طلبات نوتة أ / عادل صموئيل الجزء الثانى

[عادل صموئيل]

المشاركة الأصلية كتبت بواسطة yosri81

أستاذ عادل, أنت مبدع ولك كل تقديري. يا ريت بس تدون الكوبليه السيجاه البلدي الرائع : فضلت أعيش بقلوب الناس... رغم صعوبته لكن ميصعبش عليك. ولك وللقائمين على الموقع الرائع كل الشكر.

اخى العزيز انا حبيت ارد عليك وده طبعا درس مهم للجميع .. مش كل الاغانى ممكن تتدون وحتىلو اتدونت مش ممكن تتعزف واذا اتعزفت حاتطلع شىء مقرف مش زى الاصل السبب العبقرية الزائدة عن ال لازم ... يعنى فيه اجزاء صعبة جدا جدا من اغانى زى اغنية غريب على باب الرجاء وانا بدونها كان ممكن اقف قبل الكوبليه الاخير لأنى لقيته صعب جدا جدا لكن لما ركزت حسيت انه ممكن يتدون .. وعلى فكرة المشكلة مش انه يتدون المشكلة زى ما قلت انى ادونه والاهم يبقى فى متناول العازف يعزفه وانه يطلع حلو زى ما انت سامع الاصل فطبعا لم اتردد للعم هو خد وقت معايا عشان الدقة المتناهية بتاعتى طبعا بس طلع حلو .. وهنا انا بكون فخور انى عملت عمل صعب زى كده ماحدش يقدر يعمله حتى من كتر ما بكون فخور ساعات بكتب هنا انى فخور انى عملت العمل ده ... المهم انا من اهم مشاكلى عشان العدد الرهيب اللى دونته بنسى انا كاتب ايه .. وبرجع للفهرس اللى عامله اخى العزيز هيثهم والفهرس ده اساسى فى الشغل يعنى اى حد بيطلب اغنية برجع اولا للفهرس اتأكد انها مش موودة لأن احيانا كنت بدونها تانى .. لقيت الاغنية .. ياللى كان يشجيك انينى .. لقيت نفسى مدونها من قبل بس توقفت قبل الكوبليه السيكاه البلدى ده زى ما انت قلت ... السبب .. قبل ما تقرأ اللى حاكتبه ارجع للتسجيل وركز اوى اوى اوى فى العزف حتلاقى القانون هو اللى ابتدى الجملة وبعدين الكمنجات لما ردت عليه ردت على استحياء والقانون غطا عليهم وده مش عادى يعنى المفروض الجملة مرة قانون ومرة كمنجات القانون بيخفف والكمنجات بتقول بشدة لماذا الكمنجات قالوا بصوت منخفض جدا والقانون كان بيدارى عليهم .. لن السكة وحشة جدا فى الكمنجات وحشةاوى يعنى مليانة مشاكل وبعدين لما ام كلثوم غنت هنا نتوقف .. العمل ده معمول قبل تداول النوتة الموسيقية فى مصر وكل شغل ام كلثوم لأخر لحطة من حياتها كان سماعى بدون نوتة ... لكن العتمل ده السنباطى حب يعمل شىء خارق .. يعنىماحدش يقدر يعزفه غير محمد عبده صالح .. ويغنيه غير ام كلثوم .. وهنا كانت الكمنجات بتونس معاها لأن ما يقدرش يقول كل اللى بتقوله النقطة الخطيرة ان فى اى جزء من اى سلم يعنى مثلا نغمة دو قبلها سى ناتوريل قبلها سى نصف بيمول قبلها سى بيمول قبلها نغمة لا فىالمنطقة دىكانت ام كلثوم بتغنى نغمات مش موجودة وسط النفمات دى اخترعها السنباطى ومش ممكن تتدون لازم تتعزف سماعى وبالطبع مش اى حد حايعزفها .. المهم لما الاخ العزيز مسكنى من ايدى الى بتوجعنى .. كلمة ماحدش غيرك يقدر يدونها ... حاولت ادونها اكتشفت شىء خطير ان هم قفلوا الى قبلها على نغمة فا واساس المقام دو المفروض ان الكوبليه ده يبدأ دو مى نصف بيمول .. فوجئت بعفريت عتامله السنباطى بادى الكوبليه ب رى بيمول فا نصف دييز قنبلة ذرية هنا المقام مخلوع نازل نصف درجة .. بالطبع ما اقدرش ادونها من دو لأن هى معمولة من رى بيمول دونت سطرين فى نصف يوم وكانت النتيجة فشل ذريع يعنى حيكون فيه المقام 7 بيمول منهم حاجات نصف بيمول يعنى طلع زفت وشىء فظيع وتأكد كلامى ان مش ممكن يتدون يعنى انا متأكد ان ماحدش طول الوقت ده لاحاول يغنى الكوبليه ده ولا يعزفه وان رياض السنباطى وام كلثوم ومحمد عبده صالح جلسوا جلسات طويلة عشان يحفظهم الاختراع ده ومن المكان ده وبكل خبرتى اقول ... الكوبليه ده يتسمع فقط