عينى عليك يا قلبى (اغنيه)

**سعدالشرقاوى** · #1 25/06/2009, 21h37

عينى عليك ياقلبى

آه ياعينى عليك ياقلبى
سهّيـتهم وخطفوك
ياقلبى عليك ياقلبى
داويتهم وتعبوك
منهم لله ياقلبى
حبيتهم وخدعوك
,,,,
انا كنت باشوف الدنيا
صافيه فى عنيهم حلوه
كان كل كلام ياقلبى
من بين شفايفهم غنوه
وف لحظه اتغيّر حالهم
وياريتهم ما حبوّك
منهم لله ياقلبى
حبيتهم وخدعوك
,,,,
اصبر ياقلبى معايا
واتحمّل الاسيّه
انا كنت بقول دامنايا
وحاسّين بللىّ بيّه
وف لحظه اتغيّر حالهم
وياريتهم ماحبّوك
منهم لله ياقلبى
حبيتهم وخدعوك
,,,,
خليك دايما ياقلبى
شايل ويّاك حنيّه
لايظهر غدر حبايبى
وعوازلك يشمتوا فيّه
والناس ح يشوفوا ياقلبى
حبايبك بيعادوك
منهم لله ياقلبى
حبيتهم وخدعوك
,,,,
آه ياعينى عليك ياقلبى
ياللى دايما مجروح
ولاتجرؤ يوم ياقلبى
وتقدر بالسّر تبوح
وحبايبك جم على غفله
سهّوا ضلوعى وخطفوك
منهم لله ياقلبى
حبيتهم وخدعوك
,,,,
الصبر ان طال ياقلبى
لازم بيكون له نهايه
وانا شايف انّ حبايبى
بكره ح يصطلحوا معايه
وح اقول لك يومها ياقلبى
بسعاده الفين مبروك
وافرح واتهنّى ياقلبى
دا حبايبك بيحبّوك
,,,,,,,,,

**علاء قدرى** · #2 26/06/2009, 00h01

عمنا الحبيب الشاعر سعد الشرقاوى
الاغنية جميلة ؛ بس سؤال بجد
هو ينفع نحب اللى بيخدعنا؛ واذا كان حبنا ليه قبل الخداع ؛ ينفع نحبه بعد ما اكتشفنا كذبه؟
والله سؤال ؛لان عارف ان قلبك جميل و بيسامح ؛موش زى قلبى

تحيه لك خالصة من القلب

**سعدالشرقاوى** · #3 26/06/2009, 07h08

الاستاذ/علاء قدرى
العجيب ان يكون هناك استشارى فى امراض عقم الامه
ويعجز فى علاج سعدالشرقاوى المسكين هو والتوته
جدتى كانت تقول بصلة المحب خروف
يعنى شوية خداع فساكونيه عدّيها
ماهو انت عارف امر عذاب واحلى عذاب هوّ
وبعدين الفرق بين القلوب ان واحد
يرى فيما يرى الصاحى
والاخر يرى فيما يرى النائم
يعنى هوّالحاج سلومه لما شكل الحكومه
كان نايم؟
ماهو برضه كان صاحى بس بطلان شويه
اروح منك فين يعنى

**علاء قدرى** · #4 26/06/2009, 13h18

عمنا الشاعر صاحب القلب الطيب
و البديهة الحاضرة
الاستاذ سعد الشرقاوى
حتروح منى فين؟؟؟؟
انت فى القلب....
حرام نداعبك شوية؟؟؟

**علاء طه ياسين** · #5 26/06/2009, 14h14

رفيق مشواري الشعري
وتوأمي
سعد الشرقاوي

مهما الطير يبعد ويسافر
لازم يرجع يوم ويحلق
والعصافير الطايل ليلها
لما يهل الصبح تزقزق
والأشجار تدبل ف مواسم
واما بييجي ربيعها توّرّق
زي ما قلبك بكره مسيره
يطلع م البحر قبل ما يغرق
سيبك بقا من اللي خدعوك
حب سواهم وغامر واعشق
وافتح بابك وانت تلاقي
سهم الحب ف قلبك يرشق

علاء ياسين

**أبوعبدالرحمن** · #6 26/06/2009, 14h29

حقيقى كلام ولا اروع
لقيتنى تحت شعار
الكلمة الحلوة هى اللى باقية
تجربة شعرية خيالية او ذاتية رائعة

لك خالص تحياتى وتقديرى وإحترامى

**سعدالشرقاوى** · #7 26/06/2009, 18h03

الاخ الاستاذ/علاء طه
يعنى استسمح معاليك
واتخلىّ عن القعده تحت التوته شويه
واجرب حظى فى ملعبك العظيم
عدّيها يابو التفانين

**سعدالشرقاوى** · #8 26/06/2009, 18h05

الاخ الاستاذ/ابوعبدالرحمن
انت اللى اصيل
وشهم وكريم
ربنا يبارك فيك
ويبارك لك فى عبدالرحمن

**د أنس البن** · #9 26/06/2009, 18h23

يا سلام على رقة مشاعرك يا حاج سعد
بس إيه حكاية سهيتهم وخطفوك
هو مين اللى سهى التانى
أو مين اللى كان ساهى ؟ الخاطف والا المخطوف
ما علينا , شوف , همه أصحاب الكلمه كده , مشاعرهم كده , ربنا خلقهم كده
عاملين زى فتيل الشمعه اللى بتتحرق وهيه بتنور
شوف ده قدرهم وده نصيبهم
أمال ح يبقوا شعراء وادباء وفنانين بدون مقابل
دى ضريبة الموهبه
والا إيه يا عمنا

**Tarek Elemary** · #10 27/06/2009, 08h38

اقتباس:

المشاركة الأصلية كتبت بواسطة سعدالشرقاوى

الصبر ان طال ياقلبى
لازم بيكون له نهايه
وانا شايف انّ حبايبى
بكره ح يصطلحوا معايه
وح اقول لك يومها ياقلبى
بسعاده الفين مبروك
وافرح واتهنّى ياقلبى
دا حبايبك بيحبّوك

طب ليه نحب بدون تفكير
و نعيش فى حلم تمللى كبير
و الدنيا مش دايما أحلام
قلبى فى سجن ضلوعى أسير
***
يا حبايبى على قَدُّكوا حِبوا
مشاعركوا م اللايمين خَبوا
و كفاية لوعة شوق و دموع
و بدال ما تتخاصموا إتعاتبوا
***
يحلى العتاب بالشوق و الود
بحروف نغم على ورق الورد
مش بالخصام نروى هوانا
يحيَّ الغرام بالشوق و الوجد
***
تحياتى يا عم سعد