وأه يامه

**على عبداللاه** · #1 03/11/2009, 18h09

وأه يامه

وجانى الموت ..

ومن غير صوت

خطف روحى وقال فى سكوت

حسابك هل يا إنسان

أهين يامه وأيه الحل ...

دا أنا عملى هوان وذل

وسايب روحى للمحتل

بياخد حقى فى الأوطان

سواد يامه دا كان ليلى ..

وإنتى قاعده تحكيلى

عن الأبطال تغنيلى

وفكرك إن أنا فرحان

منين يامه يجينى الفرح ...

دا انا مجروح بمليون جرح

مهددنى بنبله ورمح

مالينى الجبن بالأحزان

وفينهم حتى خلانى

سابونى فى الجفا أعانى

وقالوا على أنا الجانى

وإنى بعت فى البلدان

يغنوا يا أمى فى عروبه

وأنا أحلامى منهوبه

وماسك فى اليمين طوبه

وفاكر إن أنا الكسبان

وفين الود يا أمي

وفينه أخوى مع عمى

سابوني في الحصار مرمى

وأنا معصور بين النيران

أهين يامه وسامحينى

أهين يامه يا نور عينى

دموعك يامه تكوينى

داويها يا أمى بالنسيان

**حمدى شبانة** · #2 04/11/2009, 15h33

اَهين ياعلوة فى نصيبنا
عددنا كبير وتحسبنا
ايدين واحدة ؟ كدا حسابنا
حيبقى تقيل يوم الميزان
--------------

الله عليك تسلم دماغك وايديك يامتر على

**على عبداللاه** · #3 05/11/2009, 16h46

اقتباس:

المشاركة الأصلية كتبت بواسطة حمدى شبانة

اَهين ياعلوة فى نصيبنا

عددنا كبير وتحسبنا
ايدين واحدة ؟ كدا حسابنا
حيبقى تقيل يوم الميزان
--------------

الله عليك تسلم دماغك وايديك يامتر على

أهين يا جميل يابو شبانه
وليه ما نكنش ايد واحده
عددنا كتير أهين يانا
لكن ارواحنا متباعده
وبعد الروح دا خلانا
كتير وكتير بدون فايده
والله ربنا هيحاسب المسلمين على الفرقه دى .. أنا مش عارف متفرقين ليه اصلا ... وليه ما ناخدش بالنا من إن إتحادنا قوه .. إنت قريت قصيده لا تصالح للشاعر أمل دنقل ؟؟
ياريت تقراها تانى الراجل ده جه على وجع الجرح واتكى
زى ما بيقولوا عندنا فى المنصوره

تحياتى

**إبتسامه** · #4 08/11/2009, 16h51

[/
يا سلام عليك يا ابو علوه حلو كتير بس ليه متقلش يا به ليه ام ديما تشيل الهم

**سعدالشرقاوى** · #5 10/11/2009, 12h27

اخى الاستاذ/على
اننى اقف هذه المرّه
مع عمل عظيم
كرّرت قراءته أكثر من مرّه
وتغنيته وبكيته بصوتى
لاعيده اهداءا لفكركم الجميل
وحسكم المرهف
الفنان
عظيمه يامتر
يا ملحّن الكلمات
أهين يامه وسامحينى

أهين يامه يا نور عينى

دموعك يامه تكوينى

داويها يا أمى بالنسيان

**على عبداللاه** · #6 10/11/2009, 17h23

اقتباس:

المشاركة الأصلية كتبت بواسطة سعدالشرقاوى

اخى الاستاذ/على

اننى اقف هذه المرّه
مع عمل عظيم
كرّرت قراءته أكثر من مرّه
وتغنيته وبكيته بصوتى
لاعيده اهداءا لفكركم الجميل
وحسكم المرهف
الفنان
عظيمه يامتر
يا ملحّن الكلمات

سيدى صاحب القلب الكبير / سعد بك الشرقاوى

أثرتنى حروفكم الرقيقة .. وجعلت منى صغيرا لا أجد من
حروف الأبجدية ما أعبر به عن شكرى وإمتنانى
.. هاجمنى الصمت ولم أجد ما أعبر به سوى دمعة
إستقرت فى عيناى ...
أكرمك الله الكريم جداااا

**على عبداللاه** · #7 10/11/2009, 21h45

اقتباس:

المشاركة الأصلية كتبت بواسطة إبتسامه

[/
يا سلام عليك يا ابو علوه حلو كتير بس ليه متقلش يا به ليه ام ديما تشيل الهم

الأم هنا هى الأمه العربيه ... . . . وهى اللى بنحكى ليها الوجع
اللى هو وجع العروبه ... طبعا مش وجع السنان ... وعموما شكرا ليكى
يا إبتسامه الرد والمره اللى بعد السفنتاشر الجيه هقول أه يابه

**ام مدحت** · #8 11/11/2009, 07h43

اخى الاستاذ/على عبداللاه

لقد قرأها شاعر التوته ثلاث مرات

فالتقطتها على الموبايل فى الاخيرة

وعند معرفته اراد ان يدخل عليها خلفية

لاغنية (مصر ياأم الدنيا)باعادتها

لكنى استحسنها بطبيعتها

ارجو ان تنال اعجابكم

**على عبداللاه** · #9 11/11/2009, 20h21

اقتباس:

المشاركة الأصلية كتبت بواسطة ام مدحت

اخى الاستاذ/على عبداللاه

لقد قرأها شاعر التوته ثلاث مرات

فالتقطتها على الموبايل فى الاخيرة

وعند معرفته اراد ان يدخل عليها خلفية

لاغنية (مصر ياأم الدنيا)باعادتها

لكنى استحسنها بطبيعتها

ارجو ان تنال اعجابكم

يااااه
سمعتها بصوته الجميل
بس دا كتير عليا أوى
أوى
والله ما أنا عارف أشكرك إزاى
ولا أشكره إزاى وأوفيكم حقكم
متشكر ليكم جدا
الله يكرمكم

**على عبداللاه** · #10 20/11/2009, 21h08

ياترى دى ممكن تتلحن وتتغنى ؟؟ ولا ما تنفعش ؟؟