طلبات نوتة

[عادل صموئيل]

احبائى
اقدم لكم اغنية شريفة فاضل

امانة يا بكره

واهديها للأخ العزيز نور الصباح
واحب اقول لك انا نزلت اشترى الديك الرومى .. لقيت الديوك كلها صينى لأن كل حاجة فى البلد بقت صينى حتى سجادة الصلاة وفانوس رمضان
المهم لقيت الديوك الديك صغير حجمه زى الحمامة ومن غير واراك اصلا .. قالولى اصلا الديوك الرومى الصبنى معدلة يعنى من غير وراك مش عارف هل هم فى الصين اكلوا الوراك وبعتوا الباقى ولا سرقوا الوراك فى الجمرك , ولا هم فعلا فى الصين عملوا تعديل ولغوا الوراك من باب التطوير
مع اطيب حياتى
وفاضل لك طلب واحد يا مصطفىىىىىىىىىىىىىىىىىىىىى بعد 7 سنين
مع اطيب تحياتى

[عادل صموئيل]

احبائى
اقدم لكم اغنية

الوله جه

واقدمها ايضا للأخ العزيز نور الصباح
وانا مش بنسى او اتجاهل اى طلبات بس بتبقى ظروف
مع اطيب تحياتى

[عمرو الهنداوي]

استاذ عادل
دى نوتة مضناك من تدوينك
كل التحية

[عادل صموئيل]

احبائى
اشكركم كلكم على شعوركم الجميل والعيد عيدنا كلنا وربنا يهدى كل واحد ضال عن الخير
اقدمك لكم العيدية بتاعتكم
من اروع ما لحن بليغ حمدى واروع وماغنت الست

الحب كله

انا اهديها لأخى العزيز عمرو هنداوى لأنه هو اللى طلبها بإلحاح
الاغنية دى تختلف عن كل اغناى ام كلثوم اللى قبلها واللى بعدها يعنى البطل فيها الإيقاع
يعنى بليغ حط فيها كمية ايقاعات متنوعة لم تتواجد باكلم ده مع ام كلثوم من قبل
واستعان بعازف الايقاع العمروف محمود حمودة وكان زميلنا احيانا فى الماسية عشان ينفذ الإيقاعات دى كلها
والبطل الثانى الجيتار .. وهنا عمر خورشيد قدم شىء جديد عمره ما اتقال ع الجيتار لا قبله ولا بعده
فى المقدمة الموسيقية اولا قال صولوا على ايقاع 13/4 وده لون جديد وغريب على الجيتار يعنى لو حد اجنبةى سمعه وهو عازف جيتار حايقطع شعره لأن الضرب عامل جو خطير وجديد وغريب .. والمهم طبعا ان عمر خورشيد ما اتكعبلش مع تعقيد الايقاع ودى على فكرة حاجة مهمة جدا وخطيرة جدا جداً . بمعنى ( عشان ما يبقاش بيننا اسرار ) العازف لما يكون محترف وبيعزف شرقى اكيد عزف كتير سملعى ولنجات وحاجات بيصاحبها الضروب والاوزان العربية المعقدة واللى بيبقى الدوم مش فى المكان العادى المتوقع زى الملفوف والمقسوم والواحدة الكبيرة , لكن مع عازف جيتار مهما كان بيبقى طول عمره ما عزف مع الإيقاعات دى ,, فطبعا انه ما يتكعبلش ويقع ده اعجاز ... انا كاتب اللحن بدقة متناهية لأنى بالطبع عزفته آلاف المرات ... والدقة دى ممكن تخلى بعض الموازير صعبة شوية بس اكيد لما تحفظ اللحن الاول كويس مش حاتبقى مشكلة . واكيد كلكم مستواكم بيرتفعبمرور الوقت يعنى لازم تتعودوا على السهل والصعب
واترككم مع اللحن الرائع
وكل عام وانتم بخير

[armendo]

[QUOTE=ابوكارم;567221]

المشاركة الأصلية كتبت بواسطة salhi_haithem

[SIZE=4][COLOR=Black][B]
السلام عليكم ورحمة الله
اخي العزيز ارمندو هي فكرة جميلة و لقد اقترحت على الاستاذ عادل ان يدون لنا من كل بستان وردة (ارجوا ان يدونه) وه
ولو لاحظت في كوكتيل بليغ انو يضم موسيقي من اغنية اسمعوني الصفحة الثانية الثلاث
اخى هيثم
اخى ارمندو
اين كوكتيل بليغ؟
وهل اغنيه كل اطبا القلب قالولى قلبك داب (مدونه نوته)
وكذلك:اسال دموع عنيا
وشكرا

اخى ابو كارم
اغنية كل اطبا القلب لم تدون واتمنى تدوينها فهى اغنية جميلة فغلا وسارفع اليك كوكتيل بليغ ونوتة اسأل دموع عينية وارجو ان تسعد بهما مع تحياتى.
اخوك...ارمندو

[عادل صموئيل]

احيائى

اقدم لكم من روائع الفنان الكبير محمد عبد المطلب

بصعب على روحى

هى انطلبت الاسبوع ده .. وطلبتها اخت جيدية فى المنتدى وهى عازفة كمان على ما اعتقد
والاغنية دى انا بحبها جدا يعنى حبيت اقدمها لكم وانتم تستمتعوا باللحن الجميل بتاع العبقرى محمود الشريف
وعبد المطلب ده حكاية .. يعنى اول حاجة كوان كورال بيرد ورا بد الوهاب وجه يوم بقى عبد الوهاب يلحن له
وده بيوريك زمان كان الكورال ايه .. يعنى اقل واحد او واحدة منهم عنده طرب اكتر من كل اللى بيغنوا من 20 سنة لو جمعتهم على بعض 100 مرة .
ومشكلة عبد المطلب او مشكلة انى اكتب لحن لعبد المطلب صعبة جدا جداً .. لأنه مطرب اوى . يعنى الجملة الموسيقية الواحدة ممكن يغنيها بعشر درجات من التجويد .. ولما يسخن ويلعلع وبالذات بعد مايقول موال وكان احسن واحد يقول موال فى مصر ... كان ممكن يجود اكتر فى الجملة .. والمشكلة انى عشان اكتب لازم اكتب اللحن الاساسى ,, لذلك انا فى اللحن ده هنا وانا بكتب .. الاخت قدمت تسجيل على اليوتيوب .. بس انا سامع الاغنية كتير قبل كده .. اولا غناء عبد المطلب مختلف شوية زالتسجيل ناقص الكوبليه الاخير . وهنا الامانة الفنية خلتنى دورت على تسجيلين مختلفين تانى للأغنية وقعدت اسمع عشان احاول اوصل للحن الاساسى بقدر الإمكان ..
واعمكم حاجة انانت لو بتعزف مع عبد المطلب بالذات .. تبقى عينك على النوتة فى اللزمات الموسيقية فقط . اما فى الغناء لازم تكون عينك على النوتة 50% وودنك بتتابع معاه 50% . لأنه بيقول الحروف الموجودة امامك بس مش بالتحديد ومن هنا لو العازف عزف النوتة ممكن يحصل تعارض مع اللى بيقوله عبد المطلب .. فيهمشكلة كمان كانت خطيرة عند عبد المطلب .. انه عشان كان بيشتغل كتير اوى وكان عنده كازينو فى شارع الهرم اسمه الاريزونا وبيغنى فيه كل ليلة .. انه كانت الفرقة الموسيقية اللى بتشتغل معاه مش اد كده .. يعنى اعتماداً انه هو كل حاجة وبيدارى على عيوب الفرقة .. يعنى فى الكوبليه التانى فى الملف المرفق .. دخلوا موسيقى الكوبلليه غلط لخبطوها يعنى وحولوا يلموا نفسهم فى الإعادة شوية .. بس انا الشغل فى الفرقة المسية خلانى موسوس شوية وبخاف اكتب اللى فهمته يعنى لازم اتأكد ولقيت الجملة سليمة 100% فى تسجيل من التانيين اللى قلت عليهم ... وعبد المطلب مدرسة لا يمكن حد يقدر يقلده ... يعنى اى واحد يغنى حاجة لعمد المطلب ( وكان اسمه فى الوسط الفنى ( ابو نور ) كنت تحس انه زلطة صغيرة جنب هرم الجيزة
اترككم مع اللحن الرائع مع اطيب تحياتى

[عادل صموئيل]

احبائى

اقدم لكم اغنية قصيرة لوردة

من زمان

من مسلسل اوراق الورد
كان فيه سؤال اتسأل الاسبوع ده عم مجدى الحسينى وكان عمره 13 سنة وكان عايز ينضم للفرقة الماسية والعازفين ماقبلوهوش بينهم لصغر سنه
بس العملية مش كده ... اولا فى الوقت ده كان مجدةى الحسينى بيعزف اكورديون والفرقة الماسية فيها عازف اكورديون ومتميز جدا مش معقوا يمشوه ويجيبوا بدله طفل مهما كان
لكن الموضوع حاجة تانى .. مجى الحسينى كان بيعزف سماعى مش بيقرا نوتة .. واهم مواصفة فى العازف للقرقة المسية هى اجادة قراءة التنوة الفورية بنسبة 500% على الأقل يعنى انت بقرأ عربى بسرعة كام ؟ لازم تقرا نوتة اسرع من كده 100 مرة .. ولما كبر مجدى الحسينى اتعلم اورج واصبح عازف اورج شاطر جدا لكن تبقى مشكلة النوتة
هو نجح مع ام كلثوم لن ام كلثوم زى ماقلت الملحن كان بيحفظ الفرقة سماعى على العود ومش مجتاجة نوتة .. لكن لما عزف مع الفرقة الماسية وكان الاورج طالع جديد كانت المشكلة النوتة .. وفى اغانى عبد الحليم كانت البروفات كتير بيلحق يحفظ الصولو .. لكن المشكلة الرئيسية فى تسجيلات الاستوديو الفورية .. يعنى اغنية زى اغانى مسلسل اوراق الورد .. احنا بندخا الاستوديو مش عارفين حانسجل ايه .. لأن الاغانى الصغيرة دى محتاجة نوتة مكتوبة صح وبنعزفها فى خمس دقائق ونسجلها فى نص ساعة عى الاكثر يعنى حجز الاستوديو بيكون 3 ساعات ممكن نسجل فيهم خمس او ست اغانى من الحجم ده .. وهنا تظهر اهمية سرعة قراءة النوتة .. يعنى لو عازف وبالذات الصولو مش بيقرا نوتة او بيقرا مص مص ممكن يعمل لنا مشكلة انه يغلط ونفضل نعيد من الاول يتعبنا يعنى .. ومشكلة اخطر كان ساعات الملحن بيقابل مجدى الحسينى فى مكان وبيحقظه اللحن عشان يسجله معانا .. بيبقى حافظ الصولو لكن ما بيعرفش مكانه بالتحديد لن النوتة مكتوب فيها مكان الصولو والعازف بيبقى متابع معانا واحنا بنعزف وعند الصولو يدخل صح .. لكن لو مش بيقرا نوتة لحظة الصولو حتى لو المايسترو او قائد الفرقة شاورله بيخل ممكن متاخر او مش جاهز وتحصل نفس المشكلة نقف ونعيد تانى من الاول .. لذلكدى كانت فرصة عمر هانى مهنى لنه كان بيجيد قراءة النوتة ... كنا بندخل الاستوديو اول ما الورقة تتحط قدامنا انا بشوف بس الديل ايه , والمايسترو او قائد الفرقة بيشاور لنا مازورة فاضية عشان السرعة وبيقول لعازف الإيقاع الايقاع كذا ملفوف او مقسوماو هكذا . بعدين يشاور واجنا نعزف اللحن كله بل توقف .. ولو لحن طويل شوية بناخده كوبليه كوبلليه
مع اطيب تحياتى

[عادل صموئيل]

احبائى
اقدم لكم من اغنى وردة

كل اطبا القلب

والاغنية ى كانت من اوائل الاغانى اللى غنتها وردة فى مصر
يعنى كان كل مطرب مهما كان فى بلده مكانته كان بيبقى محلى ... لكن كان كل مطرب عربى اهم حاجة ييجى مصر ولو غنى فى حفلة فى مصر بينطلق الى العالمية
يعنى شوفوا كل الكلام اللى انا قلته عن الفن وفضل مصر ام الدنيا على الفن
والحكاية بتاعة ان المطرب العربى بيبتدى عمره الحقيقى من مصر دى انا شفتها عشرات المرات .. يعنى كان بييجى مطربين من دول عربية زى سميرة سعيد وعزيزة جلال ممكن كانوا نجوم فى المغرب .. لكن كانوا فى داخل المغرب لأن زمان ايامنا مكانش فى اقمار صناعية ولا اطباق .. يعنى المطرب التونسى او الجزائرى ماحدش بيشوفه غير فى تتليفزيون بلده .. لكن لما بييجى مصر ويعمل الحان عند الملحنين الكبار ,, ويحاول يعمل حفلة او اتنين وفى الاول حتى لو دفع تكاليف الحلفة والإذاعة التليفزيونية على حسابه ( وتمت على ايدى او امامى كتير ) ظهور المطرب فى التليفزيون المصرى شهادة اعتماد دولية
وربنا يحفظ مصر ويحافظ على مكانة مصر الفنية
مع اطيب تحياتى

[عادل صموئيل]

احبائى

اقدم لكم
من روائع فريد الاطرش

نجوم الليل

اتمنى ان تحوز رضاكم
مع اطيب تحياتى

[عادل صموئيل]

احبائى
بناء على طلب اخى العزيز هيثم اقدم نوتة

نجوم الليل
حجاز كار الدوكاه
المشكلة ان التسجيل اللى كتبت منه كان من درجة مى
بس هو كده اكيد اسهل كتير بالذات الكوبليه الثانى
اما عن المقدمة انا ما سمعتش مقدمة اكتر من المكتوبة
ومعلومة هو هنا المقدمة مركز على البيانو ... يعنى حتى لو فيه مقدمة حتحتاج بيانو يعنى على اى آلة مش حاتحس نفسك بتقولها حلو
اما عن سؤال اخى العزيز ارمندو عن آلة التشيللو والكونترباص
الآلتين دول بالذات لهم وظيفتين مختلفتين فى االاوركسترا السيمفونى والفرقة الشرقسة
بإختصار فى الاوركسترا السمفونى بيكون عددهم كبير يعنى مش اقل من 8 شيللو و6 كونترباص . وبيبقى لهم خطوط لحنية غير اللى بتعزفها الكمنجات والكونترباص ممكن يتعزف بالقوس او النبر بالإصبع فى السيمفونى بيتعزف بالقوس
اما فى الفرقة الشرقية دورهم مختلف .. الكونترباص بيتعزف بالنبر بالأصبع وبيدى نبرة على الاضلاع الاساسية من المازورة يعنى فى ميزان 4/4 مثلا بيعطى نبرة على الضلع الاول ونبرة على الضلع الثالث بيحزم الفرقة يعنى . والنبرة دى مرتبطة بالرق . يعنى الدوم اللى انت بتسمعها بتكون للكونترباص والرق معا .. اما لو فى حالة وجود سكتة فى اول المازورة هنا نبرة الكونترباص بتكون نغمة من عنده هو حسب ذوقه , ولما بيكون العازف شاطر اوى بيدى نغمة تعمل سلطنة عالية جدا ,, بالطبع لما تسمع وتشوف ام كلثوم شوف عباس فؤاد ( عظمة ) بيعمل ايه
بعدين فى جهازك اقفل الباص عشان تحس بالكونترباص وتمتع بيه
اما عن الشيللو : الفرقة بتكون عادة فى حدود 12 كمنجة ودول صوتهم مع بعض بيبقى بناتى اوى وهنا بيحطوا عليهم 3 شيللو بيعملوا موازنة فى الصوت يعنى زى الكورال بيبقى بنات ورجال ... والحميع بيعزف طبعا نفس اللحن .. فيه تميز فى التشيللو انه بيتعزف بالقوس . وممكن يتعزف بالنبر . ويسمى بتسكاتو .. ببس النبر ده وبالذات فى الشرقى محتاج عازف ماحصلش وكان عندنا فى الفرقة الماسية عازف اسمع حسان كمال وهو كان ايضا مع ام كلثوم... يعنى كان بيعمل ايقاعت بالشيللو فى اماكن بتحتاج ملو يعنى لما تشوف ام كلثوم هو بيبقى فى الاغانى القديمة فى النص وفى الاغانى الاحدث اول شيللو .. كان بيعمل حاجات تطير العقل يعنى وام كلثوم بتغنى
كان بيدى ايقاع منغم يعنى تم ترر رمرم تتم تم .. وحسان كمال الله يرحمه كان ابرع عازف شيللو شرقى بيتسكاتو فى العالم يعنى كان بيملى الكوبليه كله احيانا .. بعده حاولوا يقلدوه اكن اشطر واحد بيعمل لك مازورتين ويقع او مايقدرش يكمل ... لسبب خطير جدا جداً .. ان الابداع ده فطرى يعنى موهبة فى العازف يعنى مش بيعلموا فى الكليات بمعنى ان فى الكليات بيعلموا القوس بس . اما النبر ده لازم العازف يكون متمكن وذوقه عالى جدا جدا ..يعنى كان بيسلطن ام كلثوم بدرجة عالية جدا جدا وعشان تحس باللى بيعمله ركز فيه لما تتفرج على ام كلثوم
وعصرنا شهد عازف شيللو اسمه مجدى بوس كان برضه زميلنا فى الماسية ومع ام كلثوم .. ده كان اعظم عازف شيللو شرقى فى العالم بالقوس يعنى كان فى البروفات الشيللو بيقعد ورايا كان بيسطلنى ... يعنى بيغنى كانه كمنجة الله يرحمه .. وبرضه ما اتكررش تانى ... وصعوبة الشيللو والكونترباص ايه ؟
الكمنجة والعود بتبقى ايدك لما بتعزف .. فى نطاق الاربع اصابع نغمات كتير , يعنى تقدر تقول جملة طويلة فى نفس الوضع او البوزيسيون . ام فى التشيللو المسافات بين الغمات واسعة جدا .. يعنى عشان تعزف دو وبعدها رى لازم تطلع بوزيسيون وتقعد ايدك طالعة نازلة على المراية .لذلك تلاقى 90 % من عازفى التشيللو وحشين
لأنه ايده لما تتحرك طالع نازل بتحصل كتير جدا جدا ان صباعه مايجيش فى مكانه وتطلع النغمات خاسسة او زايدة
لذلك العازف بيخاف يتكشف بيقول بصوت واطى .. لكن العازفين بتوعنا واللى مش حيتعوضوا تانى كان العازف بيدخل فيك شمال يعنى بكل قوته لأنه مضبوط 1000% .. والمشكلة الخطيرة فى اغانى وفرق النهاردة الدوشة والخبط والضجيج حتى لو موجودة الآلات دى مش حاتسمعها فى الزحمة . بعكس زمان كان المسرح هادى والصوت كله هادى مش مزعج لذلك كنت تسمع كل آلة بتقول ايه
مع اطيب تحياتى