ياخرابى بعدك ياعرابى

**سعدالشرقاوى** · #1 21/08/2009, 05h53

يا خرابى بعدك يا عرابى

أزرع وانتج وما تسألشى
لمّا يطيب ح تسوّق فين؟
علشان صوتك ما بيوصلشى
قول لى ياواعى هاتشكى لمين؟
,,,
كلّ المهن التانيه تنادى
تلقى بلادى تنادى معاها
والإضراب بيبان مفعوله
علشان واقف حدّ وراها
,,,
غيرك فايت عيشه البايت
حىّ بيرزق من حواليك
وانت يابعزق عمّال تعزق
والأسعار تتحكـّم فيك
,,,
وكـّل وزّك انتاج رزّك
وقصقص ريشه أحسن ح يطير
بكره البيض يتربّا ف عزّك
على ما نشوف لك باب تصدير
,,,
إحنا نجحنا بعد كفاحنا
فى حرب القطن قضينا عليه
وبكره نبطـّل نزرع رز
وحزّر فزّر ناكل إيه
,,,
ودا إرشاد مدروس يا عنانى
لمّا سلومه منع الغلـّه
وزرع لب كتير وسودانى
وكل الناس قعده تتسلـّه
,,,
إوعى يا بعزق تزعل منىّ
وسلـّم لى على كلّ اصحابنا
وانت معاهم ح تنوب عنىّ
وان شحتوا ما يجوش على بابنا
,,,
يا حلاوه والدنيا طراوه
والزرع بيطرح أفراح
يا خرابى بعدك يا عرابى
ومحلاها عيشة الفلاح
,,,

**د أنس البن** · #2 21/08/2009, 07h09

الحاج سعد الشرقاوى
أخصائى أمراض إجتماعيه
تشخيص دقيق لكوارث عششت فى جسد مجتمعاتنا
برافو يا حكيم

**علاء طه ياسين** · #3 21/08/2009, 08h51

أبو مدحت
شقيقي الغالي

ما احلاها عيشة الفلاح
انا مش عارف بيرم التونسي كتبها ازاي ..
مع ان الفلاح في العصر ده كان متهان لأقصي درجة ..
وكانت الأرض وما عليها ملك للملك والطبقة الارستقراطية ..
ويقولك يتمرغ علي أرض براح ..
وماكنشي يمتلك من الأرض دي شبر واحد ..
عموما ..
زي ما قال استاذنا ووالدنا الدكتور أنس عنك : برافو يا حكيم ..
وما أصدقها من كلمة
عدت وعادت معك الأشياء الجميلة كلها
علاء ياسين

**سعدالشرقاوى** · #4 23/08/2009, 23h41

اقتباس:

المشاركة الأصلية كتبت بواسطة علاء طه ياسين

عموما ..
زي ما قال استاذنا ووالدنا الدكتور أنس عنك : برافو يا حكيم ..
وما أصدقها من كلمة
عدت وعادت معك الأشياء الجميلة كلها

علاء ياسين

يا استاذ/علاء ماتعرفش قد ايه يكن القلب
لهذا الوالد الكريم
من الحب والتقدير والاحترام
فهو حقا مثال لكل شئ جميل فى الحياه
ربنا مايحرمنيش منك يا ابو ياسين

**سعدالشرقاوى** · #5 23/08/2009, 23h36

اقتباس:

المشاركة الأصلية كتبت بواسطة د أنس البن

الحاج سعد الشرقاوى

أخصائى أمراض إجتماعيه
تشخيص دقيق لكوارث عششت فى جسد مجتمعاتنا
برافو يا حكيم

والدنا الدكتور/انس
ربنا يخليك
ويبارك لنا فيك
ويجعلنا دايما نتعلم على ايديك
وكل عام وانتم بخير

**unicorn** · #6 21/08/2009, 12h35

اقتباس:

المشاركة الأصلية كتبت بواسطة سعدالشرقاوى

يا خرابى بعدك يا عرابى

أزرع وانتج وما تسألشى
لمّا يطيب ح تسوّق فين؟
علشان صوتك ما بيوصلشى
قول لى ياواعى هاتشكى لمين؟
,,,
كلّ المهن التانيه تنادى
تلقى بلادى تنادى معاها
والإضراب بيبان مفعوله
علشان واقف حدّ وراها
,,,
غيرك فايت عيشه البايت
حىّ بيرزق من حواليك
وانت يابعزق عمّال تعزق
والأسعار تتحكـّم فيك
,,,
وكـّل وزّك انتاج رزّك
وقصقص ريشه أحسن ح يطير
بكره البيض يتربّا ف عزّك
على ما نشوف لك باب تصدير
,,,
إحنا نجحنا بعد كفاحنا
فى حرب القطن قضينا عليه
وبكره نبطـّل نزرع رز
وحزّر فزّر ناكل إيه
,,,
ودا إرشاد مدروس يا عنانى
لمّا سلومه منع الغلـّه
وزرع لب كتير وسودانى
وكل الناس قعده تتسلـّه
,,,
إوعى يا بعزق تزعل منىّ
وسلـّم لى على كلّ اصحابنا
وانت معاهم ح تنوب عنىّ
وان شحتوا ما يجوش على بابنا
,,,
يا حلاوه والدنيا طراوه
والزرع بيطرح أفراح
يا خرابى بعدك يا عرابى
ومحلاها عيشة الفلاح
,,,

يا عينى عليك يا عم سعد يا فلاح يا أصيل , ترجمت كلامنا مع بعض عن اللى أثارك و أثارنى فى فشل الزراعة إلى لغة الشعر التى تجيدها ,
القطن المصرى و الارز المصرى هما بترول مصر و مناجم الماس التى لا تنضب ,
نضبوا بحول الله و تحولوا بقدرة قادر الى زراعة القرع و اللب ,عشان الناس تقزقز و تتسلى و تنبسط.
اشتكى يا فلاح يا فصيح و اصرخ يمكن يوصل صوت شعرك.
أحسنت يا عم سعد , بس فين ملف الصوت ؟؟؟

**علاء قدرى** · #7 21/08/2009, 13h08

عمنا الجميل الشاعر سعد الشرقاوى
عندك ترمومتر شعرى رائع تقيس به حالة فلاح هذا البلد
وعلى فكرة ؛ حالة الفلاح و الزراعة من حال البلد
وانت متخصص فى تشريح حالة الفلاح يمشرط البساطة ؛ و السخرية الراقية
ياريت كل قصيدة ليك يصحبها تسجيل صوتى كما فعل د انس
لان القاءك لقصائدك يزيدها حياة ؛ و يزيدنا شجن
غنى يا ارغول الفلاحين

**سعدالشرقاوى** · #8 23/08/2009, 23h51

اقتباس:

المشاركة الأصلية كتبت بواسطة علاء قدرى

عمنا الجميل الشاعر سعد الشرقاوى

عندك ترمومتر شعرى رائع تقيس به حالة فلاح هذا البلد
وعلى فكرة ؛ حالة الفلاح و الزراعة من حال البلد
وانت متخصص فى تشريح حالة الفلاح يمشرط البساطة ؛ و السخرية الراقية
ياريت كل قصيدة ليك يصحبها تسجيل صوتى كما فعل د انس
لان القاءك لقصائدك يزيدها حياة ؛ و يزيدنا شجن

غنى يا ارغول الفلاحين

والله يا استاذ علاء
الفلاح السنه دى وخاصة زارع الارز
تاكل صوابعك وراه
من حلاوته
ويجعله عامر

**سعدالشرقاوى** · #9 23/08/2009, 23h47

اقتباس:

المشاركة الأصلية كتبت بواسطة unicorn

يا عينى عليك يا عم سعد يا فلاح يا أصيل , ترجمت كلامنا مع بعض عن اللى أثارك و أثارنى فى فشل الزراعة إلى لغة الشعر التى تجيدها ,
القطن المصرى و الارز المصرى هما بترول مصر و مناجم الماس التى لا تنضب ,
نضبوا بحول الله و تحولوا بقدرة قادر الى زراعة القرع و اللب ,عشان الناس تقزقز و تتسلى و تنبسط.
اشتكى يا فلاح يا فصيح و اصرخ يمكن يوصل صوت شعرك.
أحسنت يا عم سعد , بس فين ملف الصوت ؟؟؟

الاخ الغالى المحترم
الاستاذ/محمدابومندور
لكل شئ سبب وانت السبب فى هذا الموضوع
وقريبا ان شاء الله يكون عندك الملف
كل عام وانتم بخير

**السيد عبدالفتاح** · #10 25/08/2009, 07h59

أخى سعد الشرقاوى ربنا يكون فى عونك واحنا كمان قدرت تطلع اللى جوانا فى كلمات بسيطة دمت لنا وللمنتدى وكل سنة وانت طيب