أنا ماوعَدْتِكِيش بالحب
و لا لِيكى مكان فى القلب
و لو وَهْمِك فى يوم خَدَعِك
ما ينفَعْشِ إنى أشيل الذنب
***
وعطفى عليكى ترْجِمتِيه
بإحساسك
و كان نِفْسِك فى يوم
تسقينى من كاسك
و أنا ...
لحنك ما يِطْرِبْنيش
و مهما هَاعِيش
ماتِكْتِبِنِيش فى كرَّاسك
***
أنا مِشْ قِصة
تحكيها لسُمَّارك
و لا نجمة
تِحِب تْلِفْ فى مدارك
و مش هاقْدَر أكون
لحن الشجَّن و الشوق
و لا دمعة كَمان يشكى
لمِزْمَارِكْ
***
ماكُنتش يوم
أحب أكون كده قاسى
و لا مشرط طبيب جارح
ولا ناسى
و يمكن أكون
بَحِب الخير لِعُشَّاقى
لكن ماقدرش
أخون بالعطف إحساسى
***
ما تظلِمِنيش
عشان يُصْدُق فى يوم ظنك
ماتدفَعِنِيش
فى يوم إنى أقول عنك
كلام يمكن يكون مظبوط
ماهوش مغلوط
لكن لو قلته
راح يِنْقِص كتير منك
***
أنا باقى
على ذكرى الهوى الكذَّاب
و فاتح قلبى
ماقفلتش فى يوم الباب
و أيه يمنع
لو العشق اللى تتمنيه
بقى صفحة
وطويناها
و عِشْنا صحاب؟
__________________
دى فضفضة من قلم رغم الألم ... حسَّاس
مهموم بِهَمْ الناس
يمكن تضيئ كلمته ... العقل جوة الراس
أنا باقى
العرض الشجري