عصفور الصفصاف
ارضك .....ارضك
وارض الغير مش ارضك
وبييـــتك .....بييـــتك
وبيت الغير مش بيتكك
مهما طال أغيابك
قاعد ومليك الخوف
لانك ضيف
كان ياما كان
كان عندنا بستان
مليان شجر اخضر
ولكل شجر سكان
فى الصفصاف تحب تعيش العصافير
والقمرى يحب النخل العالى
وابو قردان يسكن جنب الزرع
زيه زى الفلاح
وفى يوم شالوا الصفصافه
ولان مافيش صفصاف غيرها
ماتت عصافير
وحلفت عصافير ما تسيب مكان الصفصافه
سكنوا شقوق الحيط
وطارت عصافير
سكنت اشجار تانى غير الصفصاف
لكن ارضك ارضك
وارض الغير مش ارضك
وبيتك بيتك
وبيت الغير مش بيتك
ولان العصافير انواع
نوع أكلين شاربين ناسين
ونوع حاسس بالغربه
ولانه واخد ع الغربه
طول عمره ما داق
احلى من المر
اتولدت عصافير
وكبرت عصافير
اكترهم احساس بالغربه
اللى اتولد وعاش
مالاقاش زى باقى الطير
ارض وبيت
وفى يوم......
والعصفوره بتزقق فرخ صغير
قبل ما تبلع
داقت فى البذره طعم الوطن المهجور
مسكتها بمنقارها
هزت جنحاتها
جرت رجيليها
لحد مكان الصفصافه
رمت البذره
وبدم العصفره المجروحه
أرتوت البذره
طلعت نبت اخضر
اخضر لون الوطن المهجور
ياطير الارض المهجوره
بص على العصفوره ولا تخاف
واعرف ان الموت اصناف
وكونك ميت ميت
يبقى اختار موتك بيدك
بيدك خلى يوم موتك
عيدك عيدك
عصفور الصفصاف ـ شعر لصبره ابو حسن
العرض الشجري