طيب كداب كداب

**علاء طه ياسين** · #1 27/05/2009, 18h10

روحي بقا متزهقنيش ..
وكفاية متتعبنيش ..
النار الحارقاني بيها ..
بقيت ما بتحرقنيش

نظراتك ليا عذاب
مش نظرات الأحباب
وبتتعاملي مع قلبي
بقانون وشريعة الغاب
من قبل ما اقول الكلمة
تسبقي وتقولي كداب
طيب كداب كداب
خليكي عندك ما تجيش
وكفاية متتعبنيش

أنا متأسف مش طايقك
بقا بيني وبينك سور
إنتي أكبر مغرورة
علي طول بتعيشي الدور
وتأنبي دايما فيا
ولا مرة تقولي معذور
خلي المستور مستور
وبلاش متكلمنيش
وكفاية متتعبنيش

**مختار الحسانين** · #2 27/05/2009, 22h39

لا لا دا مش علاء دا واحد تانى خالص

مش متدفقة أبدا

_________________________________

يا حبيبى ارجعلى وشوف حالى
والحيرة يا روحى اللى انا فيها

الشوق ف بعادك نار قايدة
هات جردل ميه وطفيها

وعيونى دموعها ملت ترعة
سهرانة نهارها ولياليها

ورموشى ف بعدك زهقانة
لا اتارى أو دش يسليها

وهدومى ف بعدك مغسولة

بدموعى والهجر كاويها

ارجع نتصافى ونتصالح

وتعود الميه لمجاريها

_____________________

**NAHID 76** · #3 28/05/2009, 06h48

بسم الله الرحمن الرحيم
التوأمين
الأساتذه علاء ومختار
علاء
أيوه كده إثأر مره واحده هو كده اللى ميقدرش يتقال له كده
جميله فى اتجاهها من حيث الموضوع
سى مختار
إيه التلقائيه والشغل اللى على ميه بيضا ده
روعه
وكده بقى أخذ علاء حقه
يتصالح بقى
ثنائى ملكوش حل
أما عمكم الشرقاوى
ح نسميه بعد إذنه ومن غير زعل
وآسفه مقدما

عم الشرقاوى العقده
تحياتى

**سعدالشرقاوى** · #4 28/05/2009, 07h19

صباح الفل على عيونكم
خايف باقى الحبايب يفكّروا
اننا بنكوّن (نقابة الفلاحين)
ايه الجمال ده (ياعلاء ياوادياسين)
دايما كده داير من اول منافلهّ
وانت ياخال (مختار)
والله فى ظل هذا الغم عايزين
نفرفش شويه مع هذا اللون الفكاهى الجميل
وهدومى ف بعدك مغسولة

بدموعى والهجر كاويها
امّا انتى (ياعمتى ناهد)
ربما طعم التوت لايحلو الا لآكله
ومن لايعرف جو التوته والقعده والسهرايه
اعتقد سيكون له راى آخر
لاننا للاسف قطعنا توت يامه

**علاء طه ياسين** · #5 28/05/2009, 13h20

مختار يا حبيبي وقعنا خلاص .. مادام مدام ناهد قالت إننا ثنائي ملوش حل وهي ليها بصراحة عيون خبيرة في فن النقد يبقي ياحبيبي لازم نثبت ده .. ولا ايه رأيك ؟
علاء

**علاء طه ياسين** · #6 28/05/2009, 13h27

مدام ناهد ..
انا نويت أكمل قصة الولد الأهطل حمودة وآخر حته في قصته مع البنت سعدية .. بس مش عارف أكملها في نفس الموضوع اللي بدأتها فيه .. ولا هنا .. ولا أفرد لها موضوع لوحده .. منتظر رأي حضرتك ..
وشكرا ليكي خالص
علاء