الألآتى]

يااااه .. ده الموضوع كبر قوى .. يافرحتى ياهنايا ..

خصوصاً إن عمنا الكبير ( مختار حيدر ) مشرّفنا ومشرّف الموضوع .. وفى إنتظار أطروحاته الجميلة ..

وأهلاً وسهلاً طبعاً بحبايبنا وزمايلنا فى التذوق .. الأخت بيبو .. والأخ هوبا .. الذى أعتقد إنه ( إيهاب ) ..

خلاص ياعم غازى .. خلينى أنا بقى للتحليل .. وخليكوا إنتوا لإختيار الأعمال .. كده .. يبقى عدل ..

فى إنتظار ثانى عمل .. وربنا يعينى على التحليل بدون أخطاء موسيقية .. وربنا يستر ..

[mokhtar haider]

فكرة هايلة يا أستاذ غازي.. أنا لي اقتراحات و اختيارات غنائية أطرحها للأخوة و سأرد بالتفصيل بعد يومين 3 حيث أن الموضوع يهمني بجد... مشاغل عائلية لا تترك لي حالا مجالا للمشاركة الجدية... لاكن أنا متابع الموضوع... و بارك الله فيكم