تلت حروف و لا فيش كده
الواو وجع و الطه طرب
و النون يا ناس زى الندى
قصة غرام ما فيهاش حرام
شوفوا الولاد ساعة الندا
يملو الميدان قبل الأدان
ضد الهوان مستأسدة
القصة مش قصة بلد
و لا حب والد للولد
كلمة وطن عشق و سكن
و تاريخ حكاوى ف الغناوى
و كلمة جوة كل قلب ممددة
تلت حروف و لا فيش كده
يا ميم يمين ما نهَمِّلِك
يا صاد يا صبر مجَمِّلِك
يا ره يارب يكَمِّلِك
و تشوفى أولادك كتار
يا نجمة زاينة كل دار
ييجى النهار
يرسم سمار
على رمش عين و يكَحَّلِك
يامصر يا أخت القمر
معشوقة من كل البشر
حاولوا عوازلك من زمان
ولا حد فيهم يوم قِدِرْ
يِمِس توبِك رَمْلِك و طُوبِك
دول محروسين من القدر
يا بُكرة جَىّْ بيبتسِم
يا ضحكة حلوة بتترسم
يا زهور يناير .. يا حلم زاير
أسكن هِنا دانا ياما قلبى
بيك حِلِمْ
دم الملايكة على الرصيف
لاجل الكرامة و الرغيف
مُش شيئ غريب
مُش شيئ مخيف
دول يامَا ضحُّوا لاجلها
هُمَّا اللى كَتَبُوا مجدها
زى الربيع بعد الخريف
دم الملايكة على الرصيف
__________________
دى فضفضة من قلم رغم الألم ... حسَّاس
مهموم بِهَمْ الناس
يمكن تضيئ كلمته ... العقل جوة الراس
إلى تامر عامر ((كلمة وطن))
العرض المتطور
