رأيى الغلبان فى مسلسل اسمهان

[صوت الموسيقى]

المشاركة الأصلية كتبت بواسطة wanderer007

اولا انا شدنى عنوان الموضوع لما عرفت انه عن مسلسل
اسمهان وده لانه عجبنى قوى
بس انا لاقيت النقض الفنى ضعيف جدا
خصوصا انى لاقيت ناس بتقارن الطول و عرض الكتف وحاجات شكليه عقيمه ونسيوا الفكرة نفسها
يعنى انا ماينفعش اقارن جسم سلاف بجسم اسمهان لان دى انسانه ودى انسانه تانيه
اما بالنسبه ل دور فؤاد الاطرش فهو مقنع جدا خصوصا ان انا شفت زيه
وبعدين انتوا معطردين على اسلوب فؤاد فى المعامله وقلتوا مش معقول يكون بالسذاجه دى طيب وليه لاء هو يعنى انتوا عشتوا معاه وعارفينه كويس

ثم كل الممثلين الى مثلوا ادوار زى ام كلثوم وحليم والسادات مكانوش 100*100 طبق الاصل الشخصيه وبالذات صابرين لان ام كلثوم لما شفتها فى الكام حوار اللى عملته فى التليفزيون كانت بسيطه جدا جدا مش زى صابرين وكذلك السادات , كان احمد ذكى ضايف حاجات فى تعبيرات وشه زياده شويه عن الواقع
خلاصه الكلام المسلسل رائع وبعدين انا مستغرب قوى ان انتوا بتنقضوا المسلسل وهو لسه مخلصش


اتمنى انو محدش يزعل من صراحتى خصوصا ان الكل هايعترض على كلامى

اخى الكريم...

محدش قال ان الممثلين لازم يكونوا بالظبط هم هم نفس الشخصيات الاصلية.... بس احنا بنتكلم عن المحصلة النهائية...ف الاخر انت مصدق ولا مش مصدق...

سيبك من مثال احمد زكى و صابرين.... خلينا ناخد مثال تانى خاااااااااااااااااااااااااااااااااااااااالص... ريا و سكينة...
ايوه ريا و سكينة....!!!!!! اهو دول مالهمش اصول معروفة و محفوظة نقارن بيها... لكن الاداء و الاحساس او زى ما بيقولوا لغة الجسدbody language انت كنت مصدق تماما ان دول ريا و سكينة ونسيت شخوص الممثلين الحقيقية و خصوصا الرائعة عبلة كامل...

ضيف على كده ان المسلسل ورانا و عيشنا (حط تحت عيشنا الف خط) كل الظروف و الملابسات اللى وصلتهم لكده... وده نفس اللى ممكن يتقال عن مسلسل الملك فاروق زى ما سبق وقلنا.... مسلسل اسمهان ورانا ظروف نشأتها لكن ما عيشناش...ما حسسناش... وبالتالى مقدرناش نتعاطف معاها فى حين ان كل الكتب و المراجع اللى تناولت حياتها اظهرت قد ايه نشأتها المتخبطة بين الفقر و الامارة و افتقادها الشعور بالامان طول عمرها هو اللى وصلها لكده...المسلسل عرض الكلام ده لكن معرفش يوصله لقلوبنا... و الفرق بين العرض و التوصيل كبييييييييييييييييييير جدا

موضوع فؤاد وسذاجته....محدش يا سيدى عاش معاه ولا عرفه زى ما حضرتك بتقول...الكلام كله من وجهة نظر قواعد علم النفس المعروفة ومن وجهة نظر كل الكتب اللى أرخت لحياة اسمهان و فريد... وده يؤكد ان ممدوح الاطرش مكانش محايد...اما حكاية ان المسلسل لسه مخلصش فاللى اتعرض لحد دلوقتى منه كافى لتكوين حكم و لو مبدئى عليه... و بعدين ياعم ما الجرايد و المجلات كلها عمالة تنقد و المسلسلات لسه شغالة ولا عشان ما انا على قد حالى يعنى...

همسة صغيرة اخيرة يا اخى الكريم و ما فيناش من زعل : النقد بالدال و ليس بالضاد... و معترضين و ليس معطردين.....معلش اصل اخوك مدمن فصحى