الورد .. وأعمال أخرى

[ممدوح محفوظ]

يا ورد دوبتِنا بالوانك الحلوه
تنشُر عبيرك وتعمِل مِ الغصون خلوه
يا ريت ابوسك واهيم واسرح ف بحر هواك
واكتب فى جمال خدودك تلتميت غنوه

ممدوح محفوظ

[ممدوح محفوظ]

يا قناع آن الاوان ارميك واستغنى
واللى يعيش بالحقيقه بين العباد أغنى
يمكن بنور الحقيقه تتغير الأيام
وتتبدل الليالى من بعد النواح مغنى

ممدوح محفوظ

[ممدوح محفوظ]

سهرت الليالى أصون حبك واهيم فِ هواك
وادارى ولا انت دارى واعمل ايه وياك
إياك تروح وتنسانى هنا وحدى
وتنسى اسمى وتنسى الحب ده .. إياك

ممدوح محفوظ

[ممدوح محفوظ]

سماعى رجع لنا احلى اغانى زمان ...
حلو الطرب نستمع والموسيقى كمان ....
ثومه وفريد وصحبه ورد محلاها ....
يا عندليب دلنى ده عود ده ولا كمان ....

ممدوح محفوظ

[ممدوح محفوظ]

و ليه ديماً تقولى كلام
وتقول عنيكى كلام تانى
و بنظره ابتدى الاحلام
وبكلمه ارجع لمكانى
وادوب فيكى واغنى وابوح
وارجع والفؤاد مجروح
وادوب تانى
وأرسم سكه للعاشقين
واتوه وأنسى عنوانى
وليه ديماً
يا غنوه حب
تملا الدنيا احلى كلام
واستنى
عشان أسمعها منك يوم
بهمسه أو بحتى سلام
تلامس فيه ايدك ايدى
ويوم قربك ده يوم عيدى
و عمرى م اتوب
وادوب تانى
وارسم سكه للعاشقين
واتوه وأنسى عنوانى
وليه ديماً

[ممدوح محفوظ]

قولِى الحقيقه
ولو دقيقه
و ما تظلميش قلبى الى حبك
ليه تقتليه بإدين رقيقه

اول ما حبيتك زمان
كانت عنيكى كتاب مفتوح
كانت تبوح
بأحلامك .. بأوهامك
كانت سكون وحنان و امان
اول ما حبيتك زمان
دلوقتى بحر غريق غدار
مليان اسرار
و ف لحظه تبقى الحنه نار
تحرق سنين
وبتمحى احلى كلام قلناه
و الضحكه تبقى فِ قلبى اه
و الاه الم ... والاه ندم .. وبحور غريقه
قولى الحقيقه

اول ما حبيتك زمان
كنتى معايا ... حتى وانتى مش معايا
كان الكلام يجمع قلوب
برد الليالى يدوب
و ف همسه قلنا ف حبنا حكيات
و ف لمسه طرنا فى السما مسفات
دلوقتى ليه ...
وهقولها ليه
حتى الكلام مبقاش يفيد
والخطوه بنا بلاد بعيد
دلوقتى نهرب مِ العتاب
و ف حبنا كانت قلوبنا زمان جريئه
قولى الحقيقه ...ء

[ممدوح محفوظ]

و عرفت يا قلبى الغُنى بعد السنين تانى
الحب ده دوبك و يا ريته ما جانى
ارجع يا قلبى عن طريق دموعه كتير
وتبقى من بعد ما كانت البريء .. جانى

[ممدوح محفوظ]

يا قلبى ارجع لى تانى وكفياك أوهام
وانسى الى غير طريقك هزل كان أو هام
انا طبيبك وعارفك والدوا عندى
لأرد بابك وادارى الوحى والإلهام

[ممدوح محفوظ]

ولما جانى الهوى انا قلت ده وعدى
يا قلبى اجمد وقاوم , اهى شوطه وتعدى
رمش العيون ده خطير ايا تدوب فِ هواه
واعمل لنفسك حدود , حرص ولا تعدى

[ممدوح محفوظ]

تعديل (اياك)
ولما جانى الهوى انا قلت ده وعدى
يا قلبى اجمد وقاوم , اهى شوطه وتعدى
رمش العيون ده خطير اياك تدوب فِ هواه
واعمل لنفسك حدود , حرص ولا تعدى