طلبات نوتة

[عادل صموئيل]

احبائى

اقدم لكم اطيب التهانى بحلول عيد الاضحى المبارك

واقدم لكم بهذه المناسبة نوتة

يا رايحين للنبى الغالى

وهى لحن من العيار التقيل جدا وبتثبت فيه ليلى مراد انها مطربة جامدة جدا جدا مش بتاعة اغانى خفيفة فقط

اللحن لما تسمعه تحسه صعب جدا , لكن مكمن الصعوبة فى الاقتدار الكبير اللى غنته ليلى مراد واللى بالطبع مش ممكن حد يقدر يقوله زيها
طبعا اكتر حاجة تعبتنى فى اللحن ده انى حاولت ابسطه , لأن الاداء الاحترافى والعبقرى كتير بخرج عن التدوين الطبيعى او تفهم المدون للجمل , وهنا اللحن لازم يتم تبسيطه وإل لو اتكتب حيكون صعب جدا وفوق مستوى القارىء العادى , وهنا عايز اقول ملحوظة ازلية : ممكن لحن انت تطلبه ويتاخر بيكون محتاج استعداد نفسى , لأن لحن زى ده ما اقدرش اكتبه وخلاص , وللأمانة الفنية , الأخ العزيز نور الصباح منزل التسجيل الصوتى بس ناقص
حاجة خطيرة جدا وهى صولو النايات فى المقدمة وده لأول مرة عزفه كذا ناى مع بعض , وبيمثل جزء مهم جدا فى اللحن , وانا بالطبع للذكرى والتاريخ ما اقدرش اكتب النوتة من غير المقدمة الموسيقية دى , وإلا تكون ناقصة شىء مهم جدا , وبالطبع بحثت عنه لحد م لقيته هنا فى المندى بس على مقطع فيديو من الفلم , واتمنى ان الاخ العزيز نور الصباح اللى لسه زعلان ودايما زعلان يبطل زعل
اتمنى ان تسعدوا بها وكل عام وانتم بخير
مع اطيب تحياتى