دردشة موسيقية

[غازي الضبع]

أما بالنسبة للتجارب بتاعتي اللي ذكرتها لحضراتكم فهي ممكن تكون كلمة تجربة كبيرة عليها ..
هي بس محاولات سابقة في أكثر من مجال .. وكل هذه المجالات أنا باحبها ويمكن دا اللي خلاني أجرب أعمل زي الحاجة اللي باحبها .. وطبعا لم أنجح في أي منهم ، ودا أمر منطقي لإني ماركزتش في أي حاجة فيهم بل كنت عايز أعمل كل حاجة ، وأبقى بتاع كله . وكانت النتيجة إني لم أنجح في أي حاجة منهم ..
وبالنسبة للغناء .. فأكتر وقت غنيت فيه وأمام جمهور ..
فكان في فرحي ..
ودا طبعا لإني عريس ، وما حدش هايقدر يعترض
أم كتابة الشعر والإلقاء فكانت من زمااااااااااان قوي ، كنت تقريبا في الإعدادية ، وكنت متفوق جدا في إلقاء الشعر ، وكانوا دايما يسقفوا لي بعد ما أقول الشعر في حصة المحفوظات ( على ما أذكر )
ودا خللاني أجرب أألف أي شعر بنفسي ولم تتعدى كتاباتي سوى ثلاثة تجارب.
أما التلحين فكنت مغرم قوي بعبد الوهاب وكان نفسي قوي أعمل أي حاجة زيه ، وبالفعل عملت كذا مقطوعة موسيقية ولحنت كذا شعر من اللي ألفتهم ، ولكن في النهاية كانت النتيجة إن بيطلع لحن شبه ألحان عبد الوهاب بس كوكتيل ، يعني تلاقي حتة من فاتت جنبنا على حتة من نبتدي منين الحكاية على أغدا ألقاك ، وأنا مش داري ، لإن طبعا كل دا متخزن في عقلي اللا واعي ، ولكن بيهيألي إنه من إبداعي الشخصي .
يمكن الحاجة الوحيدة اللي ممكن أكون نجحت فيها إلى حد ما ، هي المنولوجات والتقليد ، واللي كنت متميز قوي أثناء فترة ثانوي بتقليد المدرسين ، وبعدين في الجامعة كنت أقلد الدكاترة ، وزملائي .. دا طبعا بجانب تقليد الفنانين ..
وبعدين أثناء فنترة تجنيدي كنت مشهور قوي بتقليد صف الظباط ، والظباط ..
وكان اللي يقف جنبي في الطابور يبقى نهاره أزرق .. لإنه لازم أجيبله جزاء..
دا غير طبعا بالليل في العنبر ، كان لازم حصة ضحك تنسينا كل تعب النهار .. كنا نقفل العنبر ونطفي النور عشان ماحدش يكدرنا ..
وأذكر في مرة كنت بقلد الصول بتاعنا ، والعنبر كله ميت على نفسه من الضحك
وفجأة دخل الصول الحقيقي العنبر ، وراح قال : انتباه .. انتباه
وكل زمايلي فاكرني أنا اللي باقول وباقلده
حتى واحد منهم راح قايل بصوت عالي ..
إيه ياد يا غازي ، إنت مال صوتك بقى شبه صوته بجد كده ليه
طبعا أنا أدركت الموقف ورحت عامل نفسي نايم ، وراح الصول منور النور ومزعق فينا كلنا : أنا مش قلت انتباه.
كل اللي بيضحك سكت ، واللي نايم صحي ، والكل راح واقف انتباه
راح الصول الله يسامحه : مكدرنا كلنا في طابور ثبات 4 ساعات ، الساعة 12 بالليل لغاية الفجر ، واقفين في عز التلج في شهر يناير ..
وأنا شايف زمايلي كلهم واقفين ناظرين ليا نظرات انتقام ، لإن خلاص فاضل ساعة ونصف عشان نصحى لطابور التمام الصباحي.. وهكذا انتهى التقليد في الجيش نهاية مأساوية

وإلى لقاء آخر إن شاء الله
غازي