المسحراتي

[حازم فودة]

المسحراتي
(الحلقات الإذاعية آداء سيد مكاوي وأشعار فؤاد حداد)
(10)
اصحى يا نايم اصحي يا نايم اصحى وحد الدايم .... وقول نويت بكرة إن حييت الشهر صايم والفجر قايم .... اصحى يا نايم وحد الرزاق ... رمضان كريم

مسحراتي في اليالي السماح منأراتي وطبلتي بجناح ... ونغمي يلف القلعة والسيدة والدنيا زي العيلة معيدة ونغمي يلف القنطرة والعريش ... وعشت يوم فرحان بإني أعيش ونغمي يدوب في مصر وفي حبها ست الجمال الأبهة وادحرج الضحكة على الفدادين ... نغم على الجبهة يحيى الجنود يا بدر من رمضان يا نور النبي يا كل أحلام الجدود قربي اصحى يا نايم وحد الرزاق ... رمضان كريم ... يوم عشرة بالحرية والانتصار مصر الأميرة تبشر الأمصار كل الأولاد بيقولوا يحيا الوطن ... وأنا بغني وأقول شرارة بدر طاقة قدر ...
والمشي طبلي والدق على طبلي ... ناس كانوا قبلي قالوا في الأمثال ... الرجل تدب مطرح ما تحب ... وانا صنعتي مسحراتي في البلد جوال .... حبيت ودبيت كما العاشق ليالي طوال ... وكل شبر وحتة من بلدي حتة من كبدي حتة من موال ... أنزلكم في الندى والطل أتنسم ... أنزلكم في الندى والطل أتنسم ... في الضي أضحك لكم في الضلمة أتبسم نغم المحبة بيجمع لما بيقسم ولا أبطل لغنى ولا أبطل التسحير بقلبي طول السنة وبطبلتي موسم اصحى يا نايم اصحي يا نايم اصحى وحد الدايم .... السعي للصوم خير من النوم دي ليالي سمحة نجومها سبحة اصحى يا نايم يا نايم اصحى ... وحد الرزاق ... اصحى يا نايم يا نايم اصحى ... وحد الرزاق....اصحى يا نايم يا نايم اصحى ... وحد الرزاق


الملف الصوتي هنا