عصفور غلط

[عصام اللباد]

عصفور غلط

(عاميَّة)

يومي الحلو يا وحدتي كان زي دا عصفور،
دخل شبّاكي غلط، .. يمكن عَمَاه النور،
أو يمكن كان زيِّي وحيد!
أو ربما مخمور؟!
.. أو يمكن منتِشي.

أو يمكن - ربما - مغرور!

...
اللي يهم يا وحدتي إنه دخل شبّاكي، غلط.
والسبب - حد علمي أقول - مستور.

...
سألني: قاعد ف الضلمه ليه؟
سألته: مش يمكن ف الضلمه نور؟!
مش ساعات الوَسَع يحتاج له سور؟!
مش يمكن عشان الحق لابس وِشُّه زور؟!
مش يمكن ما اقدرش أطير زيَّك،
أو إن الجناح مكسور؟!
...
مش يمكن إني كرهت البحور والزهور والمقام والندور؟!
مش يمكن كفرت بالمداين والقماين والمدن والكفور؟!

والقشور؟!
...
قال لي عصفوري طاير ف الضلام غضبان:
"انت كئيب".
"انت غريب".
وزَعَق: "ولَّع شويِّة نور".
...
قلت له حاضر.
عبدك المأمور.

...
بمجرد ما الضو انتشر دايراً مايدور.
بص لي بخبث من عند حَفّ السور،
وطار بعيد عني يلعن
ويزقزق ف وشِّي: .. غُور،
.. غُور.

...
...

من يومها يا غربتي ما عدت،
لا آمن لعصفور، ولا مسرور،
ولا ليوم حلو،

ولا حتى لورده نابته، هشه
في قلب قلب الصخور

عصام اللباد

[Adham Osman]

عمى عصام اللباد الفنان

ياجمالك ... مفردات وميزان وكله
إنت بتوصف لحظة إحباط بيمر بها كل إنسان
وصوّرتها فى ديالوج جميل
ونصيحة العصفور كانت
الحرية الحرية

ودى من مجموعة رباعيات عن الطيور والحشرات وديالوجات مختلفة بينهم قد تحمل نفس الفكرة.

لما صاد البلبل جابله من الحبوب قنطار
وحطه جوه قفص ذهب له باب بإطار
وعلقه فى الشباك اللى عالجنينة
ولما رجع يوم يسمعه ... لقاه طار
عجبى

أدهم