ياريت تطلي كل يوم

[أحمد بارود]

شاكرين زيارتِك رَوِّت قلوب العطاشى
جيتي على جناح الفَرَح ورده وفراشه
شغلنا بيكي نفسنا وسألنا روحنا
هُوَّ انتي جيتي عندنا ولاَّ احنا رُحنا
ولاَّ ده حِلم بنحلمو ولسَّه مش فايقين
شاكرين
من يو ما شفناكي سألنا ظننا
دي تبقى مين
رشة مطر؟
ورده وقمر؟
يمكن شموع؟
يمكن ربيع؟
احترنا مش عارفين
آسفين
أسفين على الوقت اللي راح من عمرنا أسفين
ياريت تطُلّي كل يوم .. رُدّي السلام
قول كلام..
صوتك نَغَم وهديل حمام
وبلاش تغيبي عنّنا
غيابك ضنى
وحنا مشتاقييييين
شاكرين

[ناصر دويدار]

الله الله الله ياريت تطل انت كل يوم بشعرك الجميل ولغتك القريبة من القلب والعقل بدون لوى دراع الشطر عشان يركب على التانى وأنت بجد شاعر حيكون لك شـأن كبير فى عالم العامية وانا اللى بيعجبنى فيك أنك بتحب واحدة مفهومة ومعلومة وبنشوفها فى الشوارع والنوادى والبلكونات وشبابيك البيوت المفتوحة على البحر واللى عاجبنى اكتر انك بتعرف تحب ولأنك بتعرف تـحـب انت شاعر عامية مصرية صميمة وياريت أشوفك كل يوم وتطل عليا عشان انا محتاج لطلتك

[أحمد بارود]

الاستاذ الجميل ناصر دويدار ما اسعدني بحضورك وبملاحظاتك المفيدة .. اعتز بك