إلحقونى إتسرقت
أنا هحكيلكوا الحكايه
مـ الأول للنهايه
صحيت الصبح بدرى
لقتنى مش معايا
دورت فى كل حته
حتى فـ جيب الجاكته
ودولابى وفى المرايه
وبرضو مش معايا
يادى النهار
بادئ عكار
وريح معبيه بغبار
أنا مش لاقينى
وأه يا وقعه بنى
مش لاقى حته منى
ولا وشى ولا قفاى
إتسرق منى اللى فاضل
قال وأنا عمال بناضل
بالقصيده
سرقوا أحلامى البعيده
سرقوا كلى
حتى روحى حتى ضلى
رجعونى على الحديده
هاتوا المباحث والنيابه وحققوا
سرقوا أحلام الغلابه
ولسه قاعدين يسرقوا
سرقوا الحروف من غير كسوف
قتلوا الكلام .. حرقوا الدفوف
زرعوا جواى الألم
لكنهم نسيوا القلم
فوق الورق
يبقى مفيش شئ إتسرق
إلحقونى إتسرقت
العرض الشجري