عصفورَك مش عصفورَك ( شي رمزي )
للشاعر : سعود الأسدي
عصفورَكْ يلْلي في الدارْ
وْبِيْنَقْوِد * من قَفُّوْرَكْ *
لو من إيدَكْ فِلْت وْطارْ
وْما رِجِعْلَكْ عصفورَك
بيكون وْهُوِّ في الدارْ
وْقَبِلْ ما يِفْلَتْ وِيْطيرْ
عصفورَك مشْ عصفورَكْ
***
عصفورَكْ يللي بالعُشّ
لمّا يْطَيِّرْ من عشّو
خَلّيهْ عا فَيّالو * يْطُشّ *
وْأُوعَى بالرَّشّ تْرُشّو *
تا يِرْجعْلَكْ ما بَدُّشّ
وما بدّو تِقشَعْ وِشّو
وَفِّرْ حبّاتَكْ لا تْرُشّ
حتى يِفَرْفِرْ فَرْفُورَكْ
ــــ
بينَقْوِد : يبقّ الحبّ بمنقاده وهو المنقار .
القفُّور : وعاء صغير من قشّ يوضع فيه الحبّ .
خلّيه عا فيّالو يْطُشّ : اتركْه على راحته
يهيم على وجهه كيفما يريد .
الرشّ : فشك فيه خردق لصيد الطيور.
ما بدََّش : لايريد .
تقشَع وِشّو : ترى وجهه .
يفرْفِر فرفورَك : يرف بجناحيه صغيرك ويطير .
عصفورَكْ مش عصفورَكْ
العرض المتطور
