تعظيم سلام

**محمد محمدالعقاد** · #1 07/03/2011, 16h39

إهداء إلى أرواح شهداء ثورة 25يناير المصرية

تعظيم سلام

قبل الكلام
تعظيم سلام
وارفع وسام
للطليعة من شبابنا فى الامام
الشباب اللي بوعيه ووحدته
جمع صفوفه وكلمته
وزحف على وسط الميدان
زي الطوفان
لاجل يعلن ثورته
ويهد أركان النظام
تعظيم سلام

للشباب اللى كتب
تاريخ بلدنا من جديد
ولكل ايد
رفعت علمنا .. وهو بيرفرف سعيد
ولشهيد سطر بدمه
إسمه بين الخالدين
علشان ما نصحى من الثُبات
وينتهي عصر السُكات
عصرالفساد والمفسدين
واتولد بين الصفوف
وعلى الكفوف
بكرة وملامحه المبهجة
وشمسه طالعة في الدجى
بتشع نور
وتكون منارة للسفينة
قبل نوات الغرق
وقبل ما يسود الظلام
تعظيم سلام

لشعب مصر وثورته
ولثباته ف وقفته
فى كل انحاء البلاد
لاجل ينزاح الفساد
كان الدواية والقلم
ودمه كان هوه المداد
كتب تاريخ الثورة والعهد الجديد
كسر جدار الخوف بقوة من حديد
والفضل يرجع للشباب
لكل شابه وكل شاب
وثورة الشعب اللى ثاير
من 25 يناير
رغم الضحايا والجراح
رغم الشجن
لكن تهون الروح ويعيش الوطن
ورايته فى أعلى مقام
تعظيم سلام

شعر: محمد العقاد