صباح ميت

[صفوان عدرة]

وهذه قصة اخرى...... باللهجه السوريه أرجو أن تنال رضاكم


مانك رجال لو انك رجال كنت حطيت كل واحد عند حدوده يعني كيف بدي قلك اول شي معلمك بالدوام اللي ما بيلحق يشوف خلقتك حتى يبلش سنفونية الغلط و التحشيك وأنت مثل البليد واقف قدامو بتهز براسك أمرك سيدي حاضر سيدي أي الله لايحضرلك الخير شو انك جحش العمى ضربك قلو كلمة بس قلو مابسمحلك قلو أي شي بس ما توقف مثل الحمار قدامو .....هادا واحدتاني شي رفقاتك بالمكتب الشاطر بيقعد بيتمسخر عليك وببتهكمك وبيكومولك المعاملات شي إلك وشي مو إلك وانت ساكت بتشتغل العمى شو هالخنوع اللي عندك انتفض يا اخي حط كل واحد عند حدو قبل ما تسألني كيف رح قلك فوت ع مكتبك الصبح كش بوجه الكل لا تقول صباح الخير وقبل حدا ما يفتح تمو قلون ولا واحد ياكل معي هوا واضروب الباب وادخول وأي معاملة مو إلك اضربها بخلقة صاحبها .....شفت كيف.

هاي محاولة بس اللي ناطرك بالبيت أدهى وأدق رقبة بس مرتك تفتحلك باب البيت وأنت بتكون هلكان من الجوع والتعب بتقابلك ست الحسن والدلال وبتقلك الله لا كان جاب الغلا شرفت يا روحي ولك حط براسك شوية دم واتركلي شي ميت ليرة لاشتريلك سم الهاري الليجعلو سرطان يدخل على قلبك وبس ترد عليها وبتقلا شبك يا مراااا

حتى تنتفض عليك وتقلك :شي يشويك العمى اطلاع جبلنا شوية خضرا وأنت بتروح بتجيب من تم ساكت مع انك هلكان وبتدخل محل الخضرجي حتى بيزورك زوره ماكنه وبيصيح بوجهك نعم شو بدك خلصني أكيد بدك تاخد بالدين شحادين وبدكون تاكلو بتقلو للخضرجه يا أبو صبحي مو عم ندفعلك كل أول شهر بيرد بوجهك بوقاحه شو عبتدفعلي ياروحي بتدفعلي ألف ليره وبتدين بعشره خلصني من خلقتك خود اللي بدك ياه وروح من هون ... وبعد ما تجيب الغراض بتقلا ساويلنا شوية أكل جوعان بترد عليك وبتقلك أي جعلك تاكل هم قلبي روح اطفاح شوية زعتر وهيك بتمضي نهارك بالنقار ع اعطيت فلان دينتو وو وبدي الف ليرة لنظمي منشان الكتب والمدرسة وبدي وبدي لحتى تنام ....وانت مقهور وأعصابك تلفانة وراسك مليان ........

العمى شو صايرلك حط حد لهل المراة طلقها يا اخي اضربا أعملك حركه ....

أي ولله بدي صير رجال هالمرة ما عاد فيني أتحمل .............

في الشارع الكبير سمع صوت فرامل سيارة قوي وصوت اصطدام دوي ورجل واقع على الأرض يلفظ أنفاسه الأخيرة وسمعت تمتمات منه يقول العمى بعد ما قررت صير رجال اخدتني حتى أنت يا اللـ ..........................