رد: بغداديــــــات
ذكرتني بأيام طفولتي بالكولات من جنت اباوع من الشنشول على ابو العلوجة من يجي بالعكَد ويصيح بعالي صوتة (علوجة يا ولد....علوجة يا ولد) وبنغمة فريدة تلازم الذاكرة ولاتزول منها أبداً... وكنت اتوسل بأمي حتى تنطيني 5 فلوس حتى انزل ركض أشتري بيهة علوجة... وأمي جانت تماطل وتكول لخالتي..."الله ...بأيامنة جان ينطينة عودتين بفلس... هسة العودة بخمس فلوس...شوفي ليوين وصلت الدنية)...ومن أنزل وأنطيه الخمس فلوس لبو العلوجة يحطهة بالصرة ويكَلي (عمو يالون تريد) واني اكلة (عمو.. احمر واصفر واخضر) جان يشيل صينية على راسة بيهة طوس فافون كل طاسة بيهة لون.. وبيدة يشيل شي مثل الكرسي المطبك ينزلة ويحط عليه الصينية ... ويبدي يلفلنة العلوجة على عودة خشب.. لون ورة لون... وينطينياها وإحنة طايرين من الفرح
لو من جان يجي ابو الفرارات لو ابو بيض اللكلك... لو بتّ الجيران اللي كاعدة إباب حوشهم تبيع لجهال الطرف كَركَري.... يابة هاي ايام مترجع
... سلمت أخي العزيز محمد
__________________
إشجم كًطاة البلفلاة من جوعها ترعى العشب ودجاجة العمية الدهر تمّن لكًط ينطيها
التعديل الأخير تم بواسطة : haidarthamer بتاريخ 09/12/2009 الساعة 19h19
|
العرض الشجري