رد: طريقة صنع الكمان وبالصور
اشكرك اخى العزيز دكتور منذر على السرد الرائع
وبالطبع اتمنى ان كل واحد عنده اى معلومة عن الكمان او صور او فيديو ان يتحفنا بها .. والكلام عن الكمان مش بيخلص لأنها عالم ساحر ملىء بالأسرار .. وللعلم انا بعزف كمان من اكتر من 48 سنة لكن هنا فى موضوعكم هذا اتعلمت حاجات ماكنتش اعرفها ومنها طريقة توضيب الفرسة
والفرسة دى مشكلة فى حد ذاتها .. لأنها فى الكنجات الثمينة ( مثل كمنجتى ) بتبقى حساسية الكمان عالية جدا جدا فى صندوقها الرنان .. لكن عيب الحساسية العالية هذه انها بتحتاج فرسة جيدة جدا تكون موصلة جيدة للصوت بعكس الكمنجات الصينى يعنى ماتفرقش معاها اى فرسة لو حتى من خشب القباقيب .. وذلك ان حساسية الصندوق الرنان فى الكمنجة الصينى قليلة جدا
اما فى الكمنجات الثمينة المشكلة فى العمود والفرسة ... يعنى لو فى السيارة وضعت شنطة الكمان فى وضع رأسى والسيارة عملت مطب شديد ممكن العمود يتحرك من مكانة ربع شعرة تلك تفسد صوت الكمان
كان عندنا البعض فى عملية توضيب الفرسة بيسنفروا الفرسة ككل بحيث يقللوا سمكها لأقصى درجة ممكنة ولكن تلك العملية لها عيوب كثيرة اولها ان الفرسة بتبقى ضعيفة وممكن لو حد شد الوتر مرة واحدة الفرسة تتكسر نصفين .. ومن العيوب ان الفرسة مع الوقت بتتقوس يعنى من ضغط الأوتار نصف الفرسة العلوى بيميل إلى الامام وبتتشكل على الوضع ده وعبثاُ تحاول تعدلها بترجع تانى .. والعيب الاخطر والاهم ان الفرسة لما تكون رقيقة جدا الوتر وبيتغرز فيها بيعمل حفرة .. ويفضل يسرح لدرجة انك لازم تغير الفرسة
والطريقة اللى شفتها فى الفيديو وهى طريقة انقاص وزن الفرسة عن طريق تفريغ الخشب من مناطق معينة واكتر ما عيجبنى العدة اللى بيشتغل بيها بتقشر الخشب كما التفاح .. وبالطبع نفسى فى واحدة لكن دى عدة خاصة جدا يعنى ماتتواجدش بسهولة لكن حابحث عن شىء مشابه يؤدى الغرض ان شاء الله
عجبنى ايضا الفيديو اللى بيقييسوا حساسية ضهر الكمان بالأجهزة الاليكترونية .. ولكن تذكرت عمالقة صنع الكمان مثل سترتديفاريوس لم تكن بالطبع لديهم كل هذه الاجهزة ولكنهم كانوا بيستعملوا حساسيتهم وخبرتهم قبل وجود هذه الاجهزة الحديثة
اما استبدال شعر قوس الكمان ( فى الصين بالذات ) بخيوط صناعية .. دى مشكلة يعنى الشعر الطبيعى بيعطى صوت لامثيل له ولكن المشكلة الخطيرة ان الفرق بين الشعر الطببيعى والشعر الصناعى ان الصناعى معمول من مواد كيمائية ميتة ام الطبيعى فهو معمول من شعر طبيعى فيه حياة يعنى بيتحلل بعد فترة وبيبتدى يتقصف ويتقطع
ومن هنا لازم تكون محتاج مصر مسمتر تأتى منه بالشعر الاصلى بإنتظام لأنك بتحتاج ملو القوس بالكتير كل سنة ونصف او سنتين
مع اطيب تحياتى
|
العرض الشجري