الرتوش الأخيرة فى لوحة الخيل و البحر

[سمعجى]

حبيبي عصفور طاير ..

ممكن تديني عنوان الشجرة ( محل الإقامة ) ..
}و لاَّ عشك فوق سحابة ؟! .. كلنا عصفور .. و غابة .. {
جات معايا موزونة بظروفها .. كمل إنت بقى يا عم ..

يا سلام يا عصفور .. دا نا مشهور و مش واخد بالي .. كيف تحصلتَ
على هذا المعجم ؟! ..
ذكرتني بالزمن الجميل يا أخي ( كان الواحد لسة شفايفه حمرا ) .. و كنت قايم نايم بالزفت اللي إسمه الشِعر ده ..

بس كنت فرحان جدا ً لأن اللجنة ( الفخيمة ) التي انعقدت لعدة سنوات ،
و أذكر منها د.جابر عصفور ، فاروق شوشة ، د.محمود مكي، فيصل السعد ....إعتبرتني واحدا من أهم الشعراء العرب ( الأحياء ) في القرن العشرين .. شفت الهنا اللي انا فيه !

و يا سلام بقى لما لقيت معايا في المُعجم الفخيم أسماء ( تخـُض العفريت ) ..نزار قباني ..جورج جرداق .. نازك الملائكة..محمد مهدي الجواهري ..
سعيد عقل .. محمود درويش .. محمد الفيتوري .. عبد الله البردوني ..
غازي القصيبي .. ممدوح عدوان .. حسن طلب .. عبد العزيز المقالح.. بلند الحيدري ..عبد الوهاب البياتي .. الهادي آدم .. عبد الله الفيصل .. أحمد عبد المعطي حجازي ..فدوى طوقان .. سعدي يوسف .. عفيفي مطر ..
و أسماء أخرى كثيرة لناس صعاليك زى حالاتي ..

و يبدو أن اللجنة كانت ترصد ما ينشر من قصائد في الإصدارات المتخصصة في الأدب ، مثل مجلة إبداع ، و الشِعر ، و المجلة العربية ، و الحرس الوطني السعودي .. و عند إصدار المعجم ، عملوا حفلة كبيرة حضرها ( كـُبارات البلد ) في مكتبة القاهرة في الزمالك .. و كان وزير الثقافة ( ذات نفسه ) هو اللي بيوزع المعجم علي من وقع عليهم الإختيارمن مصر المحروسة

و كانت ليلة أ ُبهة ، إشي جاتو ، و إشي كاكولا .. وإشي شهادات تقدير.. و إشي تليفزيون و اذاعة ..لاء و إيه .. قاعد متونس بمحمد أبو دومة و ابراهيم أبو سنة و فاروق شوشة و ملك عبد العزيز و عبد القادر القط و زكي العشماوي و جابر قميحة ..حاجة مـُفتخرة ..

أما الآن .. فالسعىُ البغيض ( على رأى الشاعر عادل عزت ) إستولى على ال13مليار خلية اللي ف نافوخي .. و فاضل خليتين .. هما اللي باكتب لك بيهم دلوقت

يا ترى يا عصفور ، في عالمك العصافيري المُحَلق .. لسة فيه عصفورات
... بيزأزأوا ؟!