إلى أيامي

[مجدي طه]

رايح عند أيامي

سلامي توصله ليها

دي واحشاني

وحايشاني ظروف إني

أعيش فيها

برغم اني ماليش تاني

سنين في العمر

اقضيها

ورغم القلب شاخ بدري

ورغم جبال على صدري

وباجري لحد

لا أدري

لفين الخطوة واخداني

واناديها

وتوحشني ..

واتحايل أبات مرة

في أحضانها

وترفضني

وتبعدني وتطردني

كإني ما عشت يوم فيها

يقولوا العشرة ما تهونشي

طب اشمعنا ؟؟

انا وايامي عشرتنا

بتنكرها

ولما بشوفها

ضاحكالي

تداري الضحكة عن عيني

تخبيها

وترسم لي بدل منها

سراب ذكرى

وفكره تكره الفرحه

في لون بكره

وانا اكره سنين خوفي

واخليها

مدار اسبح في افلاكه

وأسلاكه تكهربني

فاموت واقف

واتكفن

بلون خوفي

واخبي الدمعه في حروفي

واروح عند اللي فاضل لي

من الدنيا

يقوللي خلاص

لا ناس تسمع

ولا أيام ولا فرحة

عينين سارحة وبال شارد

وفارد ع السنين توبك

ومكتوبك تموت خايف

لا عارف تحضن ايامك

ولا الأيام بتشتاق لك