"هكذا تكلمت درعة" الشعر الغنائي لواحات وادي درعة

[مصطفى]

القصيدة العاشرة
من فن الركبة

باسْمَكْ باشْ بْدِيتْ

بَاسْمك باشْ ابْدِيتْ يا رْفيعْ السْما ** يا عالْمْ لَعْلَى تسبقْ لِي فْالقُـول

مَانِي سامْحْ لْلحسُودْ و النَّمنام ** همَّا اِبَدْلُو فْكْلاَم اهْلْ القُـولْ

وَانَا طَايْعْ لْشْيُوخْ و العُلَمَا ** تركتْ النبي بهَا باشْ نْصُولْ

و الكفَّار مْعَمْرينْ جَهنَّمَـــــا ** وَانَا لْقِيتْ بابْ الجنَّة مَحْلُولْ

يَا رْسُولْ الله بِيتْ فِيكِ زيَّــــارة ** أنا و وَالْدِيَا و اهْلِي و السَّامْعينْ

نَمْشُو لمْقامْ النبي الرسول

[مصطفى]

قصيدة 11
من فن الركبة

طَالْقة سْبْلة مْثْقْبة العين هْدْبــــــــــة ** و ظْريفْ جَا عْلى حْسْن بْهَاهَا

أوفِي صْدْرْهَا صَابِي باقِي مَا تْرْبَّى ** و العاشْقْ لُوْ كانْ شافْها يتْمنَّاها

يا خُّوتي منْ اخُّوتْ حاسْدينْ بِيَـــــــــــا ** لُوْ كُونْ تْكُونْ نِيرانْ لاهْبة نْتْخطَّاها

لْغْزالْ فاطْمة السَّعْدْ منْ لْكَاهــــــــا ** مرت لْخْلاكْ و العْقِيْلْ كَاعْ بْغاها

[مصطفى]

قصيدة 12
من فن الركبة

يا اهْلي عْنُّو جِيتْ نْسالْ يا الحضَّارْ ** وْرِّينِي كِيفْ صارْ مالْ حْبيبي عَدَانِي

و بْكِيتْ حتَّى نبْتُو لْشْجـــــــــــــــــــــــــارْ ** يا وْلِيدي دْعْدُوعْ لِّي مْوْلْفو خايْفْ لا يْنْساني

عاوْدْ لِي دَاكْ اشِّي كِي صـــــــــــــــــــارْ ** لا يْحاوْلو النمْناما مْنْ بْعيدْ لا نْتَّاهْمْ جِيراني

امْباركة و رْقِيَة لْغْــــــــــــــــــــــــــزال ** يا وْلِيدي سلْطانْ البارْزاتْ باني بالهذب باني

[مصطفى]

قصيدة 13
من فن الركبة

عْجْبونِي في الميا خارْجاتْ عْشْيَا ** البْناتْ يا ربِّي مثْل النُــــــــــوارْ

دكُّوني دَكَّة وَلاَ رْتاوْ عْلِيــــــــــَا ** دَازُو مثْلْ العاشْقْ بنظــــــــــارْ

وْ فازُو يا ودِّي عْلى بْناتْ الْحْيَّــــــــا ** سبحانْ مَنْ نْشأْهُمْ ربْ القَهَّــــــــــارْ

يا و المْعْناوِيَّاتْ لاَشْ جاتْ هْديَـــــــــــــــــــة ** مبْروكْ فْرحْكُمْ خويَا و اللِّي كَبْرُو رْبِّــــــــــي

[مصطفى]

قصيدة 14
من فن الركبة

سْلْبوني خوداتْ يا السَّامعْ لِيَّــــــــــا ** وْ مْنِينْ رِيتْهًمْ دْلاَّلِي مَـــــــــــا راحْ

دْكُّونِي دْكَّة وْ مَا ارْثَاوْ عْلِيَّــــــــــــــا ** رَانِي عْلَى وْسادِي وْ منْ غِيرْ جْـراحْ

ناسي يا ناسي اِلَى عْلْمْتُو مَا بِيَّــــــــــــــــا ** لِلَّه سْبْبُو لِيَّا راهْ لَعْقْلْ جَـــــــــــــــــــــــــاحْ

آتُوني بالزْهْرَة مْعَ فاطْمَــــــــــــــــــــــــة ** هْيَ وْ لْغْزالْ نعيمة اِلى بْغَاوْ خْلاكِي يْرْتاحْ

[مصطفى]

قصيدة 15

عَتْ كِيفْ الْمَجْلِي وْ نْكَاطْعْ لْمْرايْرْ ** و رْسامْ اخُّوتْنَا فْالبْلادْ كْلاَلُــــو

صَاحْبِي كُنْتْ مْعَاهْ نْبادْلْ السْرايْــرْ ** وْ انْتُومَا شاهْدِينْ وْتْبدَّلْ حَالُــــو

كْنْتْ جِيتُو مْتْقَطَّعْ عَتْ زَايْـــــرْ ** مَا جَاوْبْني وَلاَ عْرَفْنَا مَالُــــو

كُولْ لَلْغِيدْ تْجِي وْ تْسانْدْ لْمْبْشّــــــرْ ** مازالْ الخيرْ عنْدْ ربِّي وْنْسالُــــو

[مصطفى]

قصيدة 16

سِيدِي لُوْكانْ في الْسْمَا نْكْرِي لُو فَرْخْ لْحْمامْ ** وْ نْجِيبُو فْ الجُوْ الْعَألِي

يَا سِيدِي لُوْكانْ في البْحَرْ نكْرِي لُو عَـــــــــوَّامْ ** و نْجِيبُو في المُوجْ التَّالِي

يَا سِيدِي لُوْكانْ في الخْلاَ نَمْشِي لُو مَشْيْ الدْوَامْ ** و نْجِيبُو في الثلث الخالِي

[مصطفى]

قصيدة 17

المْحبَّة و الْوَالْفِيَة النَّارْ هِـــــــــــــــــيَ ** يْحْسَنْ عْوَانِي جْوارْحِي مَنْهَا طَابـــــو

مَا تْدُومْ العَشْرَة يافَاهْمْ لَقْصِيَــــــــــــــة ** و اليُومْ خْلاَصْ كُلْهَا غَرْضُو صَابُـــــو

ضَرْكُوكْ عْلِيَا يَا زِينْةْ السْمِيَــــــــــــــة ** حُسَّادْكْ يَا الرِّيمْ فِيهَا مَا غَابُـــــــــــــــو

يالْغَادِي دِيرْ الطَّفْلَة رْكَابْ مِيَّـــــــــــــة ** يدِّي هَادْ السْلاَمْ وْيْرَدْ وْجَابُــــــــــــــــو

[مصطفى]

قصيدة 18

ابْقِيتْ وَحْدِي لْفْراكْ صْعِيبْ يَا سْيَادِي ** مَانَاكُلْ مَانْضُوكْ مْنْ وَحْشْ احْبَابِي

لاَ بْــــــرِيَّة لاَ تِلِيفُونْ مْنْ بْــــــــلاَدِي ** فَرْكَتْ لِيَامْ اًو حَالْةْ لْبْعَــــــــــــادِي

ابْغِيتْ يَا مُولْ القُدْرَة تْفُكْ هَـــــــــــــاذِي ** حَتَّى نْزُورْ الْوَالْدِينْ يُوْفَى مُــــــرَادِي

مَاسْخِينَأ باللاَّمَة يَالْخُّوتْ زِينَـــــــــــــــة ** و اللَّه يْلَمْنَا فِي حَجْرَةْ لَسْعَــــــــــــادِي

[مصطفى]

قصيدة 19

يَا وْلِيدِي عَمَّرْ لْبْنَاتْ مَا يْدُومُــــــــــو ** هَذَا حَالْ ازْمَانْ لَوَّلْ وَ التَّالِــــي

وَاخَّا كَعْدُو كَمْ مَنْ عَامْ بَايْ يْكُومُـــــــو ** بَدَانْ تَعْرَا ارْسَامْهُمْ يَا دَلاَّلِــــــي

وَ اللِّي الْكِيتُو يَبْكِي لْبْنَاتْ لاَ تْلُومُـــــو ** و اللاَّيْمْ بْلَفْرَاكْ تَبْلِيهْ بْحَالِـــــــي

وْ لَغْزَيَّلْ فَاطْمَة سُلْطَانْ جَابْ كَوْمُـو ** يَرْعَاهْ الله وْ بُوعْلاَمْ الجِيلاَلِــي