طلبات نوتة أ / عادل صموئيل الجزء الثانى

[Dr.Fouad]

المشاركة الأصلية كتبت بواسطة Dr.Fouad

بجد تعجز الكلمات عن انها توصف مدى سعادتى برد حضرتك عليا و الله بجد
على فكرة انت قريت كل اللى فى دماغى بس انا نفسي اوضح لحضرتك نقط صغيرة و نتكلم فيها واحدة واحدة
طبعا انا مع حضرتك فى كل الكلام اللى انت بتقوله بالنسبة لموضوع المدرس بس اقولك حضرتك على حاجة انا طول عمرى مبعرفش اتلقى معلومة من حد ..
انا احب جدا جدا استفيد بخبرات لكن شرح لا يعنى كدا انت اديني المفتاح و الباب و سيبني بقى شوية كده من غير ما تشرحلى و انا حفتح و ادجل و اعيش كمان جوه الشقة بس محتاجك بقى تقولى بخبرتك تقولى مكان اوضة النوم فين و اديني فكرة عن التعامل معاها و سيبني برضه و المطبخ عرفنى على اجهزتوا و سيبني برضه و هكذا
كده انت فدتنى كتيرررررر بخبرتك من غير ما تعلمنى حاجة انا اتعلمت بنفسي و ده بقى تمام عكس اللى عمله معايا المدرس
يعنى مبدأيا هو تقريبا مش بيتعامل غير مع اطفال بس و ديه مشكلة كبيرة لما يدخله شب فى الثلاثينات من عمره غير لما يدخله طفل
الموضوع لاقيته استنواف فلوس اكتر منه تعليم مع العلم هو لو طلب فلوس قصاد حاجة مفيدة انا ممكن اديله اللى هو عايزه بس هو قال لا
يعنى هو كان يديني مثلا شكل من اشكال الحروف الموسيقية روند مثلا
و يقولى طبق فى البيت عملى على شوية تمارين من كتاب باير اروحله الجلسة اللى بعديها يقول اعمل التمارين اللى انت عملتها فى البيت اخلص و اروح و اللى بعديها يديني حرف واحد و هكذا
وقتها انا مستخدمتش امكنياتى على الانترنت او فى الكومبيوتر لانى مع المثل اللى بيقول ادي العيش لخبازه ولو اكل نصه بس حسيت انه مش ناوى يديني حاجة من العيش خالص
اشتغلت شوية و بحثت و جبت دروس على ايدي استاذة ودكاترة كبار بس كلهم غرب طبعا ده بما ان احنا العرب مش مهتمين اوى بالمزيكا يعنى و ان كان اهتماننا موجود فابينصب على انك تتعلم معزوفة و شكلها على البيانو ازاى و مش حخوض كتير فى النقطة ديه لان الكلام ده معروف و الدليل ان بعد ما شقلبت الانترنت بمعنى الكلمة ملقيتش غير منتدى سماعى بس هو اللى فيه دروس و الباقى بينقل منه ده لو نقل و طبعا حضرتك على علم بالكلام ده
يعنى من المواقف الغريبة اللى حصلت انى دخلت على منتدى موسيقي و المفروض انه كبير بدون ذكر اسماء لقيتهم بيكتبوا النوتة الموسيقية بالحروف
فا لا دو مى
مى صول سي ري فا
و هكذا فكروني ايام الثانوى العام لما كانوا بينزلوا الــ Novel بتاعت السنة فرانكوا اراب و تلاقى الانجليزي مكتوب مثلا (واتس يور نيم ؟) ههههههههه
المهم ما علينا وصلت الحمد لله للمنتدى هنا و هو فعلا عامر بالخيرات و المحترفين و محدش بيبخل بمعلومة نهائى وده شئ اصيل كا مصريين و الحمد لله
ده بالنسبة لموضوع المدرس و انا مؤمن كل الايمان انه لو استمرت معاه سنة او اكتر حتى مكنش حيديني اكتر من اللى اخدته من الانترنت فى شهر مثلا و الله اعلم .
بالنسبة لموضوع برنامج الــ Word فانا بجد ممتن جدا جدا من حضرتك لسبب انى بقابل كتير عندهم مشكلة كبيرة بالنسبة للناس الكبار يعنى اللى عدوا سن الــ 35 (مش 35 برضه يا عم عادل ولا ايه انهم بيرفضوا حتى التعليم يقولك يا عم ما العيال بيعملوا كل حاجة فمجرد ان حضرتك تحب تتعلم حاجة و تتعلمها و تتقنها خصوصا لو متصلة بالتكنولوجيا فديه حاجة جميلة اوى اوى انا فعلا فرحان بيها و الطريقة اللى حضرتك مشيت بيها فى التعليم ديه نفس طريقتى فى رحلتى مع الكومبيوتر من يوم ما قررت ابدأ دراسته من 16 سنة مثلا ..
لك ان تتخيل بقى ايمها كان اول جهاز اشوف فى حياتى اهدهونى الوالد رحمة الله عليه و كان صخر عندى لحد دلوقتى و مع بداية حبي ليه و بداية تعلمى مكنش فييه ولا كتب ولا حد عنده خبرة علشان اسأله يعنى اساسا كان اللى عندهم اجهزة فى اسكندرية كلها معددودين على الاصابع و مش كلهم بيعرفوا يتعملوا معاه و كنت علشان اجيب كتاب DOS مثلا كان لازم نكلم حد من المعارف فى الخارج علشان يجيبه
النطقة اللى عايز اوضحها لحضرتك و ديه ان شاء الله تقرب وجهات النظر بينا حضرتك كنت عايز تتعلم برنامج الـ Word و الحمد لله احترفته السؤال بقى لو عايز تتعلم تعمل برنامج زى الــ Word حيكون الموضوع شكله ازاى ؟
هنا بقة بقى زي ما بيقولوا نقطة و من اول السطر
كدا احنا بنبتدى نتكلم عن دراسة كومبيوتر بجد لو انت دلوقتى بدات تبحث على الانترنت ازاى اعمل برنامج زى الــ Word
حتلاقى مليون مقال و درس عربي و اجنبي يدلوك على الطريق اللى انت لازم تسلكه علشان فى النهاية توصل ازاى تعمل البرنامج
بغض النظر اذا كان الطريق طويل يعنى سنين مثلا او شهور او ايا كانت المدة المهم انك حتلاقى الدليل
يعنى مثلا :
1- لازم تتعمل لغة برمجة للــ Desktop Applications زى مثلا الــ .NET
2- لازم تعرف يعنى هندسة برمجيات
3- لازم تعرف يعنى ايه Database او قواعد بيانات
4- لازم تعرف يعنى ايه برمجة شيئبة Object Oriented Programming
5- لازم تعرف يعنى ايه UI اللى هى User Interfaces او واجهة المستخدمين اللى حيقدروا يتعملوا منها مع البرنامج ازاى تصممها و بعدين تبرمجها
و هكذا
شوفت انا قولتلك ازاى تعمل برنامج Word ادتيلك المفاتيح افتح بقى انت و اتعلم و عيش
بس انت لقيت حد دلك اهو انا حطيتك على الطريق وانت تكمل برحتك ولو عايز تعرف كل حاجة من دول و ازاى تبدأ تتعلمها اديلك دروس و كتب مالهاش حصر و ممكن كمان اشرحلك حاجات.
تعالى بقى نعكس الكلام على موضوعنا انا عايز اتعلم ازاى ابقى محترف مزيكا
على فكرة انا قولت مزيكا مقولتش ولا اورج ولا بيانو ولا كمان ولا عود ولا الكلام ده كله انا عايز احترف مزيكا اطبقها بقى بالعود بالكمان بالفلوت ان شاء الله حتى بالتشيلو او الهارب ديه بتاعتى
تعالى بقى انا و انت نبحث على الانترنت و نشوف بالعربي ممكن البحث يوصلنا لايه ؟ خالى بالك فى الكومبيوتر ممكن نبحث عربي او انجليزي عادى الاتنين حيوصلونا لنفس الهدف لان الكومبيوتر واحد و لغات البرمجة وحدة و الهندسة البرمجية واحدة فاحنا لو بحثنا بالعربي مش حنستفيد كتير لو بحثنا انجليزي حنستفيدددددد كتير و حنتقن و نحترف احتراف تام من نتائج البحث بتاعتنا و المراجع المتاحة لكن فى المزيكا
احنا هنا مرتبطين بالمزيكا الشرقية فبحثنا منحصر على العربي تعالى بقى نبحث و نشوف النتائج
ها بحثت ؟ طلعت ايه النتائج ؟ ايه رائك بلاش نقول علشان الفضائح ؟ ههههههههههه
ولا حاجة فعلا بالتمام و كمال ولا اى حاجة نهائى طب والحل ؟ حتعلم مزيكا ازاى ؟ نقطة و من اول السطر تانى و هنا بقى انا حنتظر الاجابة منك
على فكرة للتجربة العملية بس ياريت اخونا كلهم يسعدونا كمان ادخل جوجل مرة اكتب
كيف تعزف بيانو
و مرة اكتب
Learn piano
ياريت نقارن و نشوف
و الله انا بحاول و انا فعلا مبتدأ جدا جدا يعنى بالكاد بقرها و ينفزها بصعوبة اوى اوى بس فى الاخر بتتنفذ و انا اتفق مع كلام حضرتك مليون فى المية نها فعلا محتاجة تدريب كبير كبير اوى بس شوية شوية لقيت نفسي بعرف يعنى ايه ميزان يعنى ايه كورد يعنى ايه Tempo و هكذا واحدة واحدة
اما بالنسبة لموضوع السماعى ده فانا معرفش اتدرب عليه ازاى و بيتهيألى انه اصعب من النوتة كتير
والله فعلا ده اللى انا بعمله بالحرف الواحد
بنزل نوت حضرتك و بشغلها ببرنامج اسمه PhotoScore و ببدا اسمعها بس لم بطبعها بروح على الاورج انفزها علاطول من غير ما اقرها الاول وده يمكن بيصعب الموضوع عليا
و فعلا حسيت اوى يعنى ايه لحن صعب و يعنى ايه لحن سهل يعنى مثلا اغنية على رمش عيونها اخدت منى وقت كتير علشان اعزف مقدمتها على عكس مثلا اغنية لسه فاكر اللحن سهل جدا و سلس اوى مقبلتش فيه اي صعوبة و هكذا
انت على راسي من فوق و الله يا استاذ عادل و مش حقولك بقى انا اساعدك و افيدك و الكلام ده انا حقولك بس جربنى
انت تأمرنى امر بس و شوف انا ممكن اساعدك ازاى و اقدملك ايه
على فكرة انا خريج تجارة (مكنش فيه على ايمى هندسة كومبيوتر او علوم كومبيوتر) و معاياد دبلومتين فى الحاسب الالي و ماجستير و شغال مبرمج حر (مش تبع شركة يعنى) و بحاضر فى كذا معهد شهادات دولية و اعتمادات دولية زى شهادات مايكروسوفت و صن و زند و كده
و حرجع و اقولك تانى انا مش حقولك انى حعمل حاجة انا حقولك جربنى بس و حنشوف ..
انا اسف جدا جدا للاطالة بس النقاش مع حضرتك ممتع
وتانى الف مليون شكر لمجهودك الخرافى فى التدوين و الف مليون شكر فى مجهودك للرد على الاستفسارات انا فعلا ممتن جدا من وجودك واحد مثل حضرتك هنا فى المنتدى
تقبل مرورى و شكرا
اخى العزيز
عايز تبقى محترف مزيكا حاول تعزف سماعى اكتر من النوتة
يعنى شوف اسهل جملة انت بتدندنها وحاول تتطلعها وبالتدريج حاتوصل
يعنى محترف المزيكا لازم يعرف سماعى ونوتة والسر الخطير فى الموسيقى الشرقية ان النوتة مكتوبة قدامك لكن 70% بيبقى احساس العازف وده مايجيش غير لما يكون بيعرف سماعى
اما بالنسبة للبرمجة انا قلت لك نزل برنامج انكور واهضمه كويس
البرنامج ده احسن برنامج للتدوين لأنو مصمم بحيث تقدر تعدل فيه براحتك
انا نفسى تفهمه عشان نفسى اخترع فيه حاجة
انا اختلاعت فيه حاجات يعنى اللى صمم البرنامج لو شافها حايتجنن لكن نفسى لو نقدر نخليه يعزف الربع تون يبقى عملنا انجاز بس مش حعرف اتكلم معاك غير لما اول حاجة انك انت تكون عرفت البرنامج ونتكلم
مع اطيب تحياتى ( على فكرة الاخوة الاعضاء اكيد حايترقبوا كلامنا لأن كلهم اكيد نفسهم فى برنامج يكتب الربع تون ... وللعلم البرامج اللى بتكتبه لحد دلوقتى مفيش ولا برنامج منهم اقنعنى

ان شاء الله احاول اعزف سماعى
ز بالنسبة للبرنامج فانا متخصص فى الــ Web Applications بس اوعدك انى حنزله و حبص عليه كويس و اقولك انا حقدر اعمل فيه ايه بالظبط
الف سكر على النصائح الغالية
تقبل مروري و تحياتى