دردشة موسيقية

[غازي الضبع]

بعد كل هذه المناجاة
وكل هذا الاستفزاز الفني
وكل هذه المحبة ..
بس خلليكوا فاكرين إن إنتوا اللي عايزين
وأنا نبهت قبل كده ، وقد أعذر من أنذر ..

مضطر أكمل لكم الحكاية ..
بعد أن تقابلت مع مدام عصمت ( الله يمسيها بالخير إذا كانت لسه موجودة ) .. وهي بعد أن سمعتني - يا سامية - بدندن كده أغنية يا تمر حنة لفايزة أحمد مع صاحبي اللي حكيتلكم عليه بتاع الأكورديون بصحبة كام واحد من زملاؤه في الفرقة .. جات واتعرفت عليا وقالتلي : صوتك حلو بس عايز يعلا شوية عن كده ..
قولتلها : ربنا يخليكي دا انا كنت باهزر يعني مش باغني بجد ..
قالتلي : لا والله صوتك فعلا حلو ..
وراحت فاتحة الأورج اللي أمامها .. وقالتلي طب إنت حافظ إيه تاني ..
قلت لها : حافظ كل أغاني عبد الحليم وشوية لطلب وشوية لعبد الوهاب ..
قالتلي : مش حافظ حاجة لمحمد فوزي ..
ضحكت وقولتلها : يعني مش كفاية اللي قولتلك عليهم دول ..
قالتلي : حافظ مال القمر ماله..
قولتلها : آه
راحت عاملة المقدمة بتاعتها على الأورج وقالتلي : سمعني
طبعا قعدت اتنحنح ، واعمل نفسي باسلك في صوتي ، وابتديت .. مال القمر ماله .. ماجيناش على باله ..
وبعد ما خلصت حسيت إنها هاتقولي ماشفش وشك هنا تاني ..
واحتمال تطرد صاحبي دا من الفرقة كمان ..
لكن الحقيقة حصل العكس تماما ..
لقيتها معجبة قوي بصوتي ، وقالتلي طيب تستناني بعد البروفة .. نكمل .. ولا إيه رأيك تخش معانا في البروفة ..
كانوا بيعملوا أغنية قمر له ليالي للأستاذ داوود حسني
قولتلها مش حافظها .. قالتلي أقعد اسمعنا وشوف احنا بنعمل إيه ..
لكني مش عارف ليه حسيت إني مكسوووف فاعتذرت وقولتلها طيب هو أنا أصلي عندي مشوار مهم دلوقتي ، ينفع آجي لحضرتك يوم تاني .. قالتلي مافيش مشكلة .. خلليها بعد يومين .. مستنياك .. إوعى ماتجيش ..
ومشيت وأنا حاسس إني خلاص وصلت ، وباقول في عقل بالي ..
الظاهر إن العندليب هايرجع تاني ..
ورحت قعدت أسمع في أغاني محمد فوزي كلها ..
آه .. نسيت أقوللكم إني سألتها إشمعنى محمد فوزي ..
قالتلي : عايز تتعلم الغنا إسمع محمد فوزي ، وشوف مخارج الكلام منه إزاي ..
قعدت أسمع أغاني فوزي كلها اللي طبعا أنا عارفها وحاببها ، بس المرة دي كان لها طعم تاني خالص ، وحسيت فعلا إن كل الحروف خاجة منه واضحة جدا ، وكل النغمات متقسمة وباينة وواضحة على الآخر ..
وحفظت أغلب أغانيه اللي سمعتها ..
وانتظرت اليومين يعدّوا..
إلى أن جاء اليوم المعهود .. ولبست واتشيكت وشربت يانسون طبعا قبل ماروح .. ومارضيتش أشرب ولا سيجارة ( أيام ما كنت بادخن ) ..
وتوكلت على الله ورحت لمدام عصمت ..

وإلى لقاء آخر إن شاء الله
غازي

[unicorn]

استاذنا / ابو حسام

الله على شرحك البسيط و تحليلك الموسيقى السهل فعلا فى منتهى الجمال يا استاذ محمد
انا كنت بشوف فى الموسيقى الالية قوالب السماعى و اللونجا و البشرف و التحميلة و لا افهم ماذا تعنى هذه المسميات و الان قد عرفنا واحدة و هى التحميلة .
و بالنسبة لمزيكا عزيزة يا استاذ ابو حسام تحليل حضرتك لها هايل و بالذات كلمة (ولا نعتبرها من عبقريات عبد الوهاب لبساطة تنفيذها .. وربما هذا هو سر جمالها ..)
عجبنى اوى تلخيص حضرتك لها فعلا لحنها بسيط جدا و سلس جدا و تألفه الاذن التى تسمعه لاول مرة بسهولة و هذا شأن عبد الوهاب فى معظم الحانه..... السهل الممتنع الذى لا يأتى به سواه.
و اكيد طبعا دى مش احسن الحانه و انما كانت احد الامثلة التى ارويها على عبقرية عبد الوهاب التى هى فى رأيى البساطة الشديدة فى اللحن و صعوبة التنفيذ .
و زى ما قلت لحضرتك على اسماعيل (الذى و عدتنا تكلمنا عنه ) استطيع ان اميز الحانه بسهولة و لا استطيع ان اقول كيف فلا املك قدرة التعبير الموسيقى الرائع الذى تملكه حضرتك لاحترافك بالموسيقى.
اما عن انتظار حضرتك لاحد الاعضاء الموسيقيين ليحمل عنك قليلا كثرة اسئلتنا فأكيد ا/ احمد الديب بيتابع من بعيد و منتظر لحظة ما ليدخل مع حضرتك.
شكرا على سرعة ردك يا استاذ محمد و منتظرين نفاذ وعدك .
نيجى لابلة سامية التى لا تريد ان تشاركنا برأيها برغم تأكدى من حسن ذوقها و سلامة حسها الموسيقى و التى تقول انها ليست متخصصة فى الموسيقى طيب ايه رأيك نقفل الصفحة دى خالص و نقفل المنتدى كمان لان المتخصصين فى الموسيقى امثال ا/ محمد الالاتى وا/ احمد الديب قليلون جدا
ده احنا لسة كنا بنقول حانفتح معهد موسيقى على ما تفرج ....ياعنى شايفانى انا و غازى متخصصين اوى؟؟؟؟ ما احنا عمالين نسأل ا/ محمد و بنحاول نعرف ؟؟؟
هو يمكن يكون الاستاذ غازى اكثر تخصصا و ده حايظهر بعد ما يخلص حكاية المايسترو عصمت....
والله خلتنى اضحك ضحك يا غازى على اسلوبك و طريقة سرد الحكاية و بالذات لما ابتديت تسلك زورك و تتنحنح و تشرب ينسون و عملت الواد المطرب اللى ماحاصلش
و مش عارف ليه جاه على بالى ان المايسترو عصمت دى شبه المطربة اللى فى فيلم دليلة (بتاعت الحلو فى الفراندة شاورلى و بص لى و القلب فى الزمان ده بسرعة بيتملى)
كمل يا غازى الموضوع يزداد سخونة و شديتنا اكتر.......

[unicorn]

نسيت اسأل استاذ محمد الالاتى
اغنية حبيب الروح لليلى مراد الحان السنباطى؟؟؟
هى ينطبق عليها المواصفات التى قلتها حضرتك من حيث ضخامة البداية بكامل طاقة الاوركسترا بس بالنسبة للادليب ما اظنش لان الايقاع فيها شديد و قوى.

[الألآتى]

أهلاً أخى أبو مندور ..

بالنسبة لمطالبتى بإشتراك بعض الأخوة ( موسيقيين وغير موسيقيين ) ليس الهدف منه تخفيف الحمل عنى .. فأنا لن أملّ من أسئلتكم وإستفساراتكم .. فهذا شئ يسعدنى بالتأكيد .. ولكنى أحببت أن يشاركنا الأخوة لزيادة إثراء المناقشات وتكثيف المعلومات .. والأستاذ أحمد الديب ( حبيبى ) .. أتمنى أن ينسلخ قليلاً من مهامة الإشرافية ويشاركنا بمعلوماته الثمينة .. كما لاحظت عدم دخول ومشاركة أساتذتنا المشرفين .. ربما لأن المهام الإشرافية من الثقل بحيث لا تعطيهم وقتاً للمشاركة .. ولكن كلى أمل فى إشتراكهم جميعاً .. فسنسعد بذلك بالتأكيد ..

أما عن سؤالك بخصوص ( حبيب الروح ) فهى للسنباطى ولا شك .. فأسلوبه واضح كل الوضوح .. وأعتقد أن هناك أدليب فى الأغنية وإن كان غير موجود فى الأغنية الموجودة فى المنتدى .. إستمع للأغنية من الفيلم .. وستجد الأدليب ..

وعموماً .. إذا كنت ذكرت من قبل .. أن السنباطى عاشق للأدليب .. فهذا ليس شرطاً أن يكون فى كل أعماله ..

ملحوظة : مازلنا فى إنتظار الأستاذ غازى ليكمل لنا حكايته مع الغناء والأستاذة عصمت ..

[unicorn]

الف شكر يا استاذ محمد
و الله العظيم انا لم اكن اعرف مسبقا ان الاغنية من الحان رياض السنباطى و لكن من وصف حضرتك لاسلوبه وجدته متمثل فى هذه الغنوة.
و دى نتيجة معلومات حضرتك القيمة التى بدأت تؤتى ثمارها معانا يا استاذ محمد .
ما زلنا فى انتظار نفاذ وعد حضرتك....
و الاستاذ غازى اكيد حايكمل قصة مدام عصمت و قصة بداية سطوع نجم جديد فى مصر المحروسة:unsure::band:
بس بجد و بدون تهريج انا بشكر غازى على فتح هذه الصفحة المفيدة فعلا.....

[غازي الضبع]

[

و الاستاذ غازى اكيد حايكمل قصة مدام عصمت و قصة بداية سطوع نجم جديد فى مصر المحروسة

بس بجد و بدون تهريج انا بشكر غازى على فتح هذه الصفحة المفيدة فعلا.....

[/quote]
يابو مندور لا شكر على واجب ، أنا فرحان أكتر منك بوجود هذه الصفحات ، واللي فعلا باعتبرها مفيدة جدا لوجود كبير الآلاتية معانا فيها .. وإن شاء الله الكل يشارك معانا ، هم بس تلاقيهم بيصيفوا ..
أما بالنسبة لتكملة الحكاية بتاعة التجربة الخطيرة ليا في الغناء ، وهي بالمناسبة تعتبر أحد التجارب لأن هناك تجارب أخرى في التمثيل وفي التلحين وفي التأليف وفي العزف وفي إلقاء المنولوجات وتقليد الفنانين ..
وأقولك على سر ..
قرب شوية ..
أنا سجلت 3 شرايط قبل كده .. والله
طبعا مش في استوديو دا كان بس كاسيت نضيف شوية ، وميكسر ، وجهاز صوت كده من اللي بيستخدموه في الـ DJ
ومش عايز أقولك والله حققوا نجاح ساحق ( على مستوى المعارف والأهل والأصدقاء ) ..
وطبعا كان بصحبة صديقي الفنان خريج التربية الموسيقية والذي يلعب عود ، كما أنه ممتاز في الأورج
والأورج بتاعه كان فيه إمكانيات جبارة ولو إن أكيد بقى فيه الأحدث دلوقتي. بس كان الأورج لوحده عامل مهرجان في الشريط وكأن هناك فرقة موسيقية كاملة ، وكورال وناس بتسقف ، وناس بتزغرد .. وخصوصا إن صاحبي كان متمكن قوي من الأورج ..
وفوجئت بعد الموضوع ده ، وكان منذ حوالي 12 سنة إن فيه ناس معرفهمش سمعوا الشريط وعجبهم قوي ..
لدرجة إن أحد الفتيات خدت الشريط ماعرفش منين ، وسمعتوا في مدرستها ، وبقدرة قادر بقى مع كل بنت من زمايلها نسخة من الشريط .. وبقت الـ .... بجلاجل.
والموضوع كبر واتشهرت على حس الشرايط دي شهرة جامدة قوي ، بس بدون ماحد يعرف إن أنا اللي مسجله بصوتي ..
وبصراحة أنا قصدت إني ما ألمحش لأي حاجة جوة الشريط تدل عليا ، عشان مااتعرفشي لو حصل حاجة ..
المهم .. الحوارات كتير والتجارب الفنية أكتر ..
أنا بس عامل عليكو إنتوا مالكوش ذنب ..
خللينا في الدردشة أحسن ..
ودلوقتي هافتح مجال جديد نتناقش فيه ..
عن طريق توجيه سؤال لكبير الآلاتية وطبعا للناس كلها ..
.. لما تيجي الكلمات ..
وييجي الملحن .. والموضوع لسه حبر على ورق ..
بيبص للموضوع إزاي ؟؟
يعني بيعمل إيه ؟
وعلى أي أساس بيختار المقام والحاجات دي ..
ولو هي أغنية طويلة ذات مقطوعات موسيقية داخلية .. ( إنت عمري ، أمل حياتي ، فاتت جنبنا ، أغدا ألقاك ، .... )
بتتعمل الموسيقى الأول ولا اللحن الأول .. ؟
ولا دي مالهاش قواعد ، وبتفرق من ملحن لآخر ..
يعني ..
إيه اللي بيحصل من البداية للنهاية ؟؟

تحياتي
غازي

[الألآتى]

يادهوتىىىىىىىىى .. أنا إللى جبته لنفسى ..

سبنا أساليب الملحنين ودخلنا فى التقيل ..

عموماً إسألوا زى ماإنتم عايزين .. بجد ياجماعة ..

أنا بحب جداً الأسئلة خصوصاً الخاصة بعلم النغم .. لأنى أعتبر العلم ده من عند الله سبحانه وتعالى .. ولابد من نشره .. لأنى مش حاخد العلم ده معايا وأنا ماشى .. لابد من تركه للأخرين .. علشان حد يفتكرنى بالخير ..

وقبل ماأجاوب .. أضم صوتى لأختنا سامية وأخانا أبو مندور .. كمل حكايتك ياعم غازى مع أبله عصمت .. أنا ليا قريب أمين شرطة فى قسم الموسكى .. يعنى كمل أحسن لك ..

نرد فى الأول على سؤال عم غازى .. والخاص بطريقة تلحين الأغنية ..

شوف ياعم غازى .. شوفوا ياجماعة ..

أساليب الملحنين تختلف فى طريقة تلحين الأغنية ..

ساقدم لكم مثالاً لكى تعرفوا طريقة من هذه الطرق ..

عندما قدمت أم كلثوم كلمات أغنية ( حانة الأقدار ) لمحمد الموجى .. ماذا فعل الموجى ؟

وضع خطة لحنية كاملة وبرع فيها .. إسمعوا الأغنية وستعرفون مقصدى ..

الخلاصة : الملحن الذى يحترم نفسه وفنه .. يضع الكلمات أمامه .. ويختار المقام المناسب حسب نوع الكلمات .. حيث أن لكل مقام شخصيته وطبيعته .. فالكلمات الحزينة غير الحماسية غير المرحة غير العاطفية .. ألخ .

ثم يختار الإيقاع الملائم .. هل هو سريع .. هل هو بطئ .. رباعى ، سداسى ، ثلاثى .. ألخ .

ثم يبدأ فى تخيل الجملة اللحنية ليبدأ بها لحنه .. وبعدها ينتقل لجزء أخر .. وهكذا .. حتى ينتهى من لحنه ..

ثم يقوم بوضع الجمل الموسيقية ( اللازمة الموسيقية الأولى ) ثم يضع الجمل الموسيقية للربط بين الكوبليهات ..

وبالطبع يستخدم الملحن آلته الموسيقية المفضلة لعزف الجمل اللحنية .. وعن كيفية حفظ اللحن ..

هناك من يكتب الجملة التى يؤلفها ( إذا كان يكتب النوتة ) وهناك من يسجلها على جهاز كاسيت ..

ثم يأتى دور التنفيذ ..

يأخذ الملحن أغنيته للمدون ( كاتب النوتة فى صورتها النهائية ) .. وإذا كان اللحن موزع .. يكتب نوتة لكل آلة .. وتأتى بعدها مرحلة البروفات مع الفرقة الموسيقية .. ثم التسجيل فى الأستوديو ..

هذه المراحل حاولت تبسيطها جداً دون الدخول فى تفاصيل موسيقية أو تقنية ..

أما الأن .. فى زماننا الهباب ..

فإن عاتق العمل كله يقع على الموزع ( غالباً ) فالملحن يلحن الكلمات فقط .. دون اللزم الموسيقية .. ثم يقوم الموزع بعمل باقى الخطوات .. من وضع الجمل الموسيقية وإختيار الإيقاعات والتنفيذ ..

وغالبية ملحنى اليوم .. يلحنون بطريقة واحدة .. يضع الكلمات أمامه ويدندن بأى لحن يخطر على باله مع التخبيط على أى حاجه ( كرسى ، ترابيزة ، أى حاجه ) ويسجل اللحن ببقه ( فمه ) على كاسيت .. ثم يعطى الكاسيت للموزع .. إللى حايوجع دماغنا بالخبط والرزع إللى إحنا شايفينه دلوقتى ..

ملحوظة : كثير من ملحنى اليوم يلحنون على الجيتار .. وطبعاً الجيتار ليس به ربع تون .. لذا نجد معظم أغانى اليوم من مقام الكرد أو النهاوند .. علشان يريحوا نفسهم .. ربنا يريحنا منهم ..