احبائى
اقدم لكم اغنية من العيار التقيل جدا
رائعة نجاة
وف وسط الطريق ووقفنا
( ودعنا الحبايب )
طبعا زى ماقلت لكم كتير من قبل ان الملحنين العمالقة كان لازم كل اغنية يبقى فيها حاجة جديدة او تميز عن اى اغنية غيرها مش اى حاجة والسلام زى الاغانى الحديثة
هنا بليغ ركز على الايقاع واختلاف السرعات والانتقال المفاجىء من سرعة بطيئة لسرعة اسرع او العكس .. حتلاحظوا ده لنى كاتب السرعات حتلاحظوا ان فرق السرعات كبير
وجدير بالذكر ان تحديد السرعات بالرقم المحدد المكتوب يعنى 100 مثلا او 120 ده بيبقى فى الموسيقى الكلاسيكية فقط محدد جدا جدا يعنى المايسترو من ضمن دراسته او كفاءته كمايسترو انو بيعمل السرعة دى يعنى 160 يعنى 160 على المترونوم .. عندنا مش محددة بالدقة دى يعنى بتبقى حسب شعور او احساس الملحن او اللى يحسو فى البروفات .. يعنى انا كتير جدا وانا بكتب الاقى الجملة اللى انا سامعها 118 مثلا او 126 .. وانا عندى على جهازى اجهزة حساسة جدا بحدد بيها السرعة طبعا مفيش حاجة كده فى الموسيقى الغربية
يعنى 100 ـ 120 ـ 130 وهكذا ... لذلك هنا فيه البروفات الملحن لازم يركز على حاجتين فى منتهى الاهمية والخطورة اول حاجة ضابط الايقاع انو يحفظ احساس الملحن بالسرعات وتغييرها وبالذات لما يكون مباشر بدون مقدمات ... طبعا الكلام اللى بقولوا ده بيحصل مع الملحنين العمالقة .. يعنى الملحنين النص كم ( اللى زى بتوع فيلم الكيف ) مالهمش فى الكلام ده .. وطبعا طالما المحن عملاق بيعمل الحركات دى بالذات فى الفرقة الماسية نظرا لوجود الفلتة حسن انور او مع ام كلثوم نظرا لوجود الفلتات الايقاعية زى ابراهيم عفيفى وحسين معوض وايضا حسن انور احيانا ... لأن لو عازف ايقاع متوسط ممكن يلخبط فى تغيير السرعات دى يعنى ينتقل لسرعة اقل او اسرع ممكن يلخبط الفرقة او بالذات ممكن يضيع المود بتاع المطرب .. يبقى تركيز الملحن قلنا اولا مع عازف الايقاع انو يحفظ اللحن صم ( لأنو طبعا مفيش قدامه نوتة ) التركيز التانى مع احمد فؤاد حسن او محمد عبده صالح مع ام كلثوم .. بالنسبة لمحمد عبده صالح كان بيحفظ النقلات لأن مع ام كلثوم كان مفيش نوتة اما احمد فؤاد حسن كان بيكتب فى النسخة بتاعته السرعات دى .. او بيعمل مصطلحات مع نفسو او علامات للى استوعبه فى البروفات عشان يدى السرعة اولا لأتنين مهمين جدا ضابط الاقاع وعازف الكونترباص الاستاذ عبد الحكم عبد الرحمن ولاحظ ان الدوم بتبقى من الرق والكنترباص مع بعض .. وممكن تختلف المصطلحات دى من مايسترو لآخر حسب الطريقة اللى هو اتعلمها ....
فى اللحن ده بالذات فيه ملحوظة ان تلاحظ ان الجيتار كذا مرة هو اللى بيتزعم الجمل الموسيقية كان لسه عمر خورشيد ماركبش ريع تون للجيتار .. تلاقى الملحن الذكى بيخليه يقول جزء من الجملة اللى مافيهوش ربع تون والفرقة تكمل الباقى
وموضوع استغلال الآلات ده عبقرية وذوق عالى جدا .. يعنى انت لو فى 7 سنين فاضى تمسك شوية اغانى تشوف كل اغنية ايه الجديد اللى فيها او ايه العلامة .. تلاقى مثلا فى اغنية قول لى حاجة فى المقدمة عامل صولو للبونجز .. طبعا كلام ممكن عشر سنين مايخلصش ... الاغنية ممكن فيها شوية صعوبة حاولت اسهلها ماتبقاش اسهل من كده
يعنى فيه تفعيلات حاولت ماتنفعش غير كده لأن لو قمت بتسهيلها الجملة نكهتها حاتتغير
وبالطبع لازم نشتغل شوية سهل على شوية صعب
مع اطيب تحياتى
رد: طلبات نوتة أ / عادل صموئيل الجزء الثانى
العرض الشجري