المطرب
سهران طول الليل ...ياريته في مصنع
ولاّ على قشلاق .....ولاّ على مدفع
***
من البكا يا ناس ...اتورمت عينه
ياريت على عرضه ..ولاّ على دينه
***
ويقول لمحبوبه ...ارحمني يا ظالم
ولا حب ولا حاجه ..وربّنا العالم
***
طول النهار شاكي ..وفي السحر باكي
يا شكوة المحروق ..ياما سمعناكي
***
جايبينه يطربنا ..يا ست يا إذاعة
ليه بس يكربنا ..ساعة ورا ساعة
***
أنغام عليها ننام .. من بعد ما قمنا
متبطنة بكلام ..و آهات تألمنا
***
تقول لي يا فلان ...راضي ، بتسمعها
أقول لك الجيران ...في الراديو ترفعها
***
والقهوجي المجنون ...دمر لي أعصابي
بيني وبينه ميل والصوت على بابي
***
وبعت للكركون ...خمسين جواب رسمي
وبدال مايتخالف ..دلوه على إسمي
بيرم التونسي
رد: محمود بيرم التونسي
العرض الشجري