الاستاذ الشاعر يوسف ابو سالم
اخى الاستاذ غازى
جميع شعراء المنتدى سماعى الجميل
بعد مساء الخير عليكم جميعا
وكل عام وأنتم بالف خير
انا أتمنى ان يقوموا شعراء المنتدى بهذه الفكره
روحانيات رمضانيه
وسوف احكى لكم ما يحدث فى منطقتنا بما انها منطقه شعبيه
قبل دخول رمضان بأيام ياتون أبناء الجيران وياخذون بعض من النقود مننا لكى يشتروا الزينه التى يضعونها على البلاكونات المنازل وهذه احلى تيمه واحلى حاجه عندنا فى رمضان + الفانوس الكبير الذى يزين الشارع بجميع الوان الزينه
اما عن الافران الافرنجى التى تعمل الفينو والبقسماط بتعمل فى رمضان عيش ابيض بدل الفينو للصحور
اما عن بائع الفول فلا يفتح الا قرب المغرب وبعد صلاة التراويح لكى يبيع الفول والطعميه وعجينة الطعميه النيه للصحور
اما بتاع الطرشى فبيبقى زحام عليه حتى لو فى البيت جميع انواع المخللات والصلطات
عندكم بقه بتاع العرقسوس الله عليه
بيقى الناس عليه طوابير يمكن من قبل العصر
وبيبقى عنده عرق سوس وتمر هندى وصوبيا
وخروب
وجميع بائعى المحلات الاخرى كالكشرى وخلافه بيبقى مغلق طوووال شهر رمضان
وبعض المحلات صاحبة الاكلات السريعه كالكبابجى والفراخ المشويه والطواجن بيبقى فاتح طوال هذا الشهر
زمان كان دائما بعد مدفع الافطار ينزل الاولاد يلعبوا بالفوانيس
لكن الان مفيش الكلام ده
اصبح الفانوس اللى بالاحجار بدل ابو شمعه اللى كان على ايامى
ولكن لازال الفانوس ابو شمعه موجود ويباع كل عام فى ميدان السيده زينب والحسين والازهر والعتبه والعباسيه
المسحراتى مبقاش زى زمان فى كل المناطق اماكن اماكن
او حياء احياء
لكن بردوا مازال موجود
وطبعا غير زيارات الاهل والاقارب والعزومات والغرامات واللذى منه
والوقت الذى يقراء فيه القرآن الكريم قبل المغرب وفى الوقت قبل الفجر وبعد الفجر
صلاة التراويح ويتجمع فيها الجيران والاصدقاء ويذهبون الى المساجد صحبه جميله فى معية الله وطاعته
واخر رمضان العشر الاواخر بالذات
كل امهاتنا يقمن بشراء الدقيق لعمل المخبوزات للعيد
مثل الكعك اللى بعمله الحمد لله مش محروق
والبسكويت والبيتيفور والغريبه والمقرمشات او القراميش
نسيت بتاع الكنافه والقطايف
يا سلام فى ناس حتى الان بتبنى الفرن اللى بيلفوا عليها الكنافه
لكن اصبح الان فى فرن اليه فى جميع الاماكن والقليل ممن يعمل الفرن اليدويه
والقطايف الطازه الجميله التى تحشو بجميع انواع المكسرات والاطعمه
انا حاولت اتذكر معكم بعض مظاهر الاحداث التى تحدث فى رمضان
واكيد انتم كلكم عارفينها
لكن بالنسبه لاخواننا العرب حبيت ان اعرفهم انواع او بعض من انواع الاحداث فى رمضان
وعلى شعرائنا الكرام ان يقوموا برسمها باجمل وارق انواع الرسم الشعرى والزجلى وكل ما ترغبون
وكل وقت وانتم بالف خير
ويارب رمضان يجى على امة الاسلام بالخير واليمن والبركات
اختكم عفاف
رد: آن الأوان
العرض الشجري