طلبات نوتة أ / عادل صموئيل الجزء الثانى

[عمرو الهنداوي]

أستاذ عادل ازي حضرتك... عندي سؤال
في رايك ليه الموسيقار السنباطي ماعمل الحان مع عبد الحليم حافظ.. أنا على حد علمي عمرهم ما اشتغلوا مع بعض!!كمان الموسيقار فريد الأطرش ليه ما اشتغل مع عبد الحليم

اخى العزيز
اولا اطيب تحياتى
المطرب والملحن لازم يبقى فيه بينهم استلطاف واى لحن بيكون المطرب هو اللى اتصل بالملحن وقال لو عايز اعمل لحن مش الملحن هو اللى بيروح للمطرب .. وجايز عبد الحليم مالقاش نفسه فى الحان السنباطى او لأن ام كلثوم كانت مش بتحب عبد الحليم ممكن تكون فهمت السنباطى ما يتعاملش معاه زى حكاية انها منعت القصبجى يلحن لأسمهان وهو عند معاها وكان بينهم خناقة مشهورة اما فريد موضوع تانى .. يعنى عبد الوهاب قرر فى لحظة انه يعتزل الغناء .. ومن هنا كان لازم يبقى فيه مطرب قدير اوى اوى من وجهة نظره يبقى هو الفنان الكبير اللى يوصل الحانه وبالطبع مكانش فيه غير عبد الحليم لكن فريد كان ملحن ومطرب لآخر لحظة فى حياته وبالطبع كان عبد الحليم منافس قوى له ومن هنا ما ينفعش .. فهمت قصدى ؟ يعنى لو كان فريد اعتزل الغنا زى عبد الوهاب اكيد كان هو اللى حايجرى ورا حليم .. وبعدين كان فيه حسابات تانية , يعنى عبد الوهاب كان محوط على حليم بحيث ان يبقى احلى اغانى حليم من عبد الوهاب لأن بليغ والموجى وكمال الطويل كانوا نمرة اتنين بعد عبد الوهاب لكن السنباطى وفريد كان لهم ثقل عبد الوهاب انا مش عارف اعبر بس اكيد الصورة وصلت مع اطيب تحياتى عادل صموئيل