مهارات متقدمة فى برنامج انكور للتدوين الموسيقى

**عادل صموئيل** · #1 06/02/2009, 19h39

الى كل احبائى
اشكركم على حفاوتكم بموضوعى برنامج انكور
واقدم لكم مشروعى الثانى مهارات متقدمة فى برنامج انكور من إعدادى
راعيت فيه التبسيط فى الشرح , والمهارات مفيدة لكل الفئات , المحترفين والمدرسين والهواء
واقول لكم ياشباب حظكم حلو بالبرامج دى ياخسارة ماكانتش على ايامنا
واقول لكم مرة كنت فى الفرقة الماسية فى بروفة للفنانة وردة وقالت على النوتة : بالحرف الواحد : ياترى مفيش ماكينة تكتب النوتة دى ؟ وضحكنا كلنا لأنها ايامها كانت تتكلم فى خيال علمى
وانا كل مرة افتح برنامج انكور لأكتب نوتة اتذكر الفناة العزيزة وردة وابتسم وادعى لها باصحة والعافية وطول العمر
فهى الباقية من رائحة الحبايب .
وطبعا احنا متفقين انا تحت امركم فى أى استشارات او اسئلة وهناك مهارات اخرى فى الطريق

**احمد سنايم** · #2 07/02/2009, 21h09

على راى اغنية نبيل شعيل ما اروعك يا استاذ عادل بمناسبة الحكاية اللطيفة بتاعت الفنانة وردة هل احمد فؤاد حسن كان بيزعل لما عبد الحليم يقود الماسية فى وجودة السؤال الثانى فى انكور ممكن انكور يحول ملفات الميدى الى نوتة ولو يقدر يا ريت تشرح الطريقة وشكرا الف الف شكر

**عادل صموئيل** · #3 08/02/2009, 14h25

اقتباس:

المشاركة الأصلية كتبت بواسطة احمد سنايم

على راى اغنية نبيل شعيل ما اروعك يا استاذ عادل بمناسبة الحكاية اللطيفة بتاعت الفنانة وردة هل احمد فؤاد حسن كان بيزعل لما عبد الحليم يقود الماسية فى وجودة السؤال الثانى فى انكور ممكن انكور يحول ملفات الميدى الى نوتة ولو يقدر يا ريت تشرح الطريقة وشكرا الف الف شكر

اولا اشكرك يا اخ احمد
ثانيا عمر ماكان احمد فؤاد حسن بيزعل لأن كلنا كنا بنحب عبد الحليم جد ثانيا والمهم عبد الحليم لما كان بيشاور ما كانش مايسترو يعنى المايسترو بيشاور دائما اشارات الميزان لكن عبد الحليم كان بيترجم الجملة بأيده وبالذات الجمل فى الأدلييب يعنى لو تاخد بالك تلاقيه بيحرك ايده على حروف الجملة مش زى اى مايسترو بيشاورها على الميزان
بالذات سؤالك عن الميدى انا ماعنديش فكرة لسبب انا بكتب النوتة من دماغى مش بحب استعمل البرامج اللى تكتب لى
لسبب ان البرامج دى مش بتساعد على الكتابة ولكن بتفسد الكتابة , ويوجدبرامج منها كتير على المنتدى الاخوة الاعضاء منزلينها لكن انا مش بحب استعملها بحس انها عقيمة لأن حتى لو كتبت بتكتب نوتة صعبة جدا ماحدش يعرف يقراها .

**فريد كمال** · #4 03/08/2009, 03h36

شكرا استاذنا العزيز على محبتك واهتمامك وربنا يبارك حياتك وتسعد بما تزرعه من محبة وعطاء
شكرا لك وللجميع تحياتى وتقديرى
فريد كمال

**احمد سنايم** · #5 09/08/2009, 16h15

استاذى الجميل الاكثر من رائع مايسترو عادل صموائيل يا ريت حضرتك تشرح طريقة كتابة الادليب على انكور لآنى بطبق النوت على انكور وصادفتنى نوتة رق الحبيب وفيها ادليب مش فى بداية الموسيقى بعد حوالى تسع موازير حضرتك علمنى اذاى اكتب الادليب فى البداية خالص واذاى اكتبة اذا كان فى نصف المقطوعة وعلى فكرة يا مايسترو انا بلاقى نوت كثير جدا على النت لاغانى مشهورة ولما اكتبها على انكور اكتشف ان فيها اخطاء كثيرة جدا انما النوت اللى حضرتك بتكتبها بطبقها على انكور بتكون صحيحة جدا وخلال ثلاث ساعات اكون حفظتها وعزفتها 100%ربنا يبارك لنا فيك ويخليك لنا ويفرحك بكل حبايبك وشكرا الف الف شكر

**عادل صموئيل** · #6 10/08/2009, 20h05

عزيزى احمد
طبعا انا بحب الناس اللى بتحاول تكون شاطرة
اول شىء كتابة الأدليب دى عمل تخليقى انا بعمله مش فى البرنامج اصلا وللعلم لو اللى عملوا البرنامج شافوا اللى انا بعمله ده حايتجننوا بس دى طبيعة المخ المصرى ما يقفش قدامه حاجة
اول حاجة فى الجزء التانى من شرح الأنكور فيع علامة قلت تحطها فى التوول بار فيها سهمين عكس بعض ووردة دى بتلغى عدادا الموازير اول حاجة اتأكد انك شفتها بعدين اضغط عليها افتحها واقفلها مرتين يعنى لازم تكون مش متظللة
دى وظيفتها بتخلى المازورة تلغى العداد وتاخد اى عدد من العلامات ممكن لو 100 علامة
تانى حاجة من القائمة score اختار الخيار قبل الأخير measure per system وده معناه عدد الموازير فى المدرج او السطر انت تظلل السطر بعدين تدوس الخيار ده حتلاقى مكتوب رقم 4 اذا كنت عامل اربع موازير خلى الرقم 1 عشان السطر يبقى مازورة واحدة بعدين اكتب اول نغمة وامسكها من راسها وهاتها فى اول السطر وابتدى اكتب الأدليب بس لاحظ المسافات بين الحروف لأن انت اللى حاتتحكم فيها جرب وقولى

**حسام الدين 1978** · #7 26/12/2010, 14h25

استاذ عادل حياك الله شرحك جميل جدا حقيقي وجذاب بجد انا اشتركت في المنتدي عشان اكتب لك شكري لان موضعاتك جميلة انا مدرس مهارات موسيقية عندي سؤال مهم هل ممكن اكتب تمرين ايقاعي من برنامج انكور وكيف اصل لصفحة خاصة لكتابة الايقاع فقط هذا ما ينقصني في هذا البرنامج أرجوا منك الأفادة وشكراً جزيلاً

حسام أبو جنا

**عادل صموئيل** · #8 26/12/2010, 20h29

اخوتى الأحباء
ردا على الأخ حسام الدين
انا رديت عليه على الخاص بس حسيت ان من واجبى ان الجميع اقول لهم المعلومة دى لأن فيه اعضاء كتير ممكن يحتاجوا الميزة
أنا عملت موضوع كامل نزلته هنا فى موضوع الدروس ارجو الرجوع اليه لمن يهمهم الأمر

على هذا الرابط

http://www.sama3y.net/forum/showthread.php?t=87929

مع اطيب تحياتى

**سامى امين** · #9 29/12/2010, 05h54

مستر عادل انا حولت نوتة لميدى وحاولت مع انكور يكتب الهارمونى بتاعها بس مش عارف انا اللى ماعرفتش ولا هو ماعرفش قولى اعمل الحكاية دى اذاى
عزيزى سامى
انا اللى مافهمتش من كلامك حاجة
يعنى ممكن تشرح لى انت عملت ايه بالظبط وواحدة واحدة
يعنى النوتة الاول كانت مكتوبة على ايه ؟ وحولتها ميدى ازاى بعدين عملت ايه
مع اطيب تحياتى عادل صموئيل