الحـصــــــان

**ناصر دويدار** · #1 09/08/2009, 15h54

الحصان

طلقة رصاص

يمكن تكون رحمة00
يمكن تكون الخلاص

من نظرة الشفقة

يمكن يكون المشهد

الأخرانى حـزيــن
لكن أكيد

أنها 00
أختصار

للسنيين الجاية المرعبة
طلقة رصاص
هى أكيد رحمة

ما تبصش على وقفة الدبان

فوق عين الحصان

وهو متمدد فى بركة وحل
ماتبصش لجلده المكرمش
وديله اللى كنا بنحلف

بطوله وجماله وحلاوته
فى شعر البنات الجُمال
وكبرياء رقابته

اللى دايس عليها الجراد
وما تستغربش نومته
ف عرض البلاد
ده كان زمان

فرس النبى

والصحاب

وياما ضهره شال بلاد
وحط فى بلاد
وعمّر بلاد

وهاجم لصوص

وغيّر خرايط

وحافره ده فجر زمان
بحور الايمان

الأمان
الحنان
وكان له زمان
عشيرة وأهل

عمومة وخلان
وكان له عيال

تسد الشموس
وكان له صهيل
يهد الجبال
ده كان

ســيـــدنا الـحُصــــان
ما تسغربوش

ف نومته

دى صورته

فى أول سباق للخيول

فى أول طريق الحياة
دى صورته

رقبته
وفخده
حوافره
سنانه

دماغه
وطوله
وعرضه
ونظرة عيونه البعيدة
وهى بتلمع
دى صورته
وأخر السباق

وصله لوحده

مفيش حد جنبه
ده كاس الوصول
بيلمع فى أيده
ف أخر السباق
صحيح أن نومته

تحزن

تكدر
تيأس
تحطم
تكسر

تدغدغ
وتسحل

لكين الحقيقة

بأن الرصاصة

له رحمة

وأن الرصاصة أختصار
السنين اللى جاية
السنين اللى ترعب

سنين المعيز
الحمير
الكلاب

ماهياش سنين الحصان0