حالة ولادة - الصفحة 2

**Hisham Khala** · #11 07/02/2011, 11h57

اقتباس:

المشاركة الأصلية كتبت بواسطة سعدالشرقاوى

(حالة ولادة)
الحَمْـل فين يابلد زمن الولاده فات
لايكون جنينك سقط من زحمة الهتافات
دانا شايف اللفــّه والخلق فى الزّفه
راح يكسروا الدّفه لو قلتى انه مات
,,,,,,
وحيات مرار السنين فى القلب لمّا بات
خلاه بطبعه حزين عايش سمع وسكات
ع الظلم يامه صبر مستنىّ طلعة قمر
تتأكدى م الخبر يمكن يكون اشاعات
,,,,,,,
ملــّينا م الانتظار وصْبـُرْنا بزياده
مستنـّيـين العمار يابلدنا كالعاده
لاتكونى شيلتى الرّحم خايفه البلد تنزحم
من بعد طول الوَحَمْ جَرى ايه ياولاّده
,,,,,,,,
ماتقولى ايه العمل عايزين نشوف النور
لو فيه عزيمه وأمل ايه لازمة الدكتور
وارميها ع العيله وارتاحى م الشيله
قادر فى كام ليلة يكشفلك المستور
,,,,,,,
اليأس مش طبعنا والصّبر مدّ ايديه
والظلم عقده انتهى وداير يجدّد فيه
دا هوانا ماله حدود و الانتماء موجود
تستخصرى المولود وانتى اللى قادره عليه؟
,,,,,,,,,
زمان حاربنا الفساد ماهوُ كان غريب ودخيل
ورفعنا راية البلاد فوق الهرم والنيل
لمّا الزمام اختل والابن صار محتل
هلّ الطوفان ع الكل ماتشوفى حل بديل
,,,,,,,,,
الحل مش بالكلام ولا باللىّ قال قوله
من يوم ماسيـبتى اللجام وانتى اللىّ مسئوله
والحِمْـل مهما زاد راح ترفعيه بمخاض
وبفرحتك بالواد حاتفزّى معدوله
,,,,,,,

الله الله الله يا عم سعد
ايه الجمال و الحلوة دي

لو فيه عزيمه وأمل ايه لازمة الدكتور

بس دا اسمه كلام؟ ايه لازمة الدكتور؟
يلحن طبعا

**Hisham Khala** · #12 07/02/2011, 12h05

عمرى ماكنت احلم فى حياتى

بعد ما شَعرى ابْيضّ وشاب

انىّ ها لاقى كيانى وزاتى

آهـ ياولاد الايه ياشباب

,,

لمّا سنين الظلم تفجّر

غضب الارض نلاقى طوفان

والا ف أزمة نهر النيل

رغم السّد نشوف فيضان

,,

موجه بتيجى وموجه وراها

عاليه تغطىّ سطح المادنه

شايله تقاوى الخير جوّاها

علشان تزرع كلّ بلدنا

,,

تالت موجه معاها موبيد

سايل يحْرق زرع فسادهم

وزى ماعيشنا العمر عبيد

لازم يجنوا ثماره ولادهم

ايه يا عم سعد دا
مش ها نعرف نلحق عليك
دي برضه جامدة قوي
اسمح لي ابتدي بهذه التحفة

**سعدالشرقاوى** · #13 09/02/2011, 00h26

اقتباس:

المشاركة الأصلية كتبت بواسطة Hisham Khala

الله الله الله يا عم سعد
ايه الجمال و الحلوة دي

لو فيه عزيمه وأمل ايه لازمة الدكتور

بس دا اسمه كلام؟ ايه لازمة الدكتور؟
يلحن طبعا

ياريّس
شرف كبير
ان نرى توقيعكم على اعمالنا المتواضعه
ربنا مايحرمنيش من منك ابدا
تحياتى وتقديرى

**سعدالشرقاوى** · #14 09/02/2011, 00h43

اقتباس:

المشاركة الأصلية كتبت بواسطة عفاف سليمان

اخى الكريم

الشرقاوى الاصيل
ابن مصر
ابن النيل
عايزين نحافظ ع المولود
ونحوط عليه بعنينا
وروحنا وايدينا
علشان متلقفوش ايد الغدر
ولا تحاول تربيه تربية غدر
دا لسه بيقول يا هادى
بس جه بدم كتير
لابنائنا الطيبين
شباب زى الورد
يجعلهم الله فى عليين
مع الشهداء
والابرار والصالحين
والانبياء
اللهم آمين
اللهم آمين
اللهم آمين
دمت لنا بخير اخى الكريم
ودامت لك ولنا
اسرتك الطيبه الجميله
بخير وصحه وسعاده
وعاشت مصر
وعاش وليدها بخير
ثورتها الطيبه

اختكم عفاف

الاخت الاستاذة
عفاف سليمان
اشكر لكم تفاعلكم الرائع
وكلماتكم الكريمه
وسلمت مصرنا الحبيبة
من كل سوء

**Hisham Khala** · #15 09/02/2011, 09h53

اقتباس:

المشاركة الأصلية كتبت بواسطة سعدالشرقاوى

ياريّس
شرف كبير
ان نرى توقيعكم على اعمالنا المتواضعه
ربنا مايحرمنيش من منك ابدا
تحياتى وتقديرى

انا خلصت اللحن امس عشان حالتي النفسية كانت احسن ، ها اغنيه بصوتي المتواضع و امري و امركم لله.

**سعدالشرقاوى** · #16 18/02/2011, 22h36

اقتباس:

المشاركة الأصلية كتبت بواسطة Hisham Khala

انا خلصت اللحن امس عشان حالتي النفسية كانت احسن ، ها اغنيه بصوتي المتواضع و امري و امركم لله.

يا حبيب قلبى
كل شئ منك جميل
يكفى انك تاخذنا لزمان اللحن الجميل
فى ثوب الحاضر
لاحرمنا الله منكم
اخى الدكتور هشام

**سمير الشال** · #17 19/02/2011, 20h09

الهموم معك سياحة أخرى
أيها الشرقاوي الأصيل

!!

**سعدالشرقاوى** · #18 19/02/2011, 23h42

اقتباس:

المشاركة الأصلية كتبت بواسطة سمير الشال

الهموم معك سياحة أخرى

أيها الشرقاوي الأصيل

!!

اخى الاستاذ سمير
اهلا بكم فى صفحاتنا متواضعة المستوى
زينتموها واكملتم منقوصها
لكم التحية