طـــظ

[محمد محمدالعقاد]

طـــظ

1000طــظ
من طرف اللسان بتبظ
علـــــى دي حيــــاة
وألف آه
ع اللي غاوي يعيشها حظ
وميت ندامة
من هنا ليوم القيامة
ع اللى فاكر
إنه شاطر ولا يقدر
إنه يهرب م المقدر
ولا يلقى طوق نجاة
ألــــف آه ..
على دى حياة
وألف طظ
ف اللى غاوى يعيشها حظ
******
العمر فات
والأمانى إتبخرت والأمنيات
منها اللى مات
واللى إنطوى
صفحة ف كتاب الذكريات
كلها كانت سراب
ف الطفولة والشباب
وف آخر العمر إكتشفت
إن الحياة
ماتساويش ولا حتى طظ
وألف آه
ع اللى غاوى يعيشها حظ
******
كل شئ محسوب عليك
خطوتك
أو نظرتك
أو كلمتك
وكل شئ تجنيه إيديك
والحياة دار إختبار
جايز تعدى
وألف آه م الإنتظار
ع اللى مستني القرار
وألف طظ
ف دى حياة
واللى غاوى يعيشها حظ
******
كل شئ ف الدنيا بختك
حتى أهلك
أمك وأبوك
وأخوك وأختك
كل دول ف الدنيا بختك
أما أولادك وزوجتك
برضو بختك
يبقى إيه بالإختيار
قوللى فين تلقى الرضا
ولا فرصة للفرار
والسلام النفسي عَز
يبقى طظ
ف دى حياة
وألف آه
ع اللى غاوى يعيشها حظ

شعر: محمد العقاد