من أعضاء سماعى ـ أزجال سعد الشرقاوى ـ بصوته

[سعدالشرقاوى]

(يعنى ايه الشعر؟)

الكلام لو صدق دايما

بتلاقيه طالع مساوي

تجدل الكلمة بقصيدة

تغزل الحرف بغناوي

مش حداثة واللا موضة

واللا شاعر لسّه هاوي

المهم تكون بتكتب

حاجه تعجب كل غاوي

,,,,,

هوّ ايه الشعر يعني؟

غير نفس مليان مشاعر

جاي بيوْصف أيّ حالة

عايشه لحظة ف قلب شاعر

هات رسالتك بالبساطة

خالية من كلّ الحواطة

جايبه حالتك ع البلاطة

مش فكاكا وشغل حاوي

,,,,,

الكلام منـّك يعاني

لمّا تلعب بالمعاني

والهدف م الفكر يهرب

والشروخ تهدم مباني

تملى كلّ البيت عيوب

وتعالجها برص طوب

والتعب فضىّ الجيوب

والحروف تعجز تداوى

,,,,,

سيب خيالك يحكي حالك

والليّ يخطرلك فى بالك

احكي خليّ قلوبنا تسمع

تنطق المكتوب بدالك

ح تلاقيني معاك ياغالى

والكلام يسكن خيالي

والحوار يشغللىّ بالي

والجمال يملى الحكاوي

,,,,,

خليّ شعرك يبقى طيرك

لمّا رفرف من ضميرك

يبقى فاهمك وانت فاهمٌه

مش رباية حدّ غيرك

إوعه إيدك تبني عشـّه

وتيجي لحظة عليك تغشـّه

واللىّ شوفت النور فى وشـّه

بصّ فيه واكتب غناوى

,,,,,,

ليه يضيع المعنى وانت

كلّ همّك فى القوافى

زيّ لابس بدلة كاملة

والقدم من تحت حافي

دا الشياكة تبان عليك

من ملامحك من عنيك

نص واحد ح يداريك

وتلاقيك أصبحت خاوي