أغــــرب المخلـوقـــات !!

[M O H A M E D]

أغرب المخلوقات
__

الـــدلـــدول لـــو مـــرة يقــــول بيبقــى كـــــلام متعـــــاد
فــي الأفـــــراح أجدع رقـَّاص ، و ينـُوح في الجنــازات
مُـــفلس لكـــن غـــاوي ظــهور .. قـــوم يعمـل حـركات
طبلــة تـرن و صوتهـــا العـالــي طـــالع م الفـــــراغـات
علــــى مصلحتــــه بــس يدوّر .. يعشـــق كلمـــة هــات
تــاكــل ؟ أيــوة يــا ريــت تدينــي و زوّد في السلــطـات
تــدفــع ؟ إيــه ؟ مـش سـامع صوتك .. انده ع الأمـوات
ينقـــل كلمـــة و هو بيصــــرخ : أنـــا بعـــرف بشــوات
وقـــت الجد تملــِّي بيهـــرب .. يظهـــــر فــي التفــاهات
وشـــه جميــــل تــــلاقيه متبســِّم و بيــــــرسم ســـلامـات
أحلــى كـــلام و حبيبــي و بــاشـا و غيـرها من النفـَخَات
و مـــن ورا ضهــــرك عينـــه تبـــرّق و يصـــب اللعنات
أمــــا صحيــــح الدنيـــــا دي فيهــــا يــامــا من الحشرات
حــاجـــة عجيبـــة غريبــــة مصيبـــة زادت م الأزمــــات
لمـــا النــــوع ده تشـــــــوفه بيكبـــــر و يســود الأسياد !!

**

[M O H A M E D]

الكــــــداب مــــن كدبــــــــه بيـزهــــق لـــو عـــد العـــــداد
يفشــــر ، ينصــب ، ينــزل ، يطلــع ، يلمــع في القعـَــدات
يكسب يكسب يكسب يكسب كــل مـــا بـــاس مــــــداســــات
اللبــــــلاب علـى خيـــطه بيمشــــــي و بيوصـــل سمــــوات
مــن غيـــــر صــوت و دا فجـــأة بيلدع و لا أخطـــر حيَّات
لمــــا تشـــوف الدنيــــــا جميـــلة و لا فيهـــــــا غيــــامــات
تعـــــــرف إن صــاحبنــــا مفــــــارق و بعيــــد بالمســافات
و امـــا تـــلاقـــي الدنيــــــا تمطـَّـر و بتبعـــت رَخـــامــــات
تعــــــــرف إن معـــــــــاه سنـــــارة بيصطـاد في العكـارات
عــامــل فيهـا جميـــــل و مــــــؤدب و يصــــون المقـــامات
و هُـوَّ لـــه في جبـــــــال الخِســَّة يــــامـــا مـن العـــلامــات
طعـــــم الحلـــــو فـ بؤه بيحلــــى لو غيـــــــره قـــال هـــات
ويـَّـا حــــــرارة شــــــوقـــــه لكلمـــــة تبــــرَّد نــار الـــذات
قـــام م الفــــرحة يغنـــي و يـــرقــص إنـــــه بتـــاع حسنات
داهيـــة تشيـلك ، آه يــــا منـــــافـــق .. شــرَّك هو الزاد ؟؟

**

[MOHAMED ALY]

مونولوج اجتماعى هادف ... كان يمكن ان يغنيه اسماعيل ياسين او سيد الملاح .... لكن فى عصر العولمة اصبحت دى سلوكيات عادية ... بل و تدرس فى معاهد و اكاديميات خاصة بالهندسة الادارية .... تحت عناوين مثل ( مهارات الادارة الفعالة ) .

[M O H A M E D]

ما علينا من اللي انا كتبته و الموضوع كله
تشريف حضرتك و رأيك شئ كبير عندي
اسمع يا سيدي ..

قنـــديـــــــــــل و آه منـــــــه
عـــــــــاشق أنـــــــا فنـــــــه
و دي مش محتــاجة شــرح

البسمـــــــة فـــي صوتـــــــه
و النغمــــــة في سكوتــــــــه
تـقــــــدر تـــــداوي الجــــرح

الفــــــن مــــن رسمـــــــــــه
لايــــــق عـلـــــى إسمــــــــه
بــنـــى مــــن نــــوره صـرح

قنـــــاديــلي على بـــــــابـــــه
حــــــــــــارس لســــــردابــــه
كـنــــز الهنـــــا و الفـــــــرح

و بــــذوقـــــه و جمــــــالــــه
يفتــــــــح لأحبــــــــابــــــــــه
أبــــــــواب البهجــــــة فتــــح

**

[unicorn]

زى ما قال الباشمهندس محمد على , يا سلامونى

كل السلبيات الخٌلُقية اللى ذكرتها فى ابياتك , هى مقومات نجاح هذا العصر
و ان كانت لا تظهر بهذا الوضوح الشديد فى وصفك , و لا تتجمع كل هذه الصفات السيئة فى شخص واحد بهذه الصورة البشعة ,
الا انها موجودة بالفعل ,
سلامون , وصفك لهذه الصفات السيئة و تبشيعها بهذه الصورة دليل على نقاء سريرتك و دليل على نفورك من الزيف بكل صوره .
بس برضه دماغك ناشفة اوى.

[M O H A M E D]

المشاركة الأصلية كتبت بواسطة unicorn

زى ما قال الباشمهندس محمد على , يا سلامونى

كل السلبيات الخٌلُقية اللى ذكرتها فى ابياتك , هى مقومات نجاح هذا العصر
و ان كانت لا تظهر بهذا الوضوح الشديد فى وصفك , و لا تتجمع كل هذه الصفات السيئة فى شخص واحد بهذه الصورة البشعة ,
الا انها موجودة بالفعل ,
سلامون , وصفك لهذه الصفات السيئة و تبشيعها بهذه الصورة دليل على نقاء سريرتك و دليل على نفورك من الزيف بكل صوره .
بس برضه دماغك ناشفة اوى.

صديقي أبو مندور
طبعاً صعب ، بل مستحيل كل الصفات دي تتجمع في شخص واحد
و لو اجتمعت في حد بالصورة دي أحسن له يروح ينتحر
و النجاح لو بييجي بالأسلوب ده يبقى لا مؤاخذة ( ط.. ) فيه
و عارف اني دماغي ناشفة اوي بس تقصد ايه بالظبط ؟
اوعى يكون حاجة بخصوص الوزن !!

[رايا]

المشاركة الأصلية كتبت بواسطة محمد السلاموني

داهيـــة تشيـلك ، آه يــــا منـــــافـــق .. شــرَّك هو الزاد ؟؟

**

حلو يا استاذ محمد
استخدمت كلمات من زمان مش سمعنها

داهية تشيلك
كلمة مصرية بحت قربت تنقرض

[M O H A M E D]

صديقي محمد أبو مندور
بقدر الإمكان حاولت ألتزم بالوزن
و أعتقد أن البيتين موزنين ..
عموماً ننتظر وصول الأستاذ كمال عبد الرحمن
و ربنا يصبره على القسم و علينا !

[M O H A M E D]

أشكرك يا ابو فارس
و أتمنى أكون دايماً عند حسن ظنك
تحياتي ..

[M O H A M E D]

والله يا أستاذة رايا
أنا كنت قلقان من استخدام كلمة " داهية " !
لكن سبتها لإنها طلعت مني عفوية وقت الكتابة
أشكرك يا أخت رايا على مرورك و رأيك