علشان مابيسمعوش، قصيدة لسيد أبو زهده

[abuzahda]

علشان مابيسمعوش
علشان مابيفهموش
سرقوا المال من جيوبنا
وجهزوا الجيوش

وحضروا المواكب
وركبوا في المراكب
وودعوا الحبايب
ورجعوا في النعوش

سكروا لما الثمالة
فرحوا بلبس المارين
جابوا حبة حثالة
كفرة مالهومش دين
لم دخلوا كنيسة مرة
يمكن مااتعمدوش

تو ميدل إست جو......
ننشر حريه سام
الكاوبوي جددوه
لجل يعم السلام
الحلم تحققوه
وبغيره ماترجعوش

جوني طفلن لقيطن
عايش في الفيديوجيم
ماذر مشغولة عنه
بالماسك وبالرجيم
والشيطان الرجيم
منه ما اتعوذوش

جوني كبر شوية
في أحضان الجروب
ولا عمره شافش سيما
غير أفلام الحروب
محتار بين الدروب
والصح مايعرفوش

ولما شد حيله
صايع من غير مدارس
وهموه بإنه رامبو
وسوبر مان وفارس
ورموه ف إدين فوارس ....
في عراقنا ما يرحموش

جوني رجع لمامته
ملفوف بألف كيس
متفحم ياندامته
من بعد ما مات فطيس
واللي كتبوا السيناريو
للـ END ماخططوش

علشان مابيفهموووووش

نشرت بعدد نوفمبر 2007بجريدة "البلاد" ( سياسية عربية تصدر في كندا)

[unicorn]

الله الله الله
ايه دة يا استاذ سيد؟؟؟
كانت فين الحاجات دى؟؟؟
ال 3 قصايد
غاية فى الجمال .....
غاية فى الروعة.....
فيه تانى ؟؟؟
لو سمحت ما تقفش

[abuzahda]

الله الله الله

ايه دة يا استاذ سيد؟؟؟
كانت فين الحاجات دى؟؟؟
ال 3 قصايد
غاية فى الجمال .....
غاية فى الروعة.....
فيه تانى ؟؟؟

لو سمحت ما تقفش

والله يا عم unicorn
ما خسارة فيك دي ولا دي ولا دي
و رأيك يهمني

[د أنس البن]

يا سلام على سلاسة الأسلوب ورشاقة الكلمات
تعرف يا أستاذ سيد القصيده دى لو عشرتلاف بيت , لايمكن يفارقها القارئ قبل أن ينتهى من قراءتها حتى آخر كلمه
رائع رائع بل أكثر من رائع
وبدون مجامله

[abuzahda]

يا سلام على سلاسة الأسلوب ورشاقة الكلمات
تعرف يا أستاذ سيد القصيده دى لو عشرتلاف بيت , لايمكن يفراقها القارئ قبل أن ينتهى من قراءتها حتى آخر كلمه
رائع رائع بل أكثر من رائع

أستاذنا الجليل ، الدكتور أنس

على استحياء أرفع الملف الصوتي (من كليب اليوتيوب) وانا عارف ان سعادتك " متخصص تظبيط ملفات الصوت" في سماعي . وانا عارف ان لوائح سماعي تمنع وضع وصلات لمواقع تانية (حتى ولو كان اليوتيوب ؟ وعليه شغل لأحد أفراد أسرة سماعي؟ )

[unicorn]

المشاركة الأصلية كتبت بواسطة abuzahda

والله يا عم unicorn
ما خسارة فيك دي ولا دي ولا دي

و رأيك يهمني

الله الله الله
نبوغ شعرى و موهبة الله يباركلك فيها و يبسطنا بشِعْرك كمان و كمان
سهل ممتنع
اى حد يقراه يشعر بسهولته و ما يقدرش يقدم مثله الا اذا كان فى هذه الموهبة
بس تسمحلى بتعليق من قارئ و ليس بناقد
هذه الروائع فيها مشكلة واحدة بس
لو اتحلت
ستجوب شهرتك الافاق
فى رأيي مشكلتها ان الالفاظ بنت ناس زيادة عن اللزوم و ليست من قاع العامية
و جمال العامية اللى يخلليها تبرق زى الالماظ فى الفاظها
الفاظ الناس اللى بيقفوا فى طابور العيش طافحانين الدم فى المواصلات هى اللى تمشى مع معانى شعرك الساحر
بيرم وبديع خيرى و جاهين و نجم و فؤاد حداد ضربوا على الوتر دة و نجحوا
و نفسنا حد ياخد راية بيرم و نجم و خصوصا انه لامس مشاكلنا و بيضرب عليها بأبيات من نار
استمر يا استاذنا , و كمل يا عمنا
بارك الله لنا فى فنك و زادك من عطائه

[abuzahda]

و نفسنا حد ياخد راية بيرم و نجم و خصوصا انه لامس مشاكلنا و بيضرب عليها بأبيات من نار

و الله يا عمunicorn
ما حد بيختار و احنا في الدنيا دي بنعيد تمثيل سيناريو مكتوب من قبل أن يخلق الله تعالت قدرته ، العرش العظيم.
و سر الإبداع أن تكون نفسك ، لا غيرك
و عندما يكتب الخال الأبنودي باللهجة الصعيدية . ويكتب عمنا صلاح جاهين باللهجة القاهرية . ويكتب عمنا بيرم بالبدوية ... إلخ
فهذا ينسجم مع الأسطر الثلاثة الأُوَل من كلامي هذا.
أما عن لغة القاع (الذي أتشرف بأني من ملح طينته) ، فلاحظ أن ما وفقني الله في رفعه هنا ، هو أشعار صحفية . تنشر بانتظام في أبواب ثابتة في جريدة و مجلة تصدران هنا في أونتاريو -كندا . ومع أن الصحف العربية هنا أكتر من القراء(!) وتربطني علاقات طيبة مع أغلب أصحابها. إلا أنني فضلت ألا ألوث تاريخي بالكتابة في جريدة لا أحترمها.
و هذان الإصداران هما عن مؤسسة صحفية محترمة . أسسها الصديق الرائع الأستاذ ليث الحمداني. وله تاريخ نقابي مشرف توجَهُ بعضوية مجلس نقابة الصحفيين بالعراق ، لدورتين متتاليتين في ثمانينات القرن الماضي. وهو رجل عروبي لم تزده التجارب سوى تأصيل لأخلاق الفرسان.
وكما تعرف ، فإن لكل من خلق الله هدف يسعى إلى تحقيقه. ولو كان هدفي الشهرة بالمعنى السائد الآن فما أسهل أن أكون مؤلف أغاني روشة (وعلى فكرة شعبولا صاحبي من قبل مايجوّز أحمد حلمي لعايدة - وفي سماعي أعضاء كرام شاهدوا ماذا فعلت به في فرحي . وبالمرة خليني أقولك إن كل الفرقة و الراقصات صحابي من أرض شريف . أما المطربون فكان حبيب قلبي معوض العربي - من باب الشعرية. و ابن بلدي وحبيبي أوفا إسماعيل ، صاحب عجيب عجيب..!)
و كتبت حاجات ماتنفعش تتقال غير في الغرف المغلقة(...) وكتبت حاجات أسأل الله أن يغفرها لي.

يعني انت عاجبك هوجة قلة الأدب اللي مالية المطابع في مصر دي؟
النهاردة أي حد عايز "يفرقع" -بمنطق تجار الكاسيت- أسهل حاجة يجمع شوية إفيهات "بيئة" و هتلاقي ناس تسمعها.
ياريت تشرفني هنا . وبرضوووووووو رأيك يهمني
و ياريت تبعت لي إميلك على الخاص

أكون ممنونك

[unicorn]

الله يفتح عليك يا استاذ سيد
حتى سردك رائع و يدخل المخ
بس فى نقطة بسيطة ما وصلتش حضرتك اللى قصدته انا مش التقليد أو انك تلبس عباءة غيرك و تكتب بها ( حاشاك) فمن شعرك اتضحت شخصيتك المستقلة و كتابتك التى لا تشبه الا نفسها
و انما اردته الغوص اكثر فى المحلية
فقد غصت فيها حضرتك بطرح مشاكلها و متاعبها و اوجاعها
و التعبير عنه بموهبة شعرية شديدة الجمال اسرة لمحبى الشعر العامى
و رأيت انا ان تزيدنا غوصا فى طين المحلية باستخدام اللفظ العامى اللاذع اللاسع الساخن ,و لا أقول البذئ او المسف ولم أقصد ابدا إفيه يفرقع ليسمعه شباب راقص , اطلاقا
اللى اقصده الفاظ صميم العامية التى جاب بها رواد الشاعر العامى أفاق العرب و العجم و غزوا بها قلوب الناس , بإغراقهم فى المحلية , و كل بطريقته و شخصيته المستقلة.
يا عمنا دة حضرتك سردت جملة مرة و انت بترد على مشاركة و قلت (انا فى عرض أجلاسيهات فخامتك)
و هى دى بالظبط الألفاظ اللى اقصدها
و ما ارضى حضرتك من نشر هذه الروائع فى صحف كندية ( برغم نجاحها هناك) لم يرضينى انا كقارئ , قرأ هذه الروائع بالصدفة , لان الصحف الكندية لا تصلنى
و هذا ما قصدته بالانتشار يا استاذنا
فما تكتبه يحتاجه الناس هنا فوق ما تتصور
و كتاب العامية الحاليين مشغولون بما ليس خاف عنك من قضايا الرموش و سحر العيون , او الإفيهات اللى بتفرقع زى ما قلت حضرتك
و موهبتهم أيضا مستقاة من أغانى الأفراح و الليالى الملاح
أخيرا , قريت و سمعت كل اللى حضرتك رفعته هنا و فى اليوتيوب
قضايا كبيرة و هموم ثقيلة و كثيرة فى مصر و فى كل العروبة صاغ بها شعرك رماح و خناجر , ساخرة مرة و حزينة مرة
شعر بديع , كنز شعرى اتفتح من جديد

[abuzahda]

شعر بديع , كنز شعرى اتفتح من جديد
إلهي يا "حمو" ربنا يجبر بخاطرك

[momodarwish]

ممكن أسأل سؤال...حضرتك بتجيب الكلام الجامد ده منين..؟ بدون مجاملة والله
رائعة